Abafilipi 2
2
Obuloonga neende obuhunuufu bwa Kristo
1Obulamu bweeng'we mu Kristo bubameedamo amaani, haandi obuheeri bwae bubagumia emyooyo. Muli silala neende Mwooyo. Mwooyo yabaambaania alala, mani muli neende ohudiirira abasyeeng'we esisa alala neende ohubaleheramo. 2Bulaanu mbekweeda muusangaasire elalira nimuba neende ebibaaso bifwaana, neende ohuheerana hufwaanana, mani mubecheenge silala mu myooyo kyeeng'we neende mu bibaaso byeeng'we. 3Mutaholaanga esiindu syoosi nimulwaanira oluyaali, oba nimudaha ohwelyooyia hutaalimo obuhoonyi, nae mubecheenge abaloonga mu moni w'abaasyeng'we, nimubayira koti abali neende oluyaali ohubahira. 4Haandi buli muundu hweeng'we abaseenge hu siiindu si waasye aba n'adaha ataali ohubasaanga sa hu si mweene aba n'adaha. 5Ebibaaso byeeng'we bihoyere ohubechaanga koti bi Kristo yali nabyo,
6kata neende niyali naali silala neende Nasaae,
haba siyatemaho ohwehoonyera amaani ako ohudoong'a niyaakana neende Nasaae. 7Ohutusaho, omweene yemalaho ebiindu byoosi,
mani yehola koti omuhalaabani muwaambe.
Yebulwa koti omuundu
mani yeecha yafwaana koti omuundu.
8Yali omuloonga, mani yakeendera mu buwulisi ohwoolera elalira mu hufwa,
ohufwa hwae hu musalabba.
9Mani sakira Nasaae yamuniinia aakulu muno, haandi yaamuberesa eliita ly'oluyaali lihira ameeta koosi.
10 #
Yis 45:23. Mani sakira ohweema hu luyaali lw'eliita lya Yesu,
ebiloonge byoosi ebiri Muukulu neende hu syaalo, neende aasi w'esyaalo,
bichia ohusigama aasi biberese eliita lya Yesu oluyaali
11haandi enimi choosi chichia ohutuumbula chiti, Yesu Kristo niye Omwaami,
nichiberesa Nasaae Laatang'ene oluyaali.
Ohuba obulafu mu syaalo
12Sakira, basyaange baheerwa, koti lu mwambuliraanga, buli siha ni ndi naang'we, mani bulaanu muhoyere ohuumbulira ohuhirao, koti lu taali aambi naang'we. Mwemeede ohuhalaabanira obuwonia bweeng'we mu hutya neende mu luteengo. 13Olwohuba Nasaae niye oli ohubaholeramo ebiha byoosi naakera nimufukiirira haandi nimunyala ohuhola by'adaha.
14Holeenge buli siindu syoosi ataali ohwekanyiirisa oba ohuyiingana, 15#Amal 32:5.hu munyale ohuba nimutaaliho esiindu syoosi sibabafunaana, nae mube abaluungifu koti abaana ba Nasaae ababulaho esyonoono, abamenya mu syaalo sy'abaandu badoondobanu haandi abonooni. Mani muhoyere ohubaaduhamo, koti eng'ining'ini chihosa mu syaalo, 16nimwomiriire hu Mboosi y'obulamu. Nimuhola mutyo mba njia ohuba neende esifune esy'ohubehoyeramo hu ludaalo lwa Kristo, olwohuba sichia ohweekesa siti amaani kaange koosi alala neende omulimo kwaange, haba sibyali eby'ebihaya.
17Kata amabaanga kaange kahaba nikachuhibwa aasi hu siyaanwa sy'ohweyaanayo sy'efukiirira yeng'we eyiri Nasaae. Nisiba sityo, ndi omusangaafu ohukabana esangaalo lyaange naang'we mweesi. 18Mu ngeri nasilala, mwesi muhoyere ohukabana esangaalo lyeeng'we alala naange.
Timoteo neende Epafirodito
19Nihuli ohudaha hw'Omwaami, suubira endi njia ohubatumira bwaangu Timoteo, hu nyale ohugumisibwa neende emboosi echibadiiraho. 20Yibulao omuundu wuundi ohutusaho oyo yeeng'ene obachuunirwa koti ese. 21Abadoong'ereo boosi bafwa hu biindu byaabwe byoong'ene, ataali ohubaasa hu bidiira hu Kristo Yesu. 22Haandi mwesi mumanyiire elalira koti lu Timoteo yekesera elalira ati anyala omulimo okwo bulai, haandi koti omwaana neende laatang'ene, hwahalaabanira alala ohweekesa Emboosi Ndai. 23Suubira ohumutuma yi muli ndaafwa ndamanya koti lu njia ohuba. 24Haandi suubira mu Omwaami endi ese mweene njia ohwiicha eyo bwaangu.
25Haandi mbaasire endi sihoyera ohubatumira omwaana weeng'we Epafurodiito yesi owamala ohuhalaabana tuma yi muli omwaana weefwe wuno Epafirodito owamala ohuhalaabana naahola koti wamwaanda weeng'we ohuhoonyera. 26Yekoomba muno ohubabona mweesi, haandi yachunisibwa muno mu mwooyo ohuwulira ati mwamanya n'alwaala. 27Mubwadyeeri bweene yali omulwaaye muno yoola aambi ohufwa. Nae Nasaae yeecha yaamukwiira esisa, haandi syesi yangwiira esisa, hu nyale ohutaba neende esibeera siingi muno. 28Sakira ndi omwetekefu ohumutuma yi muli, hu nyale ohusangaala nimubweene haandi, hu sibeera syaange siwe. 29Sakira mumwakaanire neende esangaalo liingi koti abakaanira omwaana weeng'we mweene mu Omwaami. Haandi mwiseenge oluyaali mu baandu bafwaana batyo, 30olwohuba yeyanayo obulamu bwae yawona ohufwa hulw'ohuhalaabanira Kristo, hwaanyale ohuumberesa obuhoonyi bu eng'we mutanyala ohuumberesa.
©Bible Society of Kenya, 2019
©Bible Society of Uganda, 2019