Ohubala 36
36
Esihirano ya bahasi baba nibadeeha
1Abeemirisi b'amadaala b'enono ya Gileadi, omwaana wa Makiri, haandi omwiichuhulu wa Manaase omwaana wa Yosefu, bachia eyiri Musa alala neende abeemirisi baandi. 2#Hub 27:7. Baboola bati, “Omwaami yabalagira ohukabaniamo eloba abaandu ba Yisiraeli nibeehoonyera ohuubbaannga eha. Haandi yabalagira ohukaba esihirano y'omwiiho weefwe Selofehaadi abahaana bae. 3Nae yichulise muti, nikali mbwe banyala bachia badeehera abasaacha b'oluyia luundi, esihirano yaabwe eyo, bulaanu yiba yichia ohuba ey'oluyia olwo, mani ngaandi, obuungi bwalyo buba nibwatubeereswa buba buchia ohuduuduyaanga sa. 4Mu Mwaaka kw'Ohukobosera, ebiindu byoosi ebiba nibyakuswa bikoboswayo eyiri abeenebyo bataangira ohuba nabyo, esihirano y'abahaana ba Selofehaadi yiba yichia ohumeederwa elalira hu nono ya oluyia lu baba nibadeehamo mani yiba yimalire ohufwiirwa elalira neende enyuumba yeefwe.”
5Mani Musa yaaberesa yalagira Abaisiraeli ebilagiro biloondaho bino ohutula eyiri Omwaami. Yaboola ati, “Ebiindu bi nono ya Manaase luli ohuboola byadyeeri nibyo, 6mani sakira bulaanu Omwaami aboola ati abahaana ba Selofehaadi bali neende edeembe ohudeehera omuundu yeesi yi baba nibadahire, nae ohutusaho mu nono yaabwe yoong'ene. 7Esihirano ya buli Mu Yisiraeli yichia ohudoong'aanga niyiyambaaniiswe hu nono yae. 8Mani buli muhasi yeesi osihira esihirano mu nono y'EsiYisiraeli yoosi aba ahoyera ohudeheraanga omusaacha w'enyuumba yeene oluyia olwo. Mani mu ngira yino yoong'ene nimwo mu Baisiraeli boosi baba nibachia ohunyala ohusihiraanga esihirano y'abaandu baabwe bafwa, 9mani esihirano eyo yaahaya ohuduuma yaachia yoola yaakwa hu nono yiindi. Buli nono yichia ohwemeeda ohubechaanga neende emyaandu kyayo yoong'ene.”
10Mani abahaana ba Selofehaadi bafukiirira mani baahola koti lu Omwaami yali n'alagiire Musa; 11olwohuba Mahila, Tirisa, Hogola, Milika neende Nuwa, boosi abahaana ba Selofehaadi, baadeehera abaana ba bamwaanang'ina saabwe. 12Beecha badeeha mu madaala k'abaana ba Manaase omwaana wa Yosefu, mani esihirano yaabwe yadoong'a mu luyia lw'edaala lya saabwe.
13Mani kano niko amalako, haandi neende ebilagiro bi Omwaami yalagira ohubitira mu Musa eyiri abaandu ba Yisiraeli abali nibamenya mu syaalo sikwalaafu sya Moabbu, huundulo wa Yorodaani mu Yeriko.
©Bible Society of Kenya, 2019
©Bible Society of Uganda, 2019