Engaado 13
13
1Omwaana mukesi awulira ohukeraka hwa laatang'ene,
nae omwaana muhyaamu haba satekeeresa nibamwoolobya.
2Omuundu mulai anyoola ebilai bitula mu nomanoma yae,
nae abahobi beekoomba ohuhola eby'obwaalaba.
3Oyo omanyirisa bi alomaloma awonia obulamu bwae;
nae owebbwangula bbwangula neende emboosi omweene yereetera ohusihirira.
4Omuundu mukata haba sanyoola bi yekoomba,
nae omuundu ohola neende esinani anyoola obuyiinda.
5Omuundu muluungifu yebwaaba obubacha,
nae omubi ahola eby'esoni haandi yemalamo oluyaali.
6Obuluungifu buliinda omuluungifu,
nae esyonoono sikwiisa abahola-mbi.
7Baliwo abeeyira koti abanyali, nae babulaho esiindu syoosi;
haandi wabaao abeeyira koti abamanani, nae bayiinda muno.
8Obuyiinda bu muundu ali nabwo nibwo obulinunula obulamu bwae,
nae omumanani abula engeri yohweewoniamo.
9Obulafu bw'abaluungifu bwaaduha,
nae ababi bali koti etaara lisimire.
10Ohwehuduumbasa huleeta ebidinyu,
nae sy'amakesi ohufukiirira ohukerakirwa.
11Obuyiinda bw'onyoola bwaangu, bwosi buwaao bwaangu,
nae obuyiinda bw'onyoola kala-kaala n'ohola emirimo nibwo obwemeeda.
12Ohutaba neende esuubi, huleeta ebibaaso bibi,
nae onyoola esiindu si yekoomba akobolamo obulamu.
13Oyo olekeeresa ohukerakirwa, omweene yereetera ohusihirira,
nae oyo odiira ebilagiro, yahanyoole omukabo.
14Enjekesa y'ab'amakesi niyo enjaako y'obulamu,
yiwonia omuundu mu miteego ch'ohufwa.
15Amakesi kaleeta oluyaali,
nae engira y'ababi niyo ohusihiriswa haabwe.
16Abaandu bali neende amakesi babaasa mberi hu bahola esiindu,
nae omusiru yekesa obutamanya bwae.
17Wamwaanda mubi aleeta ebidinyu,
nae omutumwa mweesikwa aleetao omuleembe.
18Oyo otadaha ohukerakirwa, yereetera obumanani neende ohumalamwo oluyaali,
nae oyo ofukiirira ohwolobwa yeswamo oluyaali.
19Omuundu n'anyoola esiindu si yekoomba asangaala;
nae ohufudatira esyonoono syoomusiro eyiri abasiru.
20Oyo okeenda neende abaandu balimo amakesi, yesi mukesi niye,
nae owaamba obwiicha neende abasiru, alinyoola ebidinyu.
21Ebidinyu biloonda ababi buli yi bachiira,
nae ohuhula-hulana nihwo omukabo kw'abaluungifu.
22Omuundu mulai anyoola obuyiinda bu yahalehere abeechuhulu bae,
nae abaluungifu nibo abahayire obuyiinda bw'abahola-mbi.
23Endalo ch'abamanani chawumamo ebyohulya biingi,
nae ababula obwadyeeri sibabakanya ohubirya.
24Oyo otakolola omwaana wae, saaba amudaha,
nae oyo odaha omwaana wae amukolola.
25Omuundu muluungifu anyoola ebyohulya bimumala,
nae omuundu mubi enjala yimuluma buli ludaalo.
©Bible Society of Kenya, 2019
©Bible Society of Uganda, 2019