Yobbu 30
30
1“Nae bulaanu bali ohumbayiraho sa,
abaandu bayere hweese,
ba ndahalekeerese laata yaabwe
baahaya ohuba alala neende embwa chiliinda ebyaayo byaange.
2Buhoonyi siina bu ndahanyoolere ohutula mu baandu,
b'amaani kawaamo bano?
3Olwohuba obumanani neende enjala y'amaani
balumaluma emisi myoomu mu siparara.
4Beeya emisi haandi banoka amasaafu k'emisaala kyomu siino nibalya,
haandi emboo niyibadiira, banyaanya emisi ky'emisaala ky'enjeyo.
5Beeruswa mu baandu;
mani baboobbera embuungu koti bahoobbera omwiibi.
6Byabayiika ohumenyaanga mu ng'uungu,
mu meena kayabwa mu loba neende mu nyaanda.
7Balirira mu siino koti esolo ndeende;
mani beebusira alala aasi w'esiino.
8Abaana ba basiru, b'abaandu bataamanyihaane,
banaalwa ehoba mani beeruswa hu syaalo.
9“Nae bulaanu ndeholere olweembo lwaabwe,
ndi esiindu syohubayiraho yibali.
10Bandeebwaaba, mani beema eyale naange;
haba sibahiinda ohufuucha amate nibaambonaho sa.
11Olwohuba Nasaae yaandehere bihaya mani yaamalamo amaani,
baangaluhaniire neende obwaalaba bwaabwe bwoosi.
12Hu lwaande lw'omuhono kwaange musaacha, yitulireyo ab'esiyiingwa,
baasindikirisa mu moni,
baandeka emiteego kyaabwe nibadaha ohuusihirisa.
13Beekala engira yaange,
banyale ohumalao;
nae abulao omuundu obakamya.
14Beediha koti abatulira mu liina hoongo;
mani baaniaangula nibaambitaho.
15Ebiindu bitiisa biinjichira;
oluyaali lwaange luweereo koti oluwuuchwa neende omuyaka,
haandi obuyiinda byaange buhamyuuhireo koti ebireesi.
16“Nae bulaanu obulamu bumbweeremo;
endaalo ch'esaando nicho echingwiireho.
17Amakuumba kaahomaka esiro syoosi,
haandi obuchuuni bunjuuna haba sibwaakama.
18Bungwaaho neende amaani;
mani bwandiira bwaahunya-hunya koti engubo.
19Nasaae yaasukuune mu madosi,
mani ndi koti olufu oba ekohe.
20Ewe Nasaae hwekweeda, nae haba siwungobolamo;
nyema nae oningaala bulingaala.
21Weholere omwaalaba yi ndi;
wunyayaala neende amaani kao koosi.
22Wusingiise wangalamya, mani waaleha omuyaka kwambuucha,
wanjuuya-njuuya mu muyaka kuwoola.
23Eee, manyiire elalira endi ochia ohutusao obulamu bwaange,
mani wunjire mu nyuumba yatekeherwa abalamu boosi.
24“Nae lwasiina oseeta omuundu omalire ohusihirira,
otanyala huhola esiindu syoosi, ohutusaho ohwekweeda obuhoonyi?
25Haba sindekongooyera abaandu bali mu budinyu?
Omwooyo kwaange haba sikwachunirwaanga abamanani?
26Nae nindasuubiraanga ebiindu bilai, ebibi byoong'ene nibyo ebyanjolaangaho;
nindaliindaanga obulafu, esiirima nisyo esyechaanga.
27Omwooyo kwaange buli siha kuli mu bidinyu, haandi sikuwuchuluhaangaho;
buli ludaalo obuchuuni bwoong'ene nibwo obuunjolaho.
28Ngeendaana nihuluusire mu moni, nae omubasu haba sinikwo okukera;
siingira ndeema mu sidiiyiha sy'abaandu, mani ndekweeda obuhoonyi.
29Ndi koti owebulwa neende amabbwe,
oba koti omwiicha w'amaudo.
30Esihoba syaange sisamuuha, mani syachaaka ohubuluunguha,
nae amakuumba kaange kabalire, kaasamba-busaamba.
31Enyembo chaange chohu naanga cheeholere ech'ohulira,
haandi ekono ly'olwiika lwaange ly'abaandu balira.
Currently Selected:
Yobbu 30: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
