Abafilipi 4
4
Amakerako
1Mani sakira, basyaange, bandaha haandi bandeekoomba, eng'we esangaalo lyaange haandi ekofia y'obwaami yaange, mweeme mwomiire mutyo mu Omwaami, baheerwa baange.
2Ndi ohwekweeda Yudia haandi ndi ohwekweeda Sitike banyale ohufukiirisania sa mu Omwaami. 3Haandi ndi ohubasaba eng'we mwesi, abahalaabani basyaange, muhoonye abahasi bano, olwohuba bahalaabana boombi nibahoonyana naange mu huyaala Emboosi Ndai alala neende Kelemeeti neende abahalaabani baange badoong'ereyo, ba meeta kaabwe kali mu sitabo sy'obulamu.
4Sangaalireenge mu Omwaami ebiha byoosi; haandi mboola endi Sangaaleenge.
5Lehe abaandu boosi bamanyeenge ohwesimiirisa hweeng'we. Omwaami ali aambi. 6Mutelalihiriraanga esiindu syoosi-syoosi nae musabeenge sa esaala nimutuumbulira Nasaae buli siindu syoosi neende emyooyo kichuule ohweebasa. 7Mani omuleembe kwa Nasaae, okuhira ohumanya hw'abaandu hwoosi, kunyale ohuliinda emyooyo kyeeng'we alala neende ebibaaso byeeng'we mu Kristo Yesu.
8Mani nimaliirisa, basyaange, esiindu syoosi esyadyeeri, esiindu syoosi esy'oluyaali, esiindu syoosi esihoyera, esiindu syoosi esichweenufu, esiindu syoosi esidahibwa, esiindu syoosi esy'esisa, nikali mbwe aliwo obuluungifu bweene, nikali mbwe aliwo esiindu syoosi esihoyera ohukinisibwa, muhoyere ohubaasaanga hu biindu bifwaana koti bino. 9Esiindu syoosi simwanjekeraho, haandi si mwanyoola ohutula hweese, haandi si mwambuliriraho, haandi si mwambonamo, musiholeenge; mani Nasaae w'omuleembe anyale ohubechaanga naang'we.
Ohweebasa esiyaanwa sya Nasaae
10Sangaaliraanga mu Omwaami muno olwohuba luunyuma lw'ohuhiinda muno, mwaanyalire ohukobolamo ohuundaha hu mwali nimuundahamo; mubwadyeeri bweene mwali nimuundaha, nae haba simwali nimunyalaanga ohunyoola ehabi y'ohwekeseramo ohudaha hweeng'we ohwo. 11Sikali mbwe ndi ohwekanyiirisa ohudahibwa; olwohuba ndaamalire ohweeka endi, obulamu bwoosi buumba nimbaamo, buunjera sa. 12Manyire ohubaao kata ni mba ni ndi mu bumanani, haandi manyire ohubaao kata ni mba ni ndi mu bunyali; mu bulamu bwoosi, haandi kata neende mu mbeera choosi, ndamala ohumanya esyaama siri mu huba neende ebiindu biingi neende ohuba mu njala, ohweyika mu bibitiirifu neende ohuwoonga mu buheeri. 13Ese nyala ohubaao mu bulamu bwoosi ohweema hu bunyala bu Kristo yamberesa.
14Kata katyo, syabeere esiindu sy'esisa, eng'we ohuuhoonya mu madinyu kaange kano. 15Eng'we Abafilipi, mumanyire bulai bweene muti muhuchaaka hw'Emboosi Ndai, koti lu ndatula mu Makedonia, abulao abafukiiriri abadahaho ohuhoonya mu hukabaanga neende ohunyoolaanga, ohutusaho eng'we mweng'ene.
16 #
Biho 17:1. #2 Kor 11:9. Olwohuba kata neende nindali mu Tesalonika mweecha mwaandumiraanga obuhoonyi obungi. 17Siindi huboola endi ese ndekoomba sa ohunyoolaanga ebiyaanwa; nae ndekoomba ohubonaho ebihole biba nibimeeda huhusiimwa hweeng'we. 18#Hut 29:18. Ese ndamala ohunyoola omusaara kwaange mu bwiichufu, kata neende ohuhirao; ndi omwichufu, nimalire ohunyoola ohutula eyiri Epafirodito ebiyaanwa bimwandumira, ebyali koti esing'aari silai sy'esiyaanwa, esiyaanwa sifukiirirwa haandi esisangaasa esya Nasaae. 19Mani Nasaae waange achia ohubaberesa buli si mudaha ohweema hu buungi bw'oluyaali lwae oluli mu Kristo Yesu. 20Oluyaali lube eyiri Nasaae weefwe, haandi Seefwe endaalo choosi. Amiina.
Amaheeso kamaliirihayo
21Heesa buli mwoolerefu mu Kristo Yesu. Abasyeefwe bali naange babaheesa. 22Aboolerefu boosi babaheesa, ohuhirira elalira abo abali mu nyuumba ya Kaisaari.
23Embabaasi ch'Omwaami Yesu Kristo chibe naang'we mweesi.
©Bible Society of Kenya, 2019
©Bible Society of Uganda, 2019