Ohubala 10
10
Eturumbete ch'Efeesa
1Omwaami yaboolera Musa ati, 2“Hola eturumbete chibiri ohutula mu feesa nyuhuule ohwehoonyerwaanga mu hulaanga abaandu bebuuse alala, haandi neende hulw'ohusakulaanga ekaambi. 3Ekono leeyi nilyuubba hu turumbete choombi, abaandu boosi baba bahoyere ohwebuusira yooli hu mulyaangiro kwiingira mu Yeema ly'Ohubaao hwaange. 4Nae eturumbete ndala niyihubba yoong'ene sa, mani abeemirisi b'enono boong'ene nibo ababa bahoyere ohwebuusira yooli. 5Nae amakono meembikiti nikaba niko akali ohuubbwa, enono chamenya ebukwe nichio echiba chichia ohutulayo. 6Nae haandi amakono meembikiti nikoobbwa ehabi lya habiri, enono ch'emwaalo nichio echiba nichicha ohutulayo. Mani amakono meembikiti niko akahoyeere ohuubbwaanga ohusakuula ekaambi, 7nae ohweenya ohulaanga abaandu boosi bebuuse alala, amakono maleeyi niko akahoyeere ohuubbwa. 8Eturumbete chino chihoyeerwe ohuubbwaanga neende abasyaani b'Arooni boong'ene, abalaamisi.
“Elako liloondaho lino lihoyere ohuloondwaanga endaalo choosi chiri mu moni. 9Nimuba nimuli ohulwaana ebiita mu syaalo syeeng'we, nimuli ohwehiingaanga ohutula neende omusuku weeng'we oba naabaseetere, yubbeenge ahalolero heekesa ebiita nimwehoonyera eturumbete chino. Ese Omwaami Nasaae weeng'we, mba njia ohubahoonyaanga mbaonia ohutula hu basuku beeng'we. 10Haandi mu biha by'esangaalo koti esiha sy'Esidyaalo sy'Omwoosi Muyaaha haandi neende hu bidyaalo by'ediini biindi muhoyere ohuubbaanga eturumbete chino nimuli ohuyaana ebiyaanwa bisaambwa byaakwa ekohe, haandi neende hu huyaana ebiyaanwa by'ohuholegana. Mani mba njia ohubahoonyaanga. Ese niise Omwaami Nasaae weeng'we.”
Abaisiraeli bawuuyisa ekaambi
11Hu ludaalo lw'amahumi kabiri, mu mwoosi kwa habiri, mu mwaaka kwa habiri, abaandu nibali nibamalire ohutula mu Misiri, esireesi syalichiingi aakulu w'Eyeema ly'Ohubaao hw'Omwaami syeecha syaatulayo, 12mani Abaisiraeli bachaaka olukeendo lwaabwe ohutula mu sichiimi sya Sinai. Esireesi esyo syeecha syabeengaanga ohwoola lu syoola mu siparara sya Parani.
13Bachaaka ohuhuumbaanga nibaloondakirira esilagiro sy'Omwaami ohubitira mu Musa, 14mani buli siha si bakeendaanga, balichiingi sa mu hola yifwaanana. Abo abalichiingi aasi w'ebbeendera y'omukaanda kwali nikwiimirirwa neende enono ya Yuda, nibo abataangira ohuchaaka olukeendo, mu buli mikaanda, neende Nahasoni omwaana w'Aminadabbu n'ahulira. 15Netaneeli omwaana wa Suari yali naahulira enono ya Yisakari, 16nae Eliabbu omwaana wa Heloni naali ohuhulira enono ya Sebbuluuni.
17Ao bulaanu niwo yi Yeema lyooleraanga lyosi ohukiingwa, mani enono cha Gerisoni neende Merari, abali nibo abalikiingire, boosi booleraanga ohuchaaka olukeendo.
18Ohuloondaho, bali abo abali aasi w'ebbeendera y'omukaanda kwahulirwa neende enono ya Rubbeeni kwoosi kwoola ohuchaaka olukeendo, mu buli mikaanda, neende Elisuuri omwaana wa Sedewuri n'akuhuliire. 19Selumieli omwaana wa Surisadai niye owali n'ahuliire enono ya Simeoni, 20neende Eliasafu omwaana wa Dewela owali n'ahuliire enono ya Gaadi.
21Bulaanu hu nono ya Kohati yitulana hu nono ya Leefi yosi yihoyera ohuchaakaanga olukeendo, niyikiingire ebiindu byoolerefu. Mu siha sibooleraanga mu kaambi yiloondaho, Eyeema lyalichiingi nga limalire ohwoombahwa haandi.
22Oludaalo lwaloondaho, abo abali aasi w'ebbeendera y'omukaanda kweemirirwa neende enono ya Efuraimu bosi bachaakaanga olukeendo, mu mikaanda, neende Elisaama omwaana w'Amihudi, naabeemiriire. 23Gamalieli omwaana wa Pedasuuri yali naahulira enono ya Manaase 24nae Abbidaani omwaana wa Gideoni yali naahulira enono ya Bbenjamini.
25Muhumaliiriha, abo abali aasi w'ebbeendera y'Omukaanda kwali nikwiimiriirwe neende enono ya Daani, okwali nikuhola koti okuliinda enyuma bweene w'emikaanda kyoosi, hu kwosi kwoola ohuchaaka olukeendo, mu mikaanda, neende Ahieseeri omwaana wa Amisaada naakuhuliire. 26Pagieli omwaana wa Ochirani yali n'ahulira enono ya Aseri, 27nae Ahira omwaana wa Enani naahulira enono ya Nafutaali. 28Yino mani niyo eyali endekeha y'ohuhuumba, mu mikaanda, buli lu Baisiraeli basakuulaanga ekaambi, mani bachaaka olukeendo ohuwuuya.
29Musa yaboolera muhweeng'ene, Hobbabbu omwaana wa Reweli Omumidia ati, “Huli aambi ohuchaaka olukeendo ohuchia abuundu yi Omwaami yaboola ati achia ohutuberesa. Yasuubisa ohuhola Yisiraeli yi yiindiyale, mani yicha huchie naawe, mani hu hukabaneho naawe obuyiinda bweefwe obwo.”
30Hobbabbu nae yakobolamo ati, “Haba, ese ngobola engo eyiri eloba lyeefwe liibulanwa.”
31Musa yaboola ati, “noojama otatuleha.” “Omanyire yi hunyala hw'ombaha ekaambi mu sichiimi, mani onyala weecha waatweekesa. 32N'okanya ohwiicha hwaachia naawe, huba huchia ohukabana naawe ehabi choosi chi Omwaami achia ohutuberesaanga.”
Abaandu bachaaka olukeendo
33Mani abaandu nibatula Sinai, olugulu lwoolerefu olwo, bakeenda ohumala endaalo chidatu enaamba. Esanduuku ly'Endagaano lyabataangiriraanga sa mu moni ohunyoola obweyaango bu banyala ohwoombahamo ekaambi. 34Mani koti lu batulaanga mu buli kaambi, esireesi sy'Omwaami esyo, syababechaangaho sa aakulu esideete syoosi.
35 #
Sab 68:1. Buli lu Sanduuku ly'Endagaano lyachaakaanga olukeendo, Musa yaboolaaga ati, Siingira, Omwaami; sakuula abasuku bao mani odumuule abo abahusyuula. 36Haandi buli lu lyemaanga, yaboolaanga ati, Kobola, Omwaami, eyiri amadaala elifu neende elifu aka Yisiraeli.
©Bible Society of Kenya, 2019
©Bible Society of Uganda, 2019