Yobbu 7
7
1“Obulamu bw'omuundu bw'ohuhalaabana y'amaani hu syaalo,
haandi endaalo chae chiri koti endaalo cho mupakasi.
2Koti omukulwa yekoomba ohuwuluhira mu siiniha,
haandi koti omuwaambe asuubira omusaara kwae,
3syesi nilwo lu ndi, ngabana emyoosi kitaalimo obuhoonyi,
ebiro by'obuchuuni nibyo omukabo kwaange.
4Nindeeyalisa aasi ohukona, ndeteeba endi, ‘Ndahasiingire liina?’
Nae esiro simalaanga siba esileeyi,
mani mbarana ohwoola lu buhya.
5Omubiri kwaange kweechulamo enyeende neende obuchaafu;
esihoba syaange syoomerana, mani syaadihanaanga sa buli siha.
6Endaalo chaange chiiruha bwaangu ohuhiraho ewuusi y'omukuruduumu kw'omusooni,
haandi chiwaao abula esuubi lyoosi.
7“Ewe Nasaae, yichulisa oti obulamu bwaange buli koti omuuya;
emoni chaange haba sichahaboneho esiindu silai haandi.
8Emoni ch'oyo owumbona bulaanu haandi haba sichahamboneho daawe;
abo abahangoonye, bahanyoole nindakotao hale.
9Koti ebireesi biwaao mani byaakotao,
nilwo lu oyo owiiha emakoombe atachia ohutulao;
10haba sakobola mu nyuumba yae,
oba abaandu bayabeechaanga nabo haba sibamwichulisa haandi.
11“Sakira bulaanu haba siinja hubuleera;
njia ohulomaloma ebidinyu biri hu myooyo kwaange;
njia ohwekanyiirisa obuchuuni buli hu myooyo kwaange.
12Obaasa oti ndi enyaanja, oba okunani kwomu nyaanja,
hu wuundeeho omuliindi?
13Nae nimboola endi, ‘Leha ndeyalise hu sitaanda syaange mani mbuluuheho,
endi obuliri bwaange bunahendeeseho ohwekanyiirisa hwaange,’
14mani wuusiindusa neende ebilooto
ebiindu biimbonehera byandiisa,
15sakira heengao endi bilai ohumikwa
ndaafwa ohuhira ohudoong'a amakuumba mahaya.
16Mbona endi obulamu bwaange bubulamo obuhoonyi; haba siinjia ohuyiindira endaalo choosi.
Ndehe mbe, olwohuba obulamu bwaange bw'ebiha bidiidi sa.
17 #
Sab 8:4; 144:3. Omuundu otaaliho koti lwaali,
lwasiina omubaasaho muno,
18n'omulaambula buli buhya,
haandi wamuteema buli siha?
19Wahoole yeena ohutaandusaho emoni chao,
oba ohuundeha mani ndaamiraho amate?
20Niimba niholere esyonoono, mba huholereho syonoono siina, ewe oliinda abaandu?
Lwasiina wunjooma buli siha?
Lwasiina ndeholere omusiigo musito yooli?
21Lwasiina siwundeheramo ebihyaamu byaange
mani waatusao esyonoono syaange?
Olwohuba bulaanu njia ohufwa mani ndeeyalise mu loba;
ochia ohungoonya, nae njia ohuba ningotereo.”
©Bible Society of Kenya, 2019
©Bible Society of Uganda, 2019