Ohubala 33
33
Olukeendo lw'ohutula Misiri ohuchia Moabbu
1Enomanoma yiloondaho yino yibuula ameeta k'ebituundu bi Baisiraeli boombahaangamo ekaambi ohutula nibatula mu Misiri mu nono chaabwe aasi w'obwiimirisi bwa Musa neende Arooni. 2Ohweema huhulagira hw'Omwaami, Musa yaandiikaanga eliita ly'esituundu si boombahaangamo ekaambi bawuluuhirao.
3Abaandu ba Yisiraeli batula mu Misiri hu ludaalo lw'ehumi-na-hataanu olw'omwoosi kwataangira okw'omwaaka, oludaalo lwaloonda hu ludaalo lwa Paasaka yataangira. Nibali aasi w'obuliindi bw'Omwaami, baatula mu siko sihunuufu sya Ramesesi. Abamisiri boosi nibababona, 4nibali ohusihaanga abaana baabwe baamberi ba Omwaami yali niyeetere. Mu huhola sino, Omwaami yanyala ohweekesa ati yali neende obunyala ohuhiraho banasaae ba Misiri.
5Abaandu ba Yisiraeli batula mu Ramesesi mani baachia boombaha ekaambi mu Sukoti. 6Ekaambi yaabwe yiloondaho yali mu Etamu huundulo w'esiparara. 7Ohutula ao, baakobola enyuma boola hu Pi Hahiroti, ebukwe wa Bbaali Sefoni, mani baamala boombaha ekaambi aambi neende Migidooli. 8Beecha baatula mu Pi Hahiroti mani baabita baahalakania Enyaanja ya Ranjaai, mani boola mu siparara sya Suuri; nae luunyuma lw'endaalo chidatu nibahuumba, boombaha ekaambi mu Mara. 9Nibatula ao bachia boola Elimu, haandi yiboombaha ekaambi, olwohuba ao yaliwo esulo ehumi neende chibiri, haandi neende eminaasi amahumi kataanu-na-kibiri.
10Beecha baatula ao mu Elimu, mani bachia boombaha ekaambi aambi neende Omusoma kwa Suesi. 11Haandi ekaambi yaabwe yaloonda hw'eyo yali mu siparara sya Siini. 12Haandi boombaha ekaambi yiindi mu Dofuka, 13nae haandi nibatula ao, bachia baata eyiindi mu Alusi. 14Ohuloondaho beema mu Refidiimu, eyali niyibulaho amaachi koosi, ak'ohung'wa.
15Haandi baatula mu Refidiimu, mani bachia boombaha ekaambi mu sichiimi sya Sinai. 16Haandi baatula mu sichiimi sya Sinai, nibamala bachia boombaha ekaambi mu Kibburooti-hatafa. 17Haandi baatula mu Kibburooti-hatafa, mani bachia boombaha ekaambi mu Haserooti. 18Haandi baatula mu Haserooti, mani bachia boombaha ekaambi mu Ritima. 19Haandi baatula mu Ritima, mani bachia boombaha ekaambi mu Rimoni-Pereesi. 20Haandi baatula mu Rimoni-Peresi, mani bachia boombaha ekaambi mu Libbina. 21Haandi baatula mu Libbina, mani bachia boombaha ekaambi mu Risa. 22Haandi baatula mu Risa, mani bachia boombaha ekaambi mu Kehelaata. 23Haandi baatula mu Kehelaata, mani bachia boombaha ekaambi mu Lugulu Seferi. 24Haandi baatula mu Lugulu Seferi, mani bachia boombaha ekaambi mu Harada. 25Haandi baatula mu Harada, mani bachia boombaha ekaambi mu Makiheloti. 26Haandi baatula mu Makiheloti, mani bachia boombaha ekaambi mu Tahati. 27Haandi baatula mu Tahati, mani bachia boombaha ekaambi mu Tera. 28Haandi baatula mu Tera, mani bachia boombaha ekaambi mu Mitika. 29Haandi baatula mu Mitika, mani bachia boombaha ekaambi mu Hasimona. 30Haandi baatula mu Hasimona, mani bachia boombaha ekaambi mu Moserooti. 31Haandi baatula mu Moserooti, mani bachia boombaha ekaambi mu Bbenejakaani. 32Haandi baatula mu Bbenejakaani, mani bachia boombaha ekaambi mu Horihagidagadi. 33Haandi baatula mu Horihagidagadi, mani bachia boombaha ekaambi mu Yotibbata. 34Haandi baatula mu Yotibbata, mani bachia boombaha ekaambi mu Abburona. 35Haandi baatula mu Abburona, bachia boombaha ekaambi mu Esionigebberi. 36Haandi baatula mu Esionigebberi, mani bachia boombaha ekaambi mu sichiimi sya Siini (yaani mbwe, Kadesi). 37Haandi baatula mu Kadesi, bachia boombaha ekaambi mu Lugulu Hoori, huundulo w'eloba lya Edomu.
38 #
Hub 20:22-28; Amal 10:6; 32:50. Mani ohweema huhulagira hw'Omwaami, Arooni omulaamisi yaachia yaniina hu Lugulu Hoori, mani yafwiirayo, 39hu mwaaka kwae kw'emia ndala neende amahumi kabiri neende kidatu (123), hu ludaalo lutaangira olw'omwoosi kwa hataanu okw'omwaaka kw'amahumi kane ohutula Abaisiraeli nibatula mu Misiri.
40 #
Hub 21:1. Mani Omukanani, omutuki Aradi, owali niyamenya mu Negebbu mu loba lya Kanani, yaawulira hu hwiicha hw'abaandu ba Yisiraeli.
41Haandi baatula mu Lugulu Hoori, mani bachia boombaha ekaambi mu Salimona. 42Haandi baatula mu Salimona, mani bachia boombaha ekaambi mu Punoni. 43Haandi baatula mu Punoni, mani bachia boombaha ekaambi mu Obboti. 44Haandi baatula mu Obboti, mani bachia boombaha ekaambi mu Abbariimu mu bwaami bwa Moabbu. 45Baatula mu Yiyimu, mani bachia boombaha ekaambi mu Dibbonigaadi. 46Haandi baatula mu Dibbonigaadi, mani baachia boombaha ekaambi mu Alumoni-dibbulataimu. 47Haandi baatula mu Alumoni-dibbulataimu, bachia boombaha ekaambi muungulu cha Abbariimu, notoola mu Nebbo. 48Haandi baatula muungulu cha Abbariimu, bachia boombaha ekaambi mu syaalo syakwalaala sya Moabbu aambi neende Yorodaani mu Yeriko; 49boombaha ekaambi aambi neende Yorodaani ohutula mu Bbetiyesimooti nooli aambi ohwoola mu Abbelisitiimu mu syaalo syakwalaala sya Moabbu.
Ebilagiiriro byaliwo nibataambuha Yorodaani
50Mu syaalo syakwalaala sya Moabbu engereha wa Yorodaani ohutula mu Yeriko, Omwaami yaaberesa Musa 51amakerako ka Yisiraeli kaloondaho kano kati: “Nimwaambuha Yorodaani nimwiingira mu syaalo sya Kanani, 52muhoyere ohwiirusa mwaamalamo abaandu basimenyamo boosi. Sihirise amakina kaabwe koosi, neende ebiloongaloongwe by'echuma byaabwe byoosi, haandi ebituundu byaabwe by'ohwiinamiraangamo byoosi. 53Mwoombahe mu syaalo omwo mani mumenyemo, olwohuba ese niise oli ohusibaberesaanga. 54#Hub 26:54-56.Kabaniemo esyaalo esyo ohweema hu njia cheeng'we neende enono cheeng'we nimwehoonyera ohuubbaannga eha, nimuberesaanga eloba hoongo enono hoongo, nae ediidi enono ndiidi. 55Nae nimutanyala ohwiirusamo abamenyamo, abo boosi abachia ohudoong'amo bachia ohudoong'a nibali abebidinyu muno koti otuwaawa mu moni cheeng'we haandi koti amawa muumbafu weeng'we, haandi baba bachia ohubalwanianga sa. 56Nimutabeerusa bawaamo, ese omweene njia ohubasihirisa, koti sa lu ndali nindatekeha ohusihirisa abeene abo.”
©Bible Society of Kenya, 2019
©Bible Society of Uganda, 2019