Mariko 7

Enjekesa ya bakuuka

(Mat 15:1-9)

1Nae bulaanu, Abafarisaayo bebuusira ali Yesu, alala neende abeekesa b'Amalako baandi abali nibatulire Yerusalemu, 2babona bati, abeeki ba Yesu baandi balichaanga nibatesaabire amahono, esyeekesa siti, haba sibesaabaanga amahono koti lu sihoyere. 3(Olwohuba Abafarisaayo, neende Abayudaaya boosi, sibalya nibatesaabire amahono kaabwe #7:3 nibateesaabire amahono Ano aliwo emboosi ndala eyomu Lugiriki eyitaamanyihane nae haandi haba sibayitafuta ohweema hu muduunga kwali kwa bakuuka yaabwe; 4nae haandi nibakaluha ango nibatula mu siito, sibalya esiindu syoosi si baba nibeechere nasyo nibataasilabiisye mberi #7:4 nibataasilabiisye: Ebyandiiko bihuluundu bihale biindi bisoma biti, ‘nibateelabiisye emibiri kyaabwe abeene mberi.’ haandi aliwo emiduunga kiindi emiingi muno kibahoyerwanga ohwooseresa koti, okw'ohwoosa ebikoombe neende esyoongo alala neende ebiindu byehoonyerwa byoosi ebyaholwa mu sibya sy'omugasa.#7:4 Ebyandiiko bihuluundu bihale biindi bimeedaho biti, “alala neende obuliri.”) 5Abafarisaayo alala neende abaandiiki b'Amalako bateeba Yesu bati, “Lwasiina abeeki bao haba sibaloondakana #7:5 sibaloondakana: Mu Lugiriki bati ‘sibakeendera.’ neende emiduunga kya bakuuka yeefwe, nae balya sa neende amahono mamali?” 6#Yis 29:13. Nae Yesu yababoolera ati, “Bwadyeeri omunabbi Yisaaya yadeeka yaalomaloma hu eng'we abeebachirisi koti lu syandiikwa siti,

‘Abaandu bano baanjisamo oluyaali neende emboosi choong'ene,

nae emyooyo kyaabwe kiri eyale naange;

7ohuunyinamira hwaabwe hubulamo amahuluundu,’

‘beekesa koti amalako ebiindu bi baandu bataao sa.’ 8Eng'we muleha Elako lya Nasaae, nimwoomiirira hu miduunga ky'abaandu sa.”

9Haandi Yesu yababoolera ati, “Eng'we muli neende amakesi muno akohunyoola engira ndai y'ohuta ebuleka Elako lya Nasaae, hu mweemeo munyale ohwooseresa emiduunga cheeng'we! 10#Hut 20:12; Amal 5:16; Hut 21:17; Lef 20:9. Olwohuba Musa yaboola ati, ‘Yisaanga oluyaali mu lataao neende maakoo’; haandi ati, ‘Oyo yeesi olomaloma bubi hu laatang'ene kata ng'ina, mubwadyeeri bweene ahoyera ohufwa’; 11naang'we muboola muti omuundu n'aboolera laatang'ene kata ng'ina ati, ‘Esyo si mbeere njia ohuhuberesa bulaanu siri Kobbani,’ (esyo nisyo esiyaanwa sibereeswe Nasaae) #7:11 Obaesiyaanwa 12ao bulaanu simuba mumukanya ohuholeraho laatang'ene kata ng'ina, esiindu syoosi, 13ao niwo yimunyaasiraanga elalira emboosi ya Nasaae nimwehoonyera emiduunga kyeeng'we ekyo kimuchiiririra nimweekesa abaana beeng'we. Haandi muhola ebiindu biingi biindi koti ebyo bityo.”

Ebiindu bibaha omuundu omukwoobo

(Mat 15:10-20)

14Yesu haandi yalaanga abaandu beecha yaali, mani yababoolera ati, “Eng'we mweesi mutekeerese bulai bi mboola bino, haandi mumanye muti: 15abulao esiindu syoosi esiingira mu muundu nisitula erwaanyi wae esinyala ohumubaha omukwoobo; ohutusaho ebyo ebitula mu muundu nibyo ebimubaha omukwoobo.” 16Leha oyo oli neende amatwi kawulira, awulire. #7:16 Leha oyo oli neende amatwi kawulira, awulire: Ebyandiiko biindi bibulamo olunyiriri luno. 17Nae abaandu nibaba nibamalire ohuwaao, Yesu yeengira mu nyuumba, mani abeeki bae nibamuteeba amahuluundu k'olukaado olwo. 18Nae yababoolera ati, “Hane mbao mwesi musisiiri ohumanya. Haba simubona muti buli siindu syoosi esiingira mu muundu ohutula erwaanyi wae sisinyala ohumubaha omukwoobo, 19olwohuba nisiingira, haba sisichia mu mwooyo, nae sichia mu nda yae mani syaabitamo sa?” #7:19 Oba “syasukunwa esibakala” (Ao Yesu yeekesa ati, ebyohulya byoosi bilai.) 20Niyemeeda ohuboola ati, “Esiindu situla mu muundu nisyo esimubaha omukwoobo. 21Olwohuba, ebiindu bitula mu muundu, biba bitula mu mwooyo kwae, omwo nimwo omutula ebibaaso bibi, obuyirani, obwiibi, obutemo, obucheke, 22obwekoombi bubi, obusuku, obubacha, obusereri bubi, ehiinda, obumoonyi, esuunga, neende esibboli. 23Ebibi bino byoosi, bitula mu muundu, mani nibyo ebimubaha omukwoobo.”

Efukiirira y'omuhasi

(Mat 15:21-28)

24Niyamala atyo, yasiingira yawaao yaachia mu syaalo sya Tiiro neende Sidoni. #7:24 neende Sidoni: Ebyandiiko bihuluundu biindi bihale bileha ‘neende Sidoni.’ Yeengira mu nyuumba, naatakanyaho omuundu yeesi amanye; nae kata katyo, haba siyanyalaho ohweekisa. 25Abweene ao, omuhasi wuundi yi mwaana wae muhaana yaliho esihyeeno, niyawulira ati Yesu aliwo, yeecha yaakwa aasi mu makulu kae. 26Omuhasi chana oyo yali Omugiriki, omwiibulanwa wa Foenisia ohutula Siria. Mani yasaba Yesu yeeruse omusaambwa okwomu mwaana wae oyo. 27Yesu yaboolera omuhasi oyo ati, “Leha mberi huliise abaana, olwohuba sisilai ohubukula ebyohulya by'abaana mani waabisukunira embwa.” 28Nae omuhasi oyo yamukobolamo ati, “Eee, Omuhuluundu; kata katyo, embwa chiri aasi w'emeesa chosi chilichaangaho kata hu bidonye-donye by'ebyaahulya bi baana balya balehaho.” 29Nae Yesu yamuboolera ati, “Ohweema hu nomanoma yao eyo, onyala weweraao; omusaambwa kumalire ohutula hu mwaana wao oyo.” 30Omuhasi oyo yawaao yaakobola engo, yanyoola omwaana wae oyo niyeyaliise hu sitaanda, omusaambwa nikumalire ohumutulaho.

Yesu awonia omudiimbe otanyala ohulomaloma.

31Yesu niyakobola ohutula mu syaalo sya Tiiro, yabitira hu ngira ya Sidoni, eyomu syaalo sy'ebiko ehumi (Dekapooli), naachia hu nyaanja ya Galilaaya. 32Mani nibamuleetera omusaacha wuundi owali omudiimbe haandi otanyala ohulomaloma; mani baasaba Yesu amwiiseho omuhono kwae. 33Nae Yesu yamuyira endulo yi baandu bataali, yaata enjala chae mu matwi k'omusaacha oyo, haandi yafuucha amate, yaamudiira hu lulimi; 34niyamala atyo yatingaala Muukulu, yeesa omwooyo mani yaamuboolera ati, “Efufaata,” esyeekesa mbwe, “Yikuha.” 35Mani amatwi kae nikeekuha, olulimi lwae lwaboololoha, yaanyala ohulomaloma bilai byeene. 36Yesu yabalagira ati batabooleraho omuundu yeesi; nae koti lu yachiiririraanga ohubalagira, nilwo lwosi lu baandu bachiririraanga ohusilomalomaho neende obwomiifu bwoosi. 37Abaandu besiinduha ohubitiirira, nibaboola bati, “Wuno mbano aholere ebiindu byoosi bilai byeene; ahola kata abadiimbe bosi nibawulira haandi abasiruwala bosi nibalomaloma.”

Currently Selected:

Mariko 7: SAMIA

Highlight

Copy

Compare