Ohubala 20
20
Ebiindu byeeholehanira Kadesi
(Hut 17:1-7)
1Mu mwoosi kwataangira, omukaanda kwoosi okwa Yisiraeli boola hu sichiimi sya Siini mani niboombaha ekaambi mu Kadesi. Ao niwo yi Miriamu yafwiira mani yasiihwa.
2 #
Hut 17:1-7. Abuundu yiboombaha ekaambi, yabulao amaachi, mani abaandu bebuusa hu Musa neende Arooni 3mani nibachaaka ohwekanyiirisa bati: “Syahabeere esihiramo obulai, huba mbwe fwesi hwafwiira mu moni w'Eyeema alala neende Abaisiraeli baasyeefwe. 4Lwasiina mwatutusa mwaatuleeta mu sichiimi sino? Mbwe hu efwe hunyale ohufwiira sa ano alala neende ebyaayo byeefwe? 5Lwasiina eng'we mwatutusa mu Misiri ohutuleeta abuundu alalihirifu yakiire ano ati, yi siindu syoosi sitahanyala ohumera syaahula? Yibulao emere yoosi, emisabbiibbu kyosi kibulao, kata enduli chosi chibulao, naamulwa kyosi kibulao. Kata kabulao amaachi kohung'wa daawe” 6Musa neende Arooni nabo batula hu baandu abo mani baachia beemeraho eyale nabo, ena mulyaango kw'Eyeema. Niboola ao baguunama aasi obweeni bwaabwe hu buloba, mani obulafu bumesamesa bw'Ohubaao hw'Omwaami nihwiicha nihubabonehera.
7Omwaami yaboolera Musa ati, 8“Bukula olusaala luli mu moni w'Esanduuku ly'Endagaano, mani ewe neende Arooni mumale muchie mwiihase abaandu boosi. Mani ebweene eyo, mu moni waabwe boosi, lomalomera olwaanda luli eyo lula, amaachi kachia ohutuunduha kalutulemo. Mani mu ngira yino, nimwo mu ochia ohubitira onyale ohutusira abaandu amaachi mu lwaanda olwo, abeene bang'we, haandi ebyaayo byaabwe byosi bing'we.” 9Musa yabukula olusaala olwo, koti sa Omwaami yali n'alagiire.
10Ye neende Arooni, bachia beehasa abaandu abo boosi, mu moni w'olwaanda olwo, mani Musa yaboola ati, “Tekeerese, ba nandaulira eng'we! Mubaasa muti efwe huhoyera ohunyala ohubafunira amaachi ohutula mu lwaanda luno?” 11Mani Musa yasiingisa olusaala olwo, yaaluhuya hu olwaanda olwo amahabi kabiri, mani omwaalo muhoongo muno okw'amaachi, nikuchaaka ohuhulukusa nikutulira omwo, mani abaandu boosi, neende ebyaayo byoosi nibing'wa.
12Nae Omwaami yasoolania Musa neende Arooni. Yaboola ati, “Olwohuba eng'we haba simubeere neende efukiirira yimala ohusiima obunyala bwaange bwoolerefu mu moni w'abaandu ba Yisiraeli, haba simuchia ohubeemirira ohubeengisa mu syaalo si ndasuubisa ohubaberesa.”
13Sino syaholehanira mu Meribba, yi Abaisiraeli bekanyiirisira Omwaami, haandi yi mweene yabeekesera ati ni omwoolerefu niye.
Omutuki w'Edomu akayira Abaisiraeli ohubita
14Musa yatuma bawamwaanda ohutula mu Kadesi bachie eyiri omutuki wa Edomu. Bachia baboola bati, “Ehuwa lino litula hu b'enono yao, enyuumba ya Yisiraeli. Omanyiire elalira ebidinyu bi hwahanyoola, 15koti bakuuka yeefwe bachia mu Misiri, yihwamenya emyaaka emiingi muno. Abamisiri basaandya muno bakuuka yeefwe, alala neende efwe beene, 16mani hwaalirira Omwaami weefwe atuhoonye. Yawulira ohulira hweefwe, Mani yaatuma malaika, owatwiimirira yaatutusa mu Misiri. Esiha sino, mbano huli ano mu Kadesi, esiko siri hu lwaaho lw'obwaami bwao. 17Tuleheremo otufukiirire ohubita huhalakanie mu syaalo syao. Efwe abeene, kata neende ebyaayo byeefwe, haba sihuchia ohutulaho hu ngira huchieho mu mikuunda kyao oba mu misabbiibbu kyao, haandi haba sihuchia ohung'waaho mu sulo chao daawe. Huchia ohuhayira sa hu ngira ya nahuluungu yoong'ene ohwoola lu hulitula mu bwaami bwao.”
18Nae Abaedomu bakobolamo bati, “Efwe sihubafukiirira ohuhalakania esyaalo syeefwe daawe! Mani nimuteemaho, huchia ohutulaniramo ohubaseeta.”
19Nae abaandu ba Yisiraeli baboola bati, “Efwe huchia ohuhayira sa hu ngira ya naahuluungu yoong'ene, mani kata efwe abeene, oba ebisolo byeefwe nihung'waaho hu maachi keeng'we, huba huchia ohukatuungira si hudaha syoong'ene mani huhalakaniemo sa.”
20Abaedomu haandi baloondamo bati, “Efwe sihufukiira daawe!” mani nibatulaniramo neende eye ly'amaani muno ohuseeta abaandu ba Yisiraeli. 21Mani olwohuba mbwe Abaedomu sibafukiirira Abaisiraeli ohuhalakania mu bwaami bwaabwe, Abaisiraeli baheengao ohukaluuhana ohubitira hu ngira yiindi.
Ohufwa hw'Arooni
22Omukaanda kwa Yisiraeli kwoosi kwatula mu Kadesi, mani kwaakeenda kwoola hu Lugulu lwa Hoori, 23hu lwaaho lwa Edomu. Abweene ao, Omwaami yaboolera Musa neende Arooni ati, 24“Arooni wuno haba saacha ohunyala ohwiingira mu syaalo si ndasuubisa ohuberesa Yisiraeli; achia ohufwa, olwohuba eng'we mweembi, mwahaya esilagiro syaange mu Meribba. 25Bukula Arooni neende Eliasaari omwaana wae obaniinie hu Lugulu Hoori, 26mani niwoola ebweene eyo, weemeo ofwaalule Arooni ebifwaalo byae by'obulaamisi obifwaale Eliasaari. Mani Arooni aba achia ohufwiira abweene ao sa.” 27Musa yaahola koti lu Omwaami yali n'alagiire. Bachia baniina hu Lugulu Hoori mu moni w'omukaanda kw'abaandu boosi, 28#Hut 29:29; Hub 33:38; Amal 10:6.mani Musa naamufwaalula engubo ch'obulaamisi, naamala naachifwaasa Eliasaari. Mani ebweene eyo hu lugulu ohwo nihwo hu Arooni yafwiira sa, mani Musa neende Eliasaari nibamala nibeeha nibakobola. 29Omukaanda kw'abaandu okwo kwoosi kweecha kwaamanya kuti hane Arooni amalire ohufwa, mani bosi baamulira endaalo amahumi kadatu amalaamba.
©Bible Society of Kenya, 2019
©Bible Society of Uganda, 2019