Mika 7
7
Ebiima by'Abaisiraeli binyaasiha
1Chiinjakaanire ese! Olwohuba ndeeholere koti ow'enjala
otakaana esyaamo syoosi hu musaala,
kata esyaaku sidoong'ere hu musabbiibbu,
neende emituli chitaangira ohweenga chi mwooyo kwaange kwekoomba. Sibulaho esiindu syohulya.
2Abulao omuundu mweesikwa mu syaalo,
haandi abulao omuundu muluungifu daawe.
Buli muundu aliinda sa anyooleho ehabi yobwiti.
Buli muundu ayiima owaasye neende omuteego.
3Boosi bamanyihaane mu huhola ebyonoono, mani babihola bulai bweene.
Abatuki neende abakayi b'emisaango badaha ohulya esy'ohukuliirirwa.
Omuundu muhunuufu naababoolera esibi sy'adaha ohuhola;
ni boosi bafukiirisania sa nae.
4Kata abaandu bahiramo obulai, bali koti oluyoongo,
haandi abo abahiramo obuluungifu, bali koti olukaka lw'amawa.
Bulaanu ebiha by'ohubasaandya byoolere,
koti lu banabbi baabwe babalabula;
bulaanu ebiindu bibaheheere.
5Haba muteesikaanga owaasyeeng'we daawe,
mutesikaanga kata omwiicha weeng'we daawe.
Mumanyiriseenge bi mulomaloma
kata ayahaba nimulomaloma hu bahasi beeng'we.
6 #
Mat 10:35,36; Luk 12:53. Olwohuba omwaana musyaani alekeeresa laatang'ene,
haandi muhoomwaana ayiingania masaalang'ene.
Muhoomwaana asoolana neende masalaang'ene.
Abasuku b'omuundu baba abomu nyuumba yae beene.
7Nae ese njia ohutingaalaanga eyiri Omwaami,
njia ohuliindaanga Nasaae omuwonia waange.
Nasaae waange achia ohuumbulira.
Omwaami aleeta obuwonia
8Ewe omusuku waange, otaandehoyeraho daawe;
kata ndahakwa, njia ohusiingira.
Kata ndahaba mu siirima,
Omwaami achia ohuumberesa obulafu.
9Njia ohwesimiirisa etima ly'Omwaami,
olwohuba ndamuholera ebyonoono.
Nae Munjakamo, achia ohunwaanira
haandi yaheengere omusaango.
Yahandeete mu bulafu;
mani njia ohubona obuwonia bwae.
10Ao mani omusuku waange owateebaanga ati:
“Omwaami Nasaae wao ali yeena?”
Yahabone esyo mani esoni chimudiire.
Ndahasangaale nimbona
n'asenakirwa aasi
koti amadosi kohu ngira.
11Ewe Yerusalemu, ebiha by'ohwoombaha esida syao byoolere!
Mu biha ebyo, enjaho chao chahatakalaswe.
12Abaandu bao bahakobole yooli,
nibatula mu Asiria neende mu biko bya Misiri,
ohutula Misiri ohwoola hu Mwaalo kwa Ewufuraate,
ohutula hu nyaanja ohwoola hu nyaaja, haandi ohutula hu ngulu ohwoola hu ngulu.
13Nae esyaalo syaheehole esiparara
hulw'ebiholwa byaabwe bibi
neende olw'abaandu bamenyamo.
Omwaami yahakwiire Yisiraeli esisa
14Omwaami, abaandu bao bawedoolera,
baliinde koti lu mwaayi aliinda ebyaayo byae.
Kata ayahaba mbwe bamenya mu sichiimi boong'ene,
eloba lai lyabeebodoohania.
Leha baliireenge mu Bbasani neende Gileadi
koti mu ndaalo cha hale.
15Njia ohubeekesa eby'amayia
koti lu ndahola nibatula mu syaalo sy'e Misiri.
16Ebyaalo byahabone sino mani esoni chibadiire kata bahaba ab'amaani;
bahediire hu minwa;
haandi baheekale amatwi kaabwe.
17Bahahoombe olufu koti enjuha,
koti ebiindu byohu syaalo byambaaka.
Bahatule yi beekisa nibateengereha,
mwahakere baatya
mani beecha eyiri Omwaami Nasaae weefwe.
18Ewe Omwaami, abulao nasaae wuundi oli koti ewe,
oleheramo abaandu bao abaluwonamo
ebyonoono byaabwe.
Haba sodoong'a n'onyoleere endaalo choosi daawe,
nae osangaalira mu buheeri butaakama.
19Omwaami haandi wahatukwiire esisa.
Wahaseenakire ebyonoono byeefwe
mani waabisukuna byoosi
mu lusiba lw'enyaanja.
20Waheekese obweesikwa bwao
neende obuheeri bwao butaakama eyiri abaandu bao,
abeechuhulu ba Abburahamu neende Yakobbo,
koti lu weechubira bakuuka yeefwe
mu ndaalo cha hale.
Currently Selected:
Mika 7: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
