Yeremia 28
28
Yeremia neende omunabbi Hanania
1 #
2 Abat 24:18-20; 2 Biha 36:11-13. Mu mwaaka kweene okwo, mu mwoosi kwohutaanu okw'omwaaka kwohune, Sedekia niyahachaaka ohutuka Buyudaaya, Anania omwaana wa Asuuri, omunabbi wa Gibbeoni, yalomloma naange ni ndi mu nyuumba y'Omwaami, abalaamisi neende abaandu boosi nibawulira n'aboola ati: 2Omwaami w'Obunyala, Nasaae wa Yisiraeli aboola ati: “Funaake-funaakemo obunyala bw'omutuki wa Bbabbilooni. 3Mu mbaka y'emyaaka kibiri, njia ohukobosa abuundu ano ebiindu byomu nyuumba y'Omwaami byoosi, bi Nebukadineesa omutuki wa Bbabbilooni yanyaka yaayira Bbabbilooni. 4Haandi njia ohukobosao Yekonia omwaana wa Yehoyakimu, omutuki wa Buyudaaya, alala neende abaandu bomu Buyudaaya boosi abayirwa mu buwaambe Bbabbilooni. Njia ohufunaka obunyala bw'omutuki wa Bbabbilooni. Ese Omwaami, Niise oboolere.”
5Omunabbi Yeremia yeemao yaalomaloma neende omunabbi Hanania abalaamisi neende abaandu bali nibeemere mu nyuumba y'Omwaami boosi nibawulira; 6omunabbi Yeremia n'aboola ati: “Amiina! Lehe husuubire huti Omwaami achia ohwooseresa abweene emboosi chi olaangiriire, mani akobose abuundu ano ohutula Bbabbilooni ebiindu byomu nyuumba y'Omwaami, neende abaandu boosi abayirwayo mu buwaambe. 7Nae ewe Anania, bulaanu wulira emboosi chi huboolera, haandi chi mboolera abaandu boosi. 8Abanabbi batutaangirira ohubaao, ohutula hale, balaangiriraanga ebiita, enjala, neende oluumbe ohwichira ebyaalo biingi neende obutuki bw'amaani. 9Nae omunabbi olaangirira omuleembe, yomiiswa ati niye omunabbi wadyeeri owatumwa neende Omwaami, emboosi chi alaangiriire nichoolerera abweene.”
10Bulaanu munabbi Hanania yeemao yaatusa ekoombo lyali mu kosi wa Yeremia, yalifunaka-funakamo. 11Hanania yalomaloma abaandu boosi nibawulira n'aboola ati: “Omwaami aboola ati, achia ohufunaka-funaka atyo ekoombo li Nebukadineesa omutuki wa Bbabbilooni yateereenge mu kosi w'ebyaalo byoosi mu mbaka y'emyaaka kibiri.” Mani omunabbi Yeremia niyeetulirayo n'awaao.
12Nae ebiha nibyabitao, omunabbi Hanania naamalire ohufunaka-funakamo ekoombo lyali mu kosi w'omunabbi Yeremia, Omwaami yaboolera Yeremia ati: 13“Chia mani oboolere Hanania oti Omwaami aboola ati: Ofunaake-funaakemo ekoombo ly'omusaala, nae njia ohukobosao ekoombo ly'esichuma abuundu walyo. 14Olwohuba Omwaami w'Obunyala, Nasaae wa Yisiraeli aboola ati: ‘Njia ohuta mu kosi w'ebyaalo ebyo byoosi ekoombo ly'esichuma, mani bihalaabanireenge Nebukadineesa omutuki wa Bbabbilooni. Bichia ohumuhalaabanira, olwohuba mubereese kata ebisolo byomu siino.’ ”
15Nae omunabbi Yeremia yaboolera omunabbi Hanania ati: “Ewe Hanania, wulira, Omwaami haba saahutumaangaho daawe, mani okerere abaandu bano beesika eby'obubacha. 16Mani sakira, Omwaami aboola ati: ‘Bona, njia ohuhutusa hu syaalo. Ochia ohufwa omwaaka kweene kuno, olwohuba oboleere abaandu ohujeemera Omwaami.’ ”
17Hanania yafwa mu mwoosi kwa hataanu-na-habiri okw'omwaaka kweene okwo.
Currently Selected:
Yeremia 28: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
