Yobbu 23
23
Yobbu
1Nae Yobbu yakobolamo ati:
2“Olwaalero lwosi, ohwekanyiirisa hwaange hunjuuna,
omuhono kwa Nasaae kuhayiireho, haba siinyala ohwesimiirisa.
3Eee, mba nindamanya yi ndahamunyoola,
ndaheechere mani ndoola eyiri obwiihalo bwae!
4Mani ndaamweekesa amaliro kaange,
mani ndahamuliriire ataali ohulehao esiindu syoosi.
5Ndaheekere bi Nasaae yahangobolemo,
haandi ndaamanya bi yahambooleere.
6Nasaae yahehoonyeere obunyala bwae neende amaani kae ohusoolania?
Haba daawe; yahatekeerese yawulira bi mboola.
7Eyo omuundu muluungifu yahawosere nae,
omuheengi waange w'omusaango yahaweene ati mbulaho omusaango mani yandehuula.
8“Bone, ndemeeda mu moni, nae abulayo;
haandi suda enyuma, nae haba simubona;
9mukoonyera hu muhono mukaada, nae haba simubona;
ngaluuhana hu muhono muluungi, nae haba simubona.
10Nae Nasaae amanyire engira yi ndiho;
naaba n'amalire ohundeema, njia ohutulayo nindabire koti esaabbu.
11Ngeendera mu malako kae;
ngaliindire haandi haba sindahakatuleho.
12Haba sindulaangaho hu malako ka Nasaae yamboolera;
ndabiiha mu mwooyo kwaange emboosi chae.
13Nae Nasaae haba sakaluuhana daawe, haandi abulao onyala ohumukaluuhania.
Buli siindu si yekoomba syoosi, nisyo syaahola.
14Olwohuba achia ohwooseresa esiindu si yandekehera;
haandi ebiindu biingi koti ebyo biri mu bibaaso byae.
15Sakira obuti bundiira ohweema mu moni wae;
niimubaasaho, obuti buli neende ohuundiira yaali.
16Nasaae yaandelalihiriise, omwooyo kwaange kuteengereha sa;
Ow'obunyala bwoosi yangwisiremo oluteengo;
17olwohuba esiirima sinjikaliire,
haandi ebireesi bimali bimbwiihire mu moni.
Currently Selected:
Yobbu 23: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
