Nahumu 2
2
Ohuwaambwa hwa Ninefe
1Ewe Ninefe, oseeterwe!
Amaani kachia ohuhusakuula keechere.
Tekehe obuliindi!
Liinde engira!
Mwetekehere ebiita!
2(Omwaami ali aambi bweene ohukobosao oluyaali lwa Yisiraeli, lube koti lu lwalichiingi hale abasuku bae ni bataamudubakira.)
3Abanamaye basuku bakiingire engabo cha ranjaayi
haandi befwaalire engubo chifwaanana echa ranjaayi.
Bali ohweetekeha ohuseeta!
Ebigaari byaabwe bimyeesuha koti omuliro!
Efaraasi chaabwe chiyobere!
4Ebigaari biri ohweyuula koti ebilaluuhe hu makira,
nibyeyuula nibikobola haandi nibichia mu moni mu sipaapi sy'esiko.
Biri ohumyeesuha koti etoochi
nibiduumaduuma buli abuundu koti emesu.
5Abahoongo balaalihwa;
beegumula nibeecha nibayiindikana.
Abaseeti beeyula hu bida
nibateka engabo ch'ohulwaanira.
6Ebiruwa byohu mwaalo byeyikula sa ebyeene;
edooho lichuule oluteengo.
7Omutuki muhasi apeeywa sa;
abahalaabani bae balira koti amaguugu
nibeehuya embeere mu sibeera.
8Koti amaachi kafuduule ediba
abaandu bayiindikana nibatula mu Ninefe!
Amaliro keecha kati, “Lehe! Lehe!”
Nae abulao oyo yeesi okaluuhana yakobolayo.
9Yaaye efeesa!
Yaaye esaabbu!
Esiko syeechulamo obuyiinda!
10Ninefe sisihiriiswe, sijwaang'irwe, siyuumbire!
Emyooyo kifwiire obuti;
amahuumbo kateengereha, amaani kaweere;
obweeni bufwiiririire.
11Bulaanu esilaangwa esiko siri yeena,
esyalichiingi koti esidwooli sy'edalang'i,
abuundu yaliisiraangwamo edalang'i njere,
abuundu yi dalang'i saacha neende ehasi byachichaanga
mani abaana bachio baba mu muleembe?
12Edalang'i yiitire esyohulya syayo
yaasidonyadonyamo mu bituundu eyaasye neende abaana bayo banyale ohulya bulai;
yeechusa esidwooli syayo neende ebikusu by'enyama.
13Omwaami w'Obunyala bwoosi aboola ati, “Ese bulaanu ndi omusuku wao! Ese njia ohusaamba ebigaari byao byoosi biwe. Abanamaye bao bachia ohwiitirwa mu biita, mani male mbukule buli siindu si wali ni watusa hu baandu baandi. Obwekoombi bw'abakali bao haba sibucha ohutekeereswaho haandi.”
Currently Selected:
Nahumu 2: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
