Matayo 27

Bayira Yesu ewa Pilato

(Mrk 15:1; Luk 23:1,2; Yow 18:28-32)

1Nibwahya mu maherebeende, Abalaamisi bahuluundu boosi, neende Abeemeresi b'abaandu beehala bawuliirisania engira y'ohwiita Yesu; 2mani baamuboya baachia baamudiisa Pilato owali Gafana esiha esyo.

Ohufwa hwa Yuda

(Biho 1:18-19)

3 # Biho 1:18,19. Nae Yuda omuhobi, niyabona ati bamalire ohuheengera Yesu omusaango kw'ohufwa, yefunaka mani yaakobosera abahuluundu b'Abalaamisi neende Abeemirisi b'abaandu, eseende ch'efeesa, ebituundu amahumi kadatu, mani n'aboola ati, 4“Holere esyonoono mu huhoba amabaanga kataaliho omusaango.”

Nabo baboola bati, “Ebyo nibyo siina hweefwe? Ebyo byao omweene!”

5Mani Yuda yaasukuna aasi ebituundu by'efeesa mu Nyuumba ya Nasaae, mani yawaawo yaachia yeemika.

6Nae abahuluundu b'Abalaamisi, babukula ebituundu by'efeesa ebyo, mani baaboola bati, “Sisihoyerwa ohuta eseende chino mu sibiihiro syomu Nyuumba ya Nasaae, olwohuba seende ch'amabaanga nicho.” 7Beecha bawuliirisania, mani baachikulamo eloba hu muloongi w'endamu, ely'ohusiihaangamo Abateende. 8Sakira eloba elyo balilaanga eloba ly'amabaanga ohwoola enyaanga yino.

9 # Sak 11:12,13. Mani, bi munabbi Yeremia yaboola byoolerera biti, “Mani babukula ebituundu by'efeesa amahumi kadatu, obukusi bu baana Baisiraeli baandi bamutaaho, 10mani baacheehoonyera ohukula eloba ly'omuloongi w'endamu koti Omwaami luyaandagira.”

Pilato ateeba Yesu ebiteebo

(Mrk 15:2-5; Luk 23:3-5; Yow 18:33-38)

11Abweene ao, Yesu yeema mu moni wa gafana; mani gafana yaamuteeba ati, “Niiwe omutuki w'Abayudaaya, kose?”

Yesu yamukobolamo ati, “Omweene niiwe owahaboola otyo.” 12Nae Abalaamisi bahuluundu neende Abeemeresi b'abaandu nibali bamwaayirisa, siyabakobolamo esiindu syoosi.

13Mani Pilato yamuboolera ati, “Ewe haba sowuliraho koti bahwayirisa mu biindu biingi bino biti?”

14Nae Yesu siyakobolamo emboosi yoosi kata hu musaango mulala; sino syawukia gafana muno.

Yesu aheengerwa omusaango kw'ohufwa

(Mrk 15:6-15; Luk 23)

15Hu buli sidyaalo sya Paasaka, yalichiingiwo emiduunga kya gafana ohubalehuliraangaho omuboye mulala, yi baandu baba nibasabire. 16Mani mu biha ebyo, bali noomuboye mubi muno olaangwa Bbarabba. #27:16 Bbarabba: Ebyandiiko bihuluundu bihale biindi, bisoma biti, ‘Yesu Bbarabba.’ 17Mani nibaba nibebuusire, Pilato yabateeba ati, “Mudaha mbalehuulire wiina mweene? Bbarabba, Ebyandiiko bihuluundu bihale biindi bisoma biti, Yesu Bbarabba kose Yesu olaangwa Kristo?” 18Olwohuba yali amanyire ati embaliha yaabwe niyo eyakera bamudiisa Yesu. 19Haandi Pilato niyali yehaale hu sisaala sy'ohuheengeraho emisaango, omuhasi wae yeecha yaamutumira emboosi ati, “Otaholaho esiindu syoosi hu muundu otaliho obubi oyo, olwohuba mbeere neende obunyaahani buungi mu silooto musiro sy'olwaleero.”

20Nae Abalaamisi bahuluundu neende Abeemeresi b'abaandu bawooya esidiiyiha sy'abaandu basabe Pilato abalehuulire Bbarabba, nae Yesu anyaasibwe. 21Pilato yababoolera ati, “Wiina mweene hu bano boombi yimudaha mbalehuulire?”

Mani bakobolamo bati, “Bbarabba.”

22Pilato yabateeba ati, “Nae Yesu olaangwa Kristo, muhole endye?” Boosi baboola bati, “Leha abaambwe.”

23Nae Pilato n'abateeba ati, “Aholere sibi siina?”

Nae bemeeda ohuwaasira aakulu nibaboola bati, “Leha abaambwe.”

24 # Amal 21:6-9. Mani Pilato niyabona ati sibimuhoonya ohuchiiririra neende ebiteebo, olwohuba abaandu bali bemeeda sa ohusasakala, yabukula amaachi, yesaaba amahono, abaandu boosi nibabona n'aboola ati, “Mbulaho omusaango kwoosi hu hutula hw'omuundu wuno; Ebyandiiko bihuluundu biindi bisoma biti, amabaanga moolerefu oba amabaanga k'omuundu mwoolerefu wuno abeene mubone esy'ohuhola.” 25Nae abaandu boosi bakobolamo bati, “Leha amabaanga kae kabe hweefwe neende hu baana beefwe!” 26Mani Pilato yamala yaabalehulira Bbarabba. Nae nibamala ohunaala Yesu ehoba, yabadiisa Yesu bachie bamubaambe.

Abasikaari bahoomolera Yesu

(Mrk 15:16-20; Yow 19:2,3)

27Mani Abasikaari ba gafana bayira Yesu mu dooho lya Pilato elilaangwa “Praetoriumu”, mani eye lyoosi lyeecha lyamwebodoohania. 28Mani baamufwaalula engubo chae, baamufwaasa ekaanju lyapapo. 29Mani nibasiinga engata y'amawa nibamufwaasa hu mutwe koti ekofia y'obutuki, mani nibamudiisa omukwaajo mu muhono kwae muluungi. Mani nibasigama mu moni wae, nibamumooholera nibaboola bati “Yiindira, ewe omutuki w'Abayudaaya!” 30Mani bamufuuchaho amate, haandi baabukula ekada bamuhuyira hu mutwe. 31Nibamala ohumuhomoola batyo, baamufwaalulamo ekaanju, baamufwaasa engubo chae cheene, mani baamutusa erwaanyi ohumubaamba.

Yesu abaambwa hu musalabba

(Mrk 15:21-32; Luk 23:26-43; Yow 19:17-27)

32Nibali nibatula erwaanyi, babukaanana neende omusaacha otula Sireeni olaangwa Simooni. Mani baamuyiika ohwedwiiha omusalabba kwa Yesu. 33Nae niboola abuundu alaangwa ati, “Gologoota” (amahuluundu kasyo mbwe, abuundu w'ebyangaanga), 34#Sab 69:21.baberesa Yesu efiini yi basaasiremo ekaha; nae ni yayihoombaho, yahaya ohuying'wa.

35 # Sab 22:18. Nae nibamala ohumubaamba, bakabana engubo chae nibachubbira eha; 36mani beehala ao ohumuliinda. 37Nae aakulu w'omutwe kwae nibataao omusaango kumufwaambya nikusoma kuti, “Wuno niye Yesu, Omutuki w'Abayudaaya.” 38Abweene ao baba babaambiireo abeebi baandi babiri alala neende Yesu, mulala hu muhono muluungi kwa Yesu nae owuundi hu muhono mukaada.

39 # Sab 22:7; 109:25. Mani abaandu ni babitiraangao bayuuyaanga sa emitwe 40#Mat 26:61; Yow 2:19.nibaboola bati, “Ewe owali onyala ohulikula enyuumba ya Nasaae haandi wayoombaha mu ndaalo chidatu, weewonieho omweene! Nooli Omwaana wa Nasaae, bulaanu yiha otuleho hu musalabba okwo hubone.”

41Mu ngeri nasilala eyo niyo yi Balaamisi bahuluundu, neende Abeekesa b'Amalako alala neende Abeemirisi b'abaandu, bamuhomoolaanga, nibaboola bati, 42“Oyo yawonia abaandi, nae omweene haba saanyala ohweewonia. Oyo niye Omutuki w'Abaisiraeli; leha yeeheho hu Musalabba mani humufukiiriremo. 43#Sab 22:8.Yeesika mu Nasaae, leha bulaanu Nasaae amuwonie naaba naamudaha; olwohuba yaboola ati, ‘Niise Omwaana wa Nasaae.’ ”

44Haandi abeebi baba nibabaambirwe alala nae bosi bamuhomoolera mu ngeri nasilala eyo.

Ohufwa hwa Yesu

(Mrk 15:33-41; Luk 23:44-49; Yow 19:28-30)

45Bulaanu ohutula esaa chisaasaba, esiirima syadiira esyaalo syoosi ohwoola esaa chitaanu-na-chine. 46#Sab 22:1.Mani aambi w'esaa chitaanu-na-chine, Yesu yalira neende ekono ly'aakulu ati, “Eli, Eli, lema sabaki-tani?” Amahuluundu keene mbwe, “Nasaae waange, Nasaae waange, lwasiina wunjwaang'ire?”

47Nae abaandi hu baandu bali beemere ao nibawulira esyo, baboola bati, “Omuundu wuno nga mbao ali ohulaanga Elija.” 48#Sab 69:21.Mulala hu baandu abo, yeeruha bwaangu yabukula esyaangu, yaasiiniha mu fiini yahaliha, yaasita hu kada, mani yaamuberesa ati ang'we.

49Nae abaandi baboola bati, “Muliinde huboneho Elija naneeche yaamuwonia.” Ebyandiiko bihuluundu bihale biindi biingisaangamo biti, Haandi omuundu wuundi yabukula efumo yaamufumita mu mbafu, mani amaachi alala neende amabaanga byeediha 50Nae Yesu yalirira mu kono ly'aakulu ehabi liindi, mani yaakwisa omwooyo.

51 # Hut 26:31-33. Nae bone, epasya yomu Nyuumba ya Nasaae, yataanduhamo akati, ohutula aakulu ohwoolera elalira aasi; mani esyaalo syaateengereha, enyaanda chaadihana; 52ebiriindwa byosi byeekuha, haandi emibiri ky'abaandu ba Nasaae baangi abali nibafwa baalamuha. 53Nae nibatula mu ng'ani Yesu naamalire ohusyuuha mu bafu, bachia mu siko syoolerefu, mani baabonehera abaandu baandi.

54Nae omusikaari muhunuufu alala neende abo ba yali nabo nibaliindire Yesu, nibabona ohuteengereha hw'esyaalo, neende ebyo byoosi ebyeeholeha, batya muno baaboola bati, “Mubwadyeeri bweene, wuno abeere Omwaana wa Nasaae!” 55#Luk 8:2,3.Ao wosi waliwo abahasi baangi, nibeemere nibewuunjiraanga eyale. Bano nibo abali baloondere hu Yesu ohutula Galilaaya nibamuhalaabaniraanga; 56mwaabo mwalimo Maria Magidalena, neende Maria ng'ina Yakobbo neende Yosefu, neende ng'ina baana ba Sebbedaayo.

Ohusiihwa hwa Yesu

(Mrk 15:42-47; Luk 23:50-56; Yow 19:38-42)

57Mani obwiire nibweera, omusaacha muyiinda otula Arimatea olaangwa Yosefu yoola; wuno yesi yali omweeki wa Yesu. 58Yosefu yachia eyiri Pilato yaamusaba omubiri kwa Yesu. Mani Pilato yaalagira ati, bamubeerese omubiri kwa Yesu. 59Yosefu yabukula omubiri okwo, yaakuboya mu suuka lafu, 60mani yaakuta mu ng'ani yae njaaha, yi bali babaachire mu lwaanda; mani yaasindikisa okukina kuhoongo yakwiikalira hu ng'ani, yaamala yaawaawo. 61Maria Magidalena, neende Maria wuundi, bali baliwo nibehaale aasi nibewuunjire esiriindwa.

Ohuliinda esiriindwa

62Nibwahya, oludaalo luloondaho hulw'ohwetekehera, Abalaamisi bahuluundu neende Abafarisaayo bebuusira eyiri Pilato, 63#Mat 16:21; 17:23; 20:19; Mrk 8:31; 9:31; 10:33,34; Luk 9:22; 18:31-33.mani baaboola bati, Omwaami, efwe hwiichulisa koti omubacha oyo yaboola n'asisiiri omulamu ati, Oluunyuma lw'endaalo chidatu, njia ohusyuuha haandi. 64Sakira lagira baliinde esiriindwa bulai ohwoola hu ludaalo lwohudatu, ataali ao, abeeki bae banyala ohuchia bamwiibamo, mani biamala baboolera abaandu bati, “Asyuuhire mu bafu, mani obubacha bumaliirihayo buchia ohuba obubi muno ohuhiraho obwataangira.”

65Pilato yababoolera ati, “Eng'we muli neende Abasikaari muyire omusikaari mulala aliinde; muchie mubone muti esiriindwa basiliinda bulai muno koti lu munyala.” 66Mani bachia bawomera bulai ekina lyali hu siriindwa, bataao omusikaari, babona bati buli siindu siri bulai bweene.

Currently Selected:

Matayo 27: SAMIA

Highlight

Copy

Compare