Engaado 10
10
Engaado cha Solomooni
1Omwaana w'amakesi asangaasa laatang'ene,
nae omwaana musiru aleetera ng'ina engisa.
2Emyaandu kinyoolehana mu huhola obubi kibulamo engaanga,
nae obuluungifu buwonia obulamu bwao.
3Omwaami haba siyahalehe omuundu muluungifu yaafwa enjala,
nae achia ohukayira ababi ohunyoola ebiindu bi beekoomba.
4Emihono mikata kileeta obumanani,
nae eky'esinani kileeta obuyiinda.
5Omwaana okesa mu ndaalo ch'esiruumbi mukesi niye,
nae omwaana weeyalisa mu ndaalo cheekesa aleeta esoni.
6Omuundu muluungifu anyoola ehabi nyiingi,
nae ababi balomaloma eby'obwaalaba.
7Omuundu muluungifu anechulisweenge mbwe w'ehabi,
nae eliita ly'omuhola-mbi lyahabole.
8Omuundu mukesi afukiirira ebilagiro,
nae oyo olomaloma eby'obusiru achia ohusihirira.
9Omuundu okeendera mubwadyeeri aba bulai,
nae oyo owehubbira-hubbira yahamanyihane.
10Omuundu okisa obwadyeeri n'afwiinya-fwiinya emoni aleeta ebidinyu,
nae oyo owoolyobya ataali ohutya hwoosi, aleeta omuleembe.
11Emboosi ch'omuundu muluungifu, nimwo omutula obulamu,
nae emboosi ch'omuundu mubi chikisa obwaalaba.
12 #
Yak 5:20; 1 Pet 4:8. Ohulekana huleeta obusoolo,
nae ohudahana huleheramo ebisobyo byoosi.
13Mu mboosi ch'omuundu owulira onyoolamo amakesi,
nae omukoongo kw'omuundu musiru kuhoyerwa ohuhuywa endawusi.
14Abaandu bakesi haba sibahaywa esy'ohulomaloma,
nae ohwebwangula hw'omusiru husudya aambi ohusihirira.
15Obuyiinda buliinda omuyiinda;
obumanani busihirisa omumanani.
16Omusaara kw'omuundu muluungifu nikwo obulamu,
omuheemba kw'omuhola-mbi nisyo esyonoono.
17Oyo ofukiirira ohukerakirwa ali hu ngira y'obulamu,
nae oyo otadaha ohwoolosibwa, yahanyoole ebidinyu.
18Omuundu okisa-kisa obulekani, mubacha niye,
haandi oyo obachira owaasye, musiru niye.
19Mu hulomaloma emboosi nyiingi, haba simuhayamo emboosi ehyaamu,
nae oyo owebulerera, aba omwehaliirisa.
20Emboosi ch'omuundu muluungifu chiri nga efeesa ndai muno;
ebibaaso by'omuundu mubi, bibulamo obuhoonyi.
21Emboosi ch'omuundu muluungifu chihoonya abaandu baangi,
nae abasiru bafwa olw'ohuhaya obutamanya.
22Ehabi ch'Omwaami chileeta obuyiinda,
haandi chibulamo engisa.
23Ohuhola ebibi nikwo omubayo kw'omusiru,
nae ohuhola eby'amakesi nilyo esangaalo ly'omuundu muulisi.
24Ebiindu bi muundu mubi atya nibyo ebyahamukweeho,
nae omuluungifu yahanyoole bi yekoomba.
25Omuyaka kw'amaani nikuwuucha, ababi bahadumuuhe,
nae omuluungifu yahomiire endaalo choosi.
26Koti lu malwa kahaliihe keeta ameeno, haandi omwoosi kuwofusa emoni,
nilwo lu biri n'otuma omuundu muteengu.
27Ohutya Omwaami hukera omuundu yayiindira,
nae emyaaka ky'omuundu mubi kyaheembikitanisibwe.
28Esuubi ly'omuundu muluungifu lileeta ohweehoya,
nae ohusuubira hw'abahola-mbi hwa bihaya.
29Omwaami niye amaani k'abaandu baluungifu,
nae asihirisa ababi.
30Abaluungifu haba sibahamalweo,
nae ababi haba sibahayiindire mu syaalo.
31Abaandu baluungifu balomaloma eby'amakesi,
nae abadoondobanu mu hulomaloma bahaakamisibwe.
32Abaandu baluungifu bamanyire esihoyerwa ohulomwalomwa,
nae ababi balomaloma ebidoondobania abaandu.
©Bible Society of Kenya, 2019
©Bible Society of Uganda, 2019