Yeremia 30
30
Bi Omwaami yasuubisa abaandu bae
1Omwaami Nasaae wa Yisiraeli yamboolera ati: 2“Omwaami, Nasaae wa Yisiraeli aboola ati: Yandiika mu sitabo emboosi choosi chi hubooleere. 3Olwohuba bona, ebiha bichia ohwoola, ngobosere abaandu baange Abaisiraeli neende Abayudaaya ehabi, Omwaami aboola. Njia ohubakobosa mu syaalo si ndaberesa bakuuka yaabwe, mani haandi sichia ohuba esyaabwe.”
4Chino nicho emboosi chi Omwaami yalomaloma echidiira hu Yisiraeli neende Buyudaaya:
5Omwaami aboola ati: Mbuliire ekono ly'ohuteengereha,
ely'ohutya, haandi elitaali ely'omuleembe.
6Bulaanu teebe, mani mubone,
omusaacha syesi anyala ohulumwa mani yeebula omwaana?
Nae lwasiina ndi ohubona buli musaacha
niyediirire hu nda naali koti omuhasi olumwa?
Lwasiina buli muundu asamuuhire mu moni?
7Woowe! Oludaalo olwo luhuluundu muno
lubulao oludaalo luundi oluli koti olwo.
Lwahabe olw'amasira eyiri abaandu ba Yakobbo.
Nae bahaluwone.
8Omwaami w'Obunyala aboola ati: Oludaalo olwo nilwahoole, ndahafunake ekoombo liri mu kosi waabwe; haandi ndahahalake eminyororo kyababoya. Mani haba sibahabe abawaambe b'abateende daawe. 9Nae bahahalaabanire Omwaami Nasaae waabwe neende omwiichuhulu wa Daudi yindahabatereo hu bwaami.
10 #
Yer 46:27,28. Mani eng'we abaandu baange, mutatya daawe.
Eng'we Abaisiraeli, muteyendeherera daawe.
Olwohuba bone, njia ohubawonia mani mbatuse mu syaalo sy'eyale,
neende abaana beeng'we ohutula mu syaalo sibaboyerwamo.
Abaandu baange bahakobole mani baaba mu bulamu bulai haande obw'omuleembe,
mani abulao owahabatiise haandi.
11Olwohuba ndi alala naang'we ohubawonia.
Ndahasihirise ebyaalo byoosi
bi ndabasalaaniamo.
Nae eng'we haba sindahabasihirise daawe.
Nae siinjia ohubaleha muhaye ohusaandaho daawe,
mwahasaandeho engeri yimuhoyeramo.
Ese Omwaami, Niise olomaloome.
12Olwohuba Omwaami aboola ati:
“Ekoonjo lyeeng'we haba siryohuwona daawe,
haandi obunyaalifu bweeng'we buungi nibwo.
13Abulao omuundu onaabiwonie,
kabulao amalesi kanaabihoonye,
libulao esuubi ly'ohuwona.
14Abeecha beeng'we boosi babeebiriire;
haba sibabadeebaho daawe;
olwohuba mbaseetere koti omusuku,
mbasaandya abula ohubadiirira esisa,
olwohuba omusaango kweeng'we muhoongo nikwo,
olwohuba ebyonoono byeeng'we biingi nibyo.
15Lwasiina mweekanyiirisa olw'ohunyaaliha hweeng'we?
Obuchuuni bweeng'we haba sibwohuwona daawe.
Olwohuba omusaango kweeng'we muhoongo nikwo,
olwohuba ebyonoono byeeng'we biingi nibyo,
sakira mbasaandya endyo.
16Mani sakira abo boosi ababasihirisa bosi bahasihirire.
Abasuku beeng'we boosi, buli otulayo, bahayirwe mu jeela.
Abo boosi ababafwiinyirira, bosi bahafwiinyirirwe,
neende abo boosi ababanyaka, bosi bahanyakwe.
17Olwohuba njia ohubameedamo obulamu,
haandi njia ohuwonia ebikoonjo beeng'we.
Olwohuba abasuku beeng'we babalaanga bati mwasukunwa:
‘Siyooni syasukunwa, abulao osideebaho!’
Ese Omwaami, Niise oboolere.”
18Omwaami aboola ati:
“Bone, njia ohukobosa abaandu baange mu syaalo syaabwe,
haandi njia ohubakwiira esisa.
Esiko sya Yerusalemu sichia ohwoombahwa buyaaha,
mani edooho lyasyo lichia ohwoombahwa libe koti lyali hale.
19Abaandu bamenyamo baheembe enyembo ch'ohukinia,
haandi bahabe neende amakono k'esangaalo.
Njia ohubaba ehabi beengiye, haandi haba sibahaduuduye daawe.
Bahanyoole oluyaali bahae ohulekeereswa daawe.
20Njia ohukobosao obunyala bw'esyaalo syaabwe,
bwoomiisirwe elalira koti lu bwali hale;
haandi njia ohusaandya abo boosi ababafwiinyiriraanga.
21Omutuki waabwe yahatule mu syaalo syaabwe syeene.
Omutuki waabwe yahabe ow'olwiibulo lwaabwe lweene.
Ndahamulaange mani asude aambi naange,
olwohuba wiina mweene onyala ohusuda aambi naange nitamulaangire?
Ese Omwaami, Niise oboola.
22Mani mwahabe abaandu baange,
syesi ndaaba Nasaae weeng'we.”
23Bone, etima ly'Omwaami
liri koti esiifuusye
sy'amaani siwuuchira
hu mitwe ky'abahola-mbi.
24Etima lyaalaba ly'Omwaami haba silyahaakame
ohwoola lu lyahooserese esyo siridaha ohuhola
esichiiririrwa sy'ebibaaso byae.
Ebiha byahoole lu baandu bahamanyireho sino bulai.
Currently Selected:
Yeremia 30: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
