Mariko 10

Yesu yeekesa hu hulobana

(Mat 19:1-12; Luk 16:18)

1Yesu yaatula ao, yaachia mu syaalo sya Yudea mani yaambuha omwaalo kwa Yorodaani, haandi esidiiyiha syaamwebodoohaniaho; nae koti lu yali yanala ohuholaanga, yachaaka ohubeekesa haandi.

2Nae Abafarisaayo beecha yaali, bamuteeba nibamuhema bati, “Sifukiirirwa omusaacha ohwiirusa omuhasi wae?” 3Yesu yabakobolamo ati, “Musa yabalagira siina syeene?” 4#Amal 24:1-4; Mat 5:31. Nabo baboola bati, “Musa yafukiirira omusaacha ohwandiika ebbarwa y'ohwiirusa omuhasi, mani yaamwemaliraho elalira.” 5Nae Yesu yababoolera ati, “Musa yabaandiikira atyo ohweema hu bwaangalafu bw'emyooyo kyeeng'we. 6#Huc 1:27; 5:2. Nae ohutula hu huloongwa hw'esyaalo, ‘Nasaae yabaloonga boombi, omusaacha neende omuhasi.’ 7#Huc 2:24. ‘Mani hulw'esifune sino, omusaacha achia ohulehaanga laatang'ene neende ng'ina yambaanisibwe neende omuhasi wae, #10:7 mani yambaanisibwe neende omuhasi wae: Ebyandiiko bihuluundu biindi bihale bileha ‘yaambanisibwe neende omuhasi wae.’ 8mani boombi beehola omubiri mulala. Bulaanu sibaba basisiiri babiri haandi, nae baba bali omubiri mulala.’ 9Sakira, esyo si Nasaae yamala ohwambaania alala, omuundu yeesi atasikabuhanianga.” 10Nae nibali mu nyuumba, abeeki bae haandi bamuteeba ebidiira hu siindu sino. 11#Mat 5:32; 1 Kor 7:10,11. Nae Yesu yababoolera ati, “Oyo yeesi owiirusa omuhasi wae, mani yaadeehya owuundi, aba aholere obucheke; 12haandi omuhasi yesi naaloba wamwe, yamala yadeehera omusaacha wuundi, aba ahola obucheke.”

Yesu aberesa abaana bayere ehabi

(Mat 19:13-15; Luk 18:15-17)

13Abaandu baandi bali nibaletaanga abaana eyiri Yesu abadiireho neende amahono kae, nae abeeki bae baabakayira n'obwaalaba. 14Nae Yesu niyabona atyo, yanyoolera, mani yaababoolera ati, “Mulehe abaana beeche yi ndi, mutabakayira; olwohuba abali koti bano nibo abeene obwaami bwa Nasaae. 15#Mat 18:3. Mbaboolera obwadyeeri bweene endi, oyo yeesi otaakaanira obwaami bwa Nasaae koti omwaana muyere, haba saacha ohubwiingiramo daawe.” 16Mani Yesu yabaakata yaababeresa ehabi, nabeesaho amahono.

Omusaacha muyiinda

(Mat 19:16-30; Luk 18:18-30)

17Mani Yesu niyali hwaatula ohuchaaka olukeendo lwae ati, omusaacha wuundi yeecha yaali niyeeruha mani yaasigama mu moni wae yaamuteeba ati, “Omweekesa mulai ewe, siina syeene si hoyeere ohuhola hu nyemeo nyoole obulamu butaakama?” 18Nae Yesu yamuboolera ati, “Lwasiina wunaanga omulai? Abulao omulai, ohutusaho Nasaae yeeng'ene. 19#Hut 20:13; Amal 5:17; Hut 20:14; Amal 5:18; Hut 20:15; Amal 5:19; Hut 20:16; Amal 5:20; Hut 20:12; Amal 5:16. Omanyire amalako kano: Oteetaanga, Otayiranaanga, Oteebaanga, Otabachiraanga owaasyo, Otabachaanga, Yiisaanga oluyaali mu lataao neende maakoo.” 20Nae omusaacha oyo yamukobolamo ati, “Omweekesa, ako koosi, ndakooseresa ohutula mubuyere bwaange.” 21Yesu niyamwewuunja, yamusiima, mani yamuboolera ati, “Obuliraho esiindu silala siti; chia okuse byooli nabyo, omale obikabe abamanani, ochia ohunyoola obuyiinda Muukulu; mani wiiche, wuunoonde.” 22Nae omusaacha oyo niyawulira atyo, yawaamo amaani, mani yaawaao nasinyiihe muno; olwohuba yali naali neende emyaandu emiingi muno.

23Yesu yeemao yaatingaala abeeki bae, mani yaababoolera ati, “Nga bicha ohudinyira muno abayiinda ohwiingira mu Bwaami bwa Nasaae!” 24Abeeki bae bawuka muno emboosi eyo. Nae Yesu yababoolera haandi ati, “Baana baange, nga sidinyu muno#10:24 Ebyandiiko bihuluundu bihale biindi bemeedaho biti, eyiri abo abeesika obuyiinda ohwiingira mu Bwaami bwa Nasaae.” 25Syaangu muno engamia ohubita mu liina ly'esindaani, ohuhira omuundu muyiinda ohwiingira mu Bwaami bwa Nasaae. 26Haandi bemeeda ohwesiinduha muno,#10:26 Haandi bemeeda ohwesiinduha muno: Ebyandiiko bihuluundu bihale bimeedaho biti, ‘abeene-na-beene.’ mani baaboolera Yesu bati, “Nikali katyo, wiina mweene onyala ohuwonisibwa bulaanu?” 27Yesu yabatingaala, mani yaaboola ati, “Eyiri abaandu sisinyaliha, nae sibiri bityo eyiri Nasaae; olwohuba ebiindu byoosi binyaliha eyiri Nasaae.” 28Nae Petero yamuboolera ati, “Bona, efwe hwaleha ebiindu byoosi mani hwaahuloonda.” 29Yesu yaboola ati, “Mbaboolera obwadyeeri bweene endi, abulao omuundu yeesi owaleha enyuumba, kata bamwanaang'ina, kata bambochoong'ene, kata ng'ina, kata laatang'ene, kata abaana, kata amaloba, hulwaange neende hulw'emboosi ndai, 30otahanyoole amayuumba neende bamwanaang'ina neende bambochoong'ene neende bang'ina neende abaana neende amaloba amahabi emia ndala mu bulamu buno, alala neende ohusaandisibwa, nae mu bulamu bwiicha, achia ohunyoola obulamu butaakama. 31#Mat 20:16; Luk 13:30. Nae abaangi abataangiramo bulaanu, bachia ohumaliirihayo, nae abamaliirihayo bachia ohutaangiramo.”

Yesu alomaloma ehabi lyohudatu hu hufwa hwae

(Mat 20:17-19; Luk 18:31-34)

32Haandi Yesu neende abeeki bae bali nibali hu ngira nibakeenda nibachia Yerusalemu, nae Yesu yali naabeemiriiremo; mani besiinduha muno, neende abo abali nibabaloondaho baatya muno. Yesu yeemao yaakabula abeeki bae ehumi neende babiri yaabasudya endulo, mani yachaaka ohubaboolera ebyo ebyali nibichia ohumweeholaho ati, 33“Bone, mbao huchia Yerusalemu; yi Omwaana w'Omuundu achia ohudiisirwa abalaamisi bahuluundu alala neende abaandiiki b'Amalako, mani bamuheengere omusaango okw'ohufwa, haandi bamudiise Abateende; 34mani bachaake ohumuhomoola, ohumufuuchaho amate, ohumunaala ehoba, neende ohumwiita; nae luunyuma lw'endaalo chidatu, achia ohusyuuha.”

Ohusaba hwa Yakobbo neende Yowaana

(Mat 20:20-28)

35Mani ao, Yakobbo neende Yowaana, abasyaani ba Sebbedaayo, beecha mu moni wa Yesu, mani baamuboolera bati, “Omweekesa, efwe hudaha ofukiirire ohutuholera esyo syoosi si huchia ohuhusaba.” 36Mani Yesu yabateeba ati, “Siina syeene si mudaha ese mbaholere?” 37Nabo bamuboolera bati, “Tufukiirire hwiihale, mulala hu muhono kwao muluungi, nae owuundi hu mukaada, mu bwaami bwao.” 38#Luk 12:50. Nae Yesu yababoolera ati, “Eng'we haba simumanyire si muli ohusaba. Munyala ohung'wa esikoombe sy'esaando si njia ohung'wa, oba ohubatiisibwa mu ngeri nasilala neende yiinjia ohubatiisibirwamo?” 39Nabo bamuboolera bati, “Eee hunyala.” Nae Yesu yababoolera ati, “Esikoombe si njia ohung'wa muchia ohusing'wa; haandi embatiisa yiinjia ohubatiisibirwamo, niyo yi mwesi muchia ohubatiisibirwamo; 40nae ohwiihala hu muhono kwaange muluungi, oba hu mukaada, haba sibunyala bwaange ohubanyalira, nae hu abo ba hwamala ohutekeherwa.” 41Nae ehumi badoong'ereo nibawulira batyo, banyoolerera muno Yakobbo neende Yowaana. 42#Luk 22:25,26. Yesu yeemao yaabalaanga boosi beecha yaali, mani yaababoolera ati, “Eng'we mumanyire muti abaandu bamanyihaane koti batuki b'abateende babeehalaho neende obunyala buungi muno, haandi abeemeresi baabwe bahunuufu babatukira amaani maangi. 43#Mat 23:11; Mrk 9:35; Luk 22:26. Nae haba sisihoyere ohuba sityo mweeng'we daawe; nae oyo odaha ohuba omuhoongo mweeng'we, ahoyere ohuba omuhalaabani weeng'we, 44nae haandi oyo odaha ohuba omweemeresi mweeng'we ahoyere ohuba omutumwa wa boosi. 45Olwohuba Omwaana w'Omuundu yesi haba siyeecha ohuhalaabanirwa, nae yeecha ohuhalaabanira abaandu, haandi neende ohuyaanayo obulamu bwae bube obwohununula abaandu abaangi.”

Yesu awonia omuwofu Bbatimaayo

(Mat 20:29-34; Luk 18:35-43)

46Beemao beecha mu Yeriko; mani haandi koti lu Yesu yali hwatula sa ati mu Yeriko alala neende abeeki bae neende esidiiyiha sihoongo sy'abaandu, baakaana Bbatimaayo owali omuwofu musabirisi, omwaana wa Timaayo, niyehaale hu ndulo w'engira. 47Nae niyawulira ati hane Yesu wa Nasareeti niye owali niyeecha, yachaaka ohwaayulira aakulu n'aboola ati, “Yesu, Omwaana wa Daudi, ngwiire esisa!” 48Nae abaandu baandi bamwaalabira nibamuboolera bati awuleere; nae nga lu bemeedaanga ohumwaalabira bati abuleere, nilwo lu Bbatimaayo yaniinianga ekono lyae niyaayulira aakulu muno ati, “Ewe Omwaana wa Daudi, ngwiire esisa!” 49Yesu yeema mani yaaboola ati, “Mumulaange.” Mani nibalaanga omusaacha muwofu oyo nibamuboolera bati, “Sangaala; siingira, mbao ahulaanga.” 50Mani niyawulira atyo, yasukuna era engubo yae, yaasiingira yeema yeecha eyiri Yesu. 51Nae Yesu yamuteeba ati, “Siina syeene sy'odaha huholere?” Nae omusaacha muwofu oyo yaboolera Yesu ati, “Omwaami, #10:51 Oba Rabbi oba Omweekesa leha mbone haandi.” 52Yesu yamuboolera ati, “Efukiirira yao yihuwoniisye, weweereo.” Mani ao-na-ao, omusaacha oyo yachaakirao ohubona mani yaaloonda Yesu.

Currently Selected:

Mariko 10: SAMIA

Highlight

Copy

Compare