Engaado 11
11
1Omwaami haba saadaha abaandu beehoonyera ebikero bihyaamu,
nae asiima abo abehoonyera ebikero byadyeeri.
2Ohwehuduumbasa huleeta ohudiirwa esoni;
nae obuloonga nibwo amakesi.
3Obulai bw'abaandu baluungifu bubeemereramo,
nae obuhyaamu bw'abaandu balyaanga bubasihirisa.
4Obuyiinda bubulamo engaanga yoosi hu ludaalo lw'ohufwa,
nae obuluungifu buwonia obulamu bwao.
5Obuluungifu bw'omuundu mulai bukolola obulamu bwae,
nae omuundu mubi, yesihirisa omweene.
6Obuluungifu bw'abaandu baluungifu bubawonia,
7Omuundu mubi naafwa, ebiindu bi yali n'asuubira bisihirira,
haandi esuubi ly'omuundu otatya Nasaae lya bihaya.
8Omuundu muluungifu awonisibwaanga ohutula mu bidinyu,
nae omuhola-mbi niye obikwaamo.
9Omuundu otatya Nasaae alomaloma ebiindu bisihirisa abaasye,
nae abaandu baluungifu, ohumanya hubawonia.
10Ebiindu nibichiira abaluungifu bulai, esiko nisisangaala,
haandi ababi nibafwa yibao esiyoka sy'omweehoyo.
11Abaandu baluungifu baleetera esiko ehabi,
nae emboosi ch'abahola-mbi, chisireetera ohusihirira.
12Oyo olekeeresa abaasye abulamo amakesi,
nae omuundu muwulisi awuleera-buwuleera.
13Oyo okeesa obumoonyi, atuumbula ebyaama,
nae omuundu mweesikwa mu mwooyo, awuleera-buwuleera.
14Abaandu basihirira nibabula okeraka;
nae aali abakeraki baangi, ao niwo yi muleembe kuba.
15Oyo owimiirira omuundu yataamanyire yaheyiichulise,
nae oyo otadaha ohweyiingisa mu by'abaandi niye owahanyoole omuleembe.
16Omuhasi w'ehabi yeeswamo oluyaali,
haandi abasaacha b'esinani banyoola obuyiinda.
17Omuundu w'esisa omweene yeenyoolera engaanga,
nae omuundu mwaalaba, omweene yechuunia.
18Omuhola-mbi yebacha omweene ati achia ohunyoola omusaara,
nae oyo ohola ebiluungifu, anyoola omusaara kw'elalira.
19Oyo owomiirira mu buluungifu yahabe omulamu,
nae oyo okonyeresa ohuhola ebibi yahafwe.
20Omwaami haba saadaha abaandu bali neende ebibaaso bidoondobanu,
nae asangaalira abahola ebiindu byoolerefu.
21Ataali ohukana-kana hwoosi, abahola-mbi bachia ohusaandisibwa,
nae abaluungifu bachia ohuwonisibwa.
22Omuhasi obula esaambo ali koti esaabbu mu lyoolu ly'embiichi.
23Abaandu baluungifu beekoomba ebiindu bilai byoong'ene;
nae esuubi ly'abahola-mbi nilyo etima ly'Omwaami.
24Baliwo abaandu bakaba ataali ohudeeba, bemeeda ohuba abayiinda;
haandi wabaao abaandi abatanyala hukaba, badoong'a sa nibemeeda ohuba abamanani.
25Omuundu mukabi yahabe omuyiinda,
haandi oyo oberesa abaandi obuhoonyi, yesi bahamuhoonye.
26Oyo owiima abaasye emwo, bahamubwaabe,
nae oyo okusaho abaasye emwo bahamudahise ehabi.
27Oyo okoonya esiindu silai, abaasye bahamusiime,
nae nokoonya esibi, esibi nisyo si wahanyoole.
28Oyo oweesika obuyiinda bwae yahahoohe,
nae omuluungifu yahanyirire koti omusaala kuloha.
29Oyo oleetera abomu nyuumba yae ebidinyu, sibulao esiindu si yahadoong'e nasyo, omusiru yahahalaabanire ow'amakesi.
30Ebyaamo by'obuluungifu nibyo obulamu,
nae egiili limalao obulamu.
31 #
1 Pet 4:18. Nikali mbwe abaandu baluungifu banyoola omukabo ku bahoyera hu syaalo,
nae ababi neende abahola-mbi nibo abatahanyoole omukabo kubahoyera!
©Bible Society of Kenya, 2019
©Bible Society of Uganda, 2019