Amaliro 2
2
Omwaami asaandya Yerusalemu
1Omwaami mu bwaalaba bwae
abwiihire esiirima hu Siyooni.
Oluyaali lwa Yisiraeli lw'aakulu muno,
Omwaami alwiisire aasi.
Hu ludaalo lw'etima lyae,
Omwaami haba sadeebere hu Nyuumba yae yohwiinamiramo daawe.
2Omwaami asihirisa ataali esisa
ebyaalo byomu Buyudaaya byoosi.
Mu bwaalaba bwae buungi,
alikuule ebiko by'amaani byomu Buyudaaya.
Amalire elalira oluyaali mu butuki
neende mu batuki baamwo.
3Mu tima lyae lyaalaba,
amalireo amaani ka Yisiraeli.
Omwaami yahaya ohutuhoonyaho
omusuku n'atuseetere.
Yatunyoolerera koti omuliro kwaaduha muno
okusihirisa buli abuundu.
4Omwaami yatuchoomia obuyiingo bwae,
mani n'atulasa obusaale koti omusuku.
Yeetere abo boosi abatusangaasaanga.
Ano mu Yerusalemu hubweene
obwaalaba bwae bwaaduha koti omuliro.
5Omwaami yeholere koti omusuku,
mani n'asihirisa Yisiraeli.
Asihiriise amadooho kasyo koosi,
mani n'aleha ebiko byasyo by'amaani byaaba amakuunda.
Ameedere mu bomu Buyudaaya
obuchuuni neende amaliro kataakama.
6Omwaami alikuule esikaali syae koti esyomu ndalo,
Amalireo ameenamiro kae mahuluundu kahoyera.
Omwaami yakaamye mu Siyooni
endaalo huluundu neende Sabbaato,
haandi mu tima lyae lyaalaba, anyoolereere
abatuki neende abalaamisi.
7Omwaami yebwabire alutaari yae
haandi yaafudatira abuundu wae woolerefu.
Alehere abasuku
balikula ebida by'amahooho kasyo.
Bayingiire mani bayokera nibasangaalira mu nyuumba y'Omwaami
koti lu hweenamiraanga nihusangaala hu ludaalo luhuluundu.
8Omwaami amaliriire ohusihirisa
esiha sya Siyooni.
Yaabawulao neende olwaaho;
mani yaahaya ohwaakamya ohusisihiirisa.
Yakera eminaara neende esida ohulira
mani byoombi byaakwa byaaba amakuunda.
9Ebiruwa byasyo bibiire mu loba;
mani ebyuuma by'emitaliimbo chabyo bifunaakwe.
Abatuki neende abachweenufu basyo bulaanu bali mu buwaambe.
Amalako haba sikasihoonya daawe.
Abanabbi basyo haba sibasinyoola
ohuboneherwa daawe ohutula eyiri Omwaami.
10Abaandu bahuluundu bomu Siyooni
beehala aasi hu loba nisibulao sibalomaloma.
Bebbuuka olufu hu mitwe
haandi nibefwaala ebigunia.
Abahaana baraaga bomu Yerusalemu
bewunamira emitwe nikiri aasi hu loba.
11Emoni chaange chihoohere olw'ohulira;
omwooyo kwaange kuli mubuchuuni.
Engisa yiinjichuule hu mwooyo
olwohuba abaandu baange basihiriire.
Olwohuba abaana bayere neende abadoto basihirira
hu ngira chomu siko.
12Balirira bang'inaabwe nibateeba bati:
“Ebyohulya neende ebyohung'wa biri yeena?”
Bakwa mu ngira ch'esiko
koti abaandu banyayaalirwe,
mani kala-kala nibakwiisira omwooyo mu mahono ka bang'ina abwe.
13Ewe Yerusalemu,
ndaahuboolere siina, oba ndaahukeraanie hu siina?
Ndaahukeraanie neende wiina, hu nyale ohuhulemya omwooyo
ewe omuheerwa wa Siyooni?
Olwohuba obuchuuni bwao buungi muno; haba sibwaakama daawe.
Esuubi lyao linaatule yeena?
14Abanabbi bao bahubonera
ebibonehero bitaali ebyadyeeri haandi eby'obubacha;
mani baahaya ohuhuboolera ebyonoono byao,
baahukobosera ehabi chao.
Nae bahubonera omulaanga
kutaali okwadyeeri haandi okudoondobania.
15Abo boosi ababitao
beepaama mu mahono;
bawukaho sa mani nibayuuya emitwe
nibabona koti lu Yerusalemu yisihiriiswe, nibeteeba bati:
“Sino nisyo esiko sibalaangaanga bati
esilai muno,
esangaalo y'esyaalo syoosi?”
16Abasuku bao boosi
bahukaluuhaniire mani baahusyuula.
Bahulekeeresa, mani beeluma ebisinini,
baboola bati: “Husisihiriise!
Eee, luno nilwo oludaalo lu hwaliindaanga;
bulaanu nduno lwolere; hulubona.”
17Omwaami aholere esiindu si yatekeha,
yosereese esyo siyatulabula
koti lu yatekeha ohutula hale;
atusihiriise ataali esisa.
Akerere abasuku beefwe batweehoyeraho,
mani yaababeresa amaani k'ohutuyiingira.
18Ewe Yerusalemu,
lirira Omwaami!
Leha amasika kao kahulukuse koti emyaalo
esiro neende esideete!
Otawuluuhaho kata nabudiidi,
oba wakuunuhaho.
19Siingira, mani wekongooye Omwaami,
mu siro syoosi.
Muboolere Omwaami
ebihuli hu mwooyo byoosi.
Siingisa amahono wekongooyere
abaana bao bayere babe abalamu
abo abafwa enjala
hu buli ngira yomu siko.
20Ewe Omwaami, tingaala mani obone!
Wiina wuundi y'osaandisye otyo?
Silai abahasi olia abaana baabwe,
abaana baabwe ba balera?
Silai abalaamisi neende abanabbi beeterwe
mu Nyuumba y'Omwaami mweene?
21Abaraaga neende abakofu
bafwiire mani balaambaalire mu ngira.
Abasyaani neende abahaana
beteerwe mu biita.
Obeetere hu ludaalo lw'obwaalaba bwao,
obasiinjire ataali ohubakwiira esisa.
22Olaangire abasuku baange koti olaanga abaandu hu sidyaalo
beeche ohutula hu mbeka choosi.
Abulao oweyiba oba owawonao
hu ludaalo lw'obwaalaba bw'Omwaami.
Abaana baange bandalera haandi ndahusa
abasuku baange babasihirisa.
Currently Selected:
Amaliro 2: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
