Yobbu 13
13
1“Eee, bino byoosi ndabibona, haandi ndabiwulira hale mani ndaabimanya.
2“Ebiindu bi eng'we mumanyire, syesi mbimanyire;
mani sibulao esiindu si muuhira.
3Nae ndaha nomanomeho neende ow'Obunyala bwoosi,
haandi ndekoomba ohuyaala omusaango kwaange neende Nasaae.
4Nae eng'we, muli ababacha abeebachirisa koti abadyeeri;
mweesi muli abalesi babula obuhoonyi.
5Mani muba nimubuleereere elalira,
mwaheyekeese muti muli abakesi!
6Bulaanu muwulire bi mboola,
mani mutekeerese koti lu ndeelomalomaho.
7Lwasiina mubacha Nasaae?
Mubaasa muti ebitina byeeng'we biriho neende obuhoonyi yaali?
8Mubaasa muti muli ohukwiira Nasaae,
mubaasa muti munaamuwosere omusaango yaahira?
9Mubaasa muti binabachiire bulai yabehaliirisa mani n'abafuumbula?
Oba munyala ohumubacha koti omuundu yahabacha owaasye?
10Nasaae achia ohuboolobya,
kata mwahaba nimweekesa ohukwiira olwaande lulala mu bweekisi.
11Mubaasa muti oluyaali lwae haba silucha ohubatiisa,
mani amaani kae kabakweeho?
12Engaado cheeng'we chibulamo amahuluundu, chiri koti ekohe,
ohweeosaho hweeng'we hw'ebihaya, hubulamo amaani.
13“Mubuleereho, mani mulehe nomanome,
mani leha esikwaao, singweeho.
14Njia ohweluma omweene,
mani nduseo obulamu bwaange.
15Bone, achia ohuunjita; haba si ndi neende esuubi;
nae njia ohweeosaho mu moni wae.
16Sino nisyo esichia ohuba obuwonia bwaange.
17Mutekeerese bulai bweene emboosi chaange,
mani lehe bi mboola bikwe mu matwi keeng'we.
18Bone, ndekeehe omusaango kwaange;
manyire endi njia ohutekeereswa.
19Wiina mweene ochia ohuyiingana naange?
Olwohuba njia ohuba nimbuleerere haandi nifwiire.
20Mberese ebiindu bibiri byoong'ene,
mani omweene siinja ohuhuhweekisa:
21nduseho omuhono kwao,
mani leha ebitiisa byao bihaye ohuusiindusa.
22Mani naange, njia ohukaluhamo;
oba lehe nomanome, mani haba simuchia ohungaluhamo.
23Ebibi byaange neende ebyonoono byaange biri biinga?
Leha manye obujeemu bwaange neende ebyonoono byaange.
24Lwasiina okisa obweeni bwao,
haandi waambukula koti omusuku wao?
25Ewe onatiise esaafu li muyaka kudumuulire
haandi waloonda hu sikoha syoomu?
26Olwohuba wandaaho obudoondobaane buungi muno,
haandi wufunaana hulw'ebyonoono by'obuyere bwaange.
27 #
Yob 33:11. Oboya amakulu kaange epiingo,
oloonderesa buli yi makulu kaange kachiira;
obona buli yi sisiisiro syaange siseena.
28Omuundu owaao, ali koti esiindu syabola,
ali koti engubo chi masiriri kaalya hale.
Currently Selected:
Yobbu 13: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
