Mariko 15

Yesu ayirwa eyiri Pilato

(Mat 27:1-2,11-14; Luk 23:1-5; Yow 18:28-38)

1Mani nibwahya buti, abalaamisi bahuluundu, neende abahuluundu b'oluyia neende abaandiiki b'Amalako, neende ab'esiina boosi beehasa oluhiiho lw'ohweteebanaho; mani baaboya Yesu, baamutusa ao baamuyira ohumudiisa Pilato. 2Nae Pilato yateeba Yesu ati, “Ewe niiwe omutuki w'Abayudaaya?” Nae Yesu yamukobolamo ati, “Mbao niiwe oboolere otyo.” 3Mani abalaamisi bahuluundu bamufwaambia ebiindu ebiingi muno. 4Pilato haandi yateeba Yesu ati, “Ewe obulaho esiindu syoosi esy'ohukobolamo? Bonaho obuungi bw'emisaango ki bahufwaambia.” 5Nae Yesu haba siyakobolamo esiindu syoosi, mani sino syakera Pilato yaawuka muno.

Yesu aheengerwa omusaango kw'ohufwa

(Mat 27:15-26; Luk 23:13-25; Yow 18:39—19:16)

6Bulaanu hu buli sidyaalo sya Paasaka, Pilato yali yanala ohulehuuliraanga abaandu omuboye yeesi yi baba nibamusabire. 7Nae hu baboye bali mu jeela, abali bahola omusaango kw'obutemo mu huhola esiisi, mwalimo omusaacha wuundi olaangwa, Bbarabba. 8Mani esidiiyiha syeecha eyiri Pilato ohumusaba abaholere koti luyali yanala ohubaholeraanga. 9Nae Pilato yabateeba ati, “Mudaha mbalehuulire Omutuki w'Abayudaaya?” 10Olwohuba Pilato yali amanyire ati, ehali-hali ly'abalaamisi bahuluundu nilyo elyakera bamudiisa Yesu. 11Nae abalaamisi bahuluundu, badoondobania esidiiyiha sy'abaandu sisabe Pilato amaye akabalehuulira Bbarabba sa. 12Nae Pilato haandi yabateeba ati, “Nae ndaahole endye omusaacha wuno yimulaanga muti Omutuki w'Abayudaaya?” 13Nae abaandu boosi bahuumulira aakulu bati, “Mubaambe!” 14Nae Pilato yababoolera ati, “Lwasiina, sibi siina sy'aholere?” Nae bemeeda sa ohuhuumula nibaboola bati, “Mubaambe!” 15Nae ohudaha ohubasaangaasa, Pilato yabalehuulira Bbarabba; nae nibamala ohutoocha Yesu, Pilato yabadiisa Yesu bachie bamubaambe.

Abasikaari badyaabuhira Yesu

(Mat 27:27-31; Yow 19:2-3)

16Abasikaari bayira Yesu mu lwaanyi lwomuukati olw'edooho (olulaangwa siti Puraitoria); balaanga omukaanda kw'Abasikaari kwoosi ohwebuusa alala. 17Bamufwaasa Yesu ekaanju lifwaana papo, mani nibasiinga engata y'amawa, nibamufwaasa hu mutwe koti ekofia y'obutuki. 18Bachaakaanga ohumuheesa nibaboola bati, “Yoga, Omutuki w'Abayudaaya!” 19Bamuhuya hu mutwe neende ekada, baamufuchaho amate, baasigama mani nibamwiinamira. 20Nae nibamala ohumujaara, bamufwaalulamo ekaanju lya papo, mani baamufwaasa engubo cheene. Mani baamuyira erwaanyi ohumujaara.

Yesu abaambwa hu musalabba

(Mat 27:32-44; Luk 23:26-43; Yow 19:17-27)

21 # Rom 16:13. Mani babukaanana neende omusaacha wali n'akeenda sa owali atula mu lukoongo luundi, olaangwa Simooni Omusireeni, laatang'ene Alekisaanda neende Rufusi, mani bamuyiika ohukiinga omusalabba kwa Yesu. 22Mani bamuleeta baamwoosa abuundu yi balaanga bati, Gologoota (Amahuluundu kasyo mbwe, Abuundu w'ebyaangaanga). 23Mani baamuberesa efiini yibasasiremo miira; nae yaahaya ohuying'wa. 24#Sab 22:18. Bamubaamba, mani baakabana engubo chae, nibachuubbiraho eha, ohumanya si buli muundu ayira. 25Mani nibamubaamba hu musalabba esaa yohudatu. 26Nae esyandiiko sy'esifune simufwaambya syasoma siti, “Omutuki wa Abayudaaya.” 27#Yis 53:12. Nae abweene ao wosi babaambirao abeebi babiri alala neende Yesu, mulala hu muhono kwae muluungi, owuundi hu muhono kwae mukaada. 28Mani ebyandiiko byeecha byoolerera ebiboola biti, “Yabalirwa alala neende abaholi b'ebyonoono.”#15:28 Mani ebyandiiko byeecha byoolerera ebiboola biti, Yabalirwa alala neende abaholi b'ebyonoono: Ebyandiiko biindi bibulamo olunyiriri luno. 29#Sab 22:7; 109:25; Mrk 14:58; Yow 2:19. Nae abaandu bali nibabitao, bayuuyaanga emitwe nibajaara Yesu nibaboola bati, “Mbao! Ewe owahalikule Enyuumba ya Nasaae haandi wayoombahira mu ndaalo chidatu, 30wewonie omweene, haandi yiha aasi ohutula hu musalabba!” 31Nilwo nasilala lu Balaamisi bahuluundu alala neende Abaandiiki b'Amalako lu bamudyaabuhira baamujaara nibaboola bati, “Yawonia abaandi; nae omweene haba saanyala ohweewonia. 32Leha Kristo, Omutuki w'Abaisiraeli, bulaanu yeehe hu musalabba hubone huhufukiirire.” Kata abo abali babaambirwe nae bosi bamujaara.

Ohufwa hwa Yesu

(Mat 27:45-56; Luk 23:44-49; Yow 19:28-30)

33Nae esaa yohusaasaba niyoola, esiirima syadiira esyaalo syoosi ohwoola esaa y'ohutaanu-na-hane. 34#Sab 22:1. Nae hu saa y'ohutaanu-na-hane, Yesu yalira neende ekono ly'aakulu ati, “Eli, Eli, lama sabbakitaani?” Amahuluundu kabyo mbwe, “Nasaae waange, Nasaae waange, lwasiina wunjwaang'ire?” 35Nae abaandu baandi abali beemere ao, nibawulira batyo, baboola bati, “Bone, mbao alaanga Elija.” 36#Sab 69:21. Mani mulala yeeruha yaabukula esyaangu yaasiiniha mu fiini yahaliha, yaasita hu kada, mani yaamuberesa ohung'wa n'aboola ati, “Muliindeho, leha hubone Elija naneeche yamwaanula hu musalabba.” 37Nae Yesu yahuumulira mu kono ly'aakulu n'alira mani yakwiisa omwooyo. 38#Hut 26:31-33. Nae engubo yomu Nyuumba ya Nasaae yataanduha akati, ohutula aakulu ohwoola aasi. 39Nae omuhoongo mulala w'abasikaari, owali yeemere ao namutingaalire, niyabona ati #15:39 akwiisire omwooyo: Ebyandiiko bihuluundu bihale biindi biboola biti, ‘yali naalirire mani naafwiire.’ akwiisire omwooyo atyo, yaboola ati, “Mubwadyeeri bweene, wuno abeere Omwaana #15:39 Oba mwaana wa Nasaae!”

40 # Luk 8:2,3. Abahasi baandi bosi bali ao nibewuunjiraanga ebiindu ebyo eyale hooho, mwaabo nimwo omwali, Maria Magadalena, neende Maria ng'ina Yakobbo muyere neende Yosefu, neende Salome, 41abali abaloondi bae haandi abamuhalaabaniraanga n'asisiiri Galilaaya; haandi neende abahasi baandi abaangi bosi abeecha nae Yerusalemu.

Ohusiihwa hwa Yesu

(Mat 27:57-61; Luk 23:50-56; Yow 19:38-42)

42Nae obwiire nibweera, koti lwali oludaalo lw'Ohweetekeheramo, luno nilwo oludaalo lutaangirira Sabbaato, 43Yosefu ohutula Arimatea, yi baandu bali nibaberesa oluyaali mu siina, haandi yesi owali n'aliindiriire Obwaami bwa Nasaae, yenyiira yaachia eyiri Pilato yamusaba omubiri kwa Yesu. 44Nae Pilato yesiinduha muno ohuwulira ati, Yesu amalire ohufwa, yalaanga omuhoongo w'abasikaari yamuteeba nibuli obwadyeeri mbwe Yesu amalire ohufwa. #15:44 Yesu amalire ohufwa: Ebyandiiko bihuluundu bihale biindi bisoma biti, ebiha nibyali nibibitire hoo ohutula naafwa. 45Nae omuhoongo w'abasikaari niyaboolera Pilato ati, Yesu amalire ohufwa, yafukiirira Yosefu ohuyira omubiri kwa Yesu. 46Yosefu yakula esuuka lafu, yaanula omubiri kwa Yesu, yakuboya mu suuka lafu elyo, yakuta mu ng'ani yi bali bayabire mu lwaanda; yasiindikisa okukina kuhoongo, yakufuuniha hu ng'ani eyo. 47Maria Magadalena neende Maria ng'ina Yosefu babona bulai yi basiiha Yesu.

Currently Selected:

Mariko 15: SAMIA

Highlight

Copy