Yobbu 9
9
Yobbu
1 #
Yob 4:17. Yobbu yakobolamo ati:
2“Mubwadyeeri manyire endi siri sityo:
Nae omuundu anyala atye ohuba owadyeeri mu moni wa Nasaae?
3Nae omuundu n'adaha ohuyaala nae omusaango,
haba saanyala ohumukobolamo kata esiteebo silala mu biteebo elifu.
4Nasaae mukesi mu mwooyo, haandi w'amaani niye
wiina omweene owahamuyiingania, mani yaamuhira?
5Oyo olikulula engulu, yabulao osimanya,
mani mu tima lyae yachisihirisa.
6Oyo okera esyaalo syaadengaana ohutulira elalira hu bwaalo bwasyo,
mani esiiro chasyo chateengereha;
7Oyo olagira elyuuba, mani lyaahaya ohutula;
obwiiha hu ng'ining'ini mani chaahaya ohwaaduha.
8Oyo owalandaasa ekulu yeeng'ene ataali omuundu omuhoonya,
haandi yadiira amafwiinda komu nyaanja.
9 #
Yob 38:31; Amos 5:8. Nasaae niye owaaniha eng'ining'ini muukulu, Esolo y'Amaani,
Orioni, Pileyade neende eng'ining'ini ch'emwaalo.
10Nasaae niye ohola eby'amaani ebitamanyihana,
neende eby'amayia bitabalihana.
11Nasaae yaambitaangaho, mani haya ohumubona;
yemeedayo ohwechiira, ataali ese ohumumanyirisa.
12Bona, nanyuula esiindu neende amaani, wiina onyala ohumukayira?
Wiina olimuteeba ati, ‘Ohola siina?’
13“Etima lya Nasaae haba silyohwaakama;
abahoonyi ba Rahabbu bamwiinamira.
14Mani nyala endye ohumukaluhamo,
emboosi ch'ohweosaho mu moni wae, chinyoola yeena?
15Kata ndahaba mbwe mbulaho omusaango, haba siinyala ohumukobolamo;
ndi neende ohwekweeda Nasaae akwiire esisa oyo owusitaaka.
16Niwiichulisa ndamulaanga mani yangaluhamo,
haba siinja ohufukiirira endi abeere naatekeeresa ekono lyaange.
17Olwohuba atuma omuyaka mani kwaanyubulula,
mani yameeda ebikoonjo byaange ataali esifune.
18Haba safukiirira ndayeeraho omuuya,
nae obulamu bwaange, yabwiichusamo ohusaanda.
19Nihuba ohukerana amaani, bone!
Nisiba esiindu sidiira hu bwadyeeri, wiina mweene onyala ohumulaanga?
20Kata ndahaba nitaali neende owunyiingania, emboosi choomunwa kwaange cheene chichia ohuuheengera omusaango kuuhire;
kata ndahaba nimbulaho omusaango, achia ohweekesa koti lu ndi omuhyaamu.
21Mbulaho omusaango; nae haba sindedeebaho omweene;
ndebwaabire obulamu bwaange.
22Byoosi biri nasilala sa; sakira mboola endi,
asihirisa ababulaho omusaango neende abadoondobanu.
23Amasira nikakwaao mani keeterao abaandu,
Nasaae achehaanga sa amasira k'abaandu bataaliho omusaango abo.
24Nasaae yata esyaalo mu mahono k'abahola-mbi.
Yabwiiha hu moni ch'abaheengi b'emisaango.
Nataali Nasaae, mani wiina niye?
25“Endaalo chaange chiiruha muno ohuhiraho omwiiruhi;
chiwaayo, mani ndaahaya ohuchinyoolamo esilai.
26Endaalo chaange chiiruha koti amaato k'amaani hu nyaanja,
koti eeswi yiiha ohugamula ahamwiinyi.
27Nimboola endi, ‘Njia ohwiibirira ohwekanyiirisa hwaange,
njia ohuleha ohuhuluusa hwaange, mani mbe omusaangafu,’
28njichulisa ohusaanda hwaange mani ndya,
olwohuba manyire endi soochia ohumboolera oti mbulaho omusaango.
29Omusaango kuchia ohuuhira;
lwasiina nyaahana bihaya?
30Kata ndaheeyokera mu maachi manyifu,
haandi ndesaaba amahono kaange neende esabbuuni,
31ewe ochia ohuusukuna mu chorooni,
mani engubo chaange cheene chichia ohundebwaaba.
32Olwohuba Nasaae haba saali omuundu koti lu ndi hu mukobolemo,
haandi hu hweeme alala nae mu siina ohuyaala omusaango.
33Abulao omukayi w'omusaango akatikaati waange nae,
onyala ohutukaya fweembi.
34Leha Nasaae alehere ao ohuusaandya,
haandi alehere ao ohundiisa.
35Mba njia ohulomaloma nitamutiire,
olwohuba haba si ndi koti luhoyeere omweene.
Currently Selected:
Yobbu 9: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
