Yobbu 16
16
Yobbu
1Yobbu yakobolamo ati:
2“Mbuliire ebiindu biingi muno ebiri koti bino;
mani eng'we mweesi haba simuli abaandu balai abanyala ohugumya emyooyo.
3Emboosi chibulamo obuhoonyi chahaakame liina?
Oba buli siicha mu bibaaso byeeng'we nisyo si mukobolamo?
4Ese syesi ndahalomaloome koti lu mulomaloma,
muba nimuli koti lu ndi;
ndahabaduulire mani ndaabekaluuhaniaho,
ndaabayuuyira omutwe.
5Ndahalomaloome emboosi chibagumya emyooyo,
haandi echiyenjeesa obuchuuni bweeng'we.
6“Niinomanoma, obuchuuni bwaange haba sibuyenjeera,
haandi nindesimiirisa, abulao owundeha mani bwandulaho.
7Mubwadyeeri bweene, Nasaae yamaliremo amaani;
asihiriise abaandu baange boosi.
8Mani yafwiinyiriire,
esyeekesa siti yaahira;
haandi obung'ayu bwaange nibwo bu baandu beemaho ohwomiisa bati omusaango kuuhira,
mani sino sibona-bubona.
9Nasaae mu tima lyae yambosooleremo, haandi yaambonera;
mani yaasyeera ameeno;
abasuku baange baangaluuhaniire mani baamyuulira emoni.
10Abaandu baahoomoleere neende eminwa kyaabwe,
baambaamire hu lusaya ataali ohundelalihira hwoosi,
baangaluuhaniire mani baandeebodoohania.
11Nasaae yandeheere abonooni,
mani yaasukuna mu mahono k'abaandu badoondobanu.
12Ndali ni ndi bulai, nae mani niyangabuhaniamo;
yaangwa mu kosi mani yanyonyobolamo;
yaholere ohuba koti esiindu sy'esabba yae,
13abalasa obuyiingo bwae baandeebodoohaanie.
Yaatamo efuko chaange ataali ohwelalihira hwoosi;
achuha endusye yaange hu loba.
14Yemeeda ohundaaho ebikoonjo buli siha;
mani yaaseenakira naali koti omulwaani ochiiririra ohwiita.
15Ndeesoneere ebigunia mani ndaabita hu mubiri kwaange,
mani amaani kaange ndaakata mu lufu.
16Emoni chaange chahaanye hulw'ohulira,
mani obwooya bwohu moni chaange bwamaliya;
17kata ndahaba nitaali neende obwaalaba mu mahono kaange,
nae esala yaange njoolerefu niyo.
18“Ewe esyaalo, otabwiiha hu mabaanga kaange,
haandi leha ohweelirira hwaange hutasimisibwa.
19 #
Yob 19:25. Nae kata bulaanu, siri neende suubi endi ndi neende omuloli waange wungwiira Muukulu,
haandi oyo owunjosera omusaango ali aakulu Muukulu.
20Ababeere abeecha baange boolere baanjaraanga sa;
emoni chaange chihulukusa amasika nindirira Nasaae,
21Ndekoomba muno mbwe abe hoo omuundu wusabira eyiri Nasaae
koti osabira omwiicha wae.
22Olwohuba ndoong'iseyo emyaaka midiidi sa
ohuchia eyo yi tahanyale haandi ohutulayo ndaakobola.
Currently Selected:
Yobbu 16: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
