Yeremia 18
18
Yeremia naali mu nyuumba y'omuloongi w'endamu
1Omwaami yamboolera ati: 2“Siingira, wiihirire ochie mu nyuumba y'omuloongi w'endamu, eyo niyo yi njia ohuhuboolera esy'ohuhola.” 3Ndeemao ndeehirira ndaachia ew'omuloongi w'endamu, mani ndaamunyoola naali hu mulimo kwae. 4Buli siindu si yaloongaanga nisyanyasihiraanga mu mahono kae, yanyoobaanga eloba elyo haandi, mani aloongamo esiindu siindi koti lwaadaha.
5Haandi Omwaami yamboolera ati: 6“Eng'we Abaisiraeli, mubaasa muti, Ese haba siinyala ohubahola hooho esiindu koti lu muloongi w'endamu wuno yahola hu loba li yali naaloongera? Bone, koti eloba liri mu mahono k'omuloongi w'endamu, nilwo lu mwesi muli mu mahono kaange, eng'we Abaisiraeli. 7Niimboola endi njia ohwiiya, oba ohulikula, oba ohusihirisa esyaalo oba obwaami, 8nae esyaalo esyo sikaluuhana, syaakama ohwonoona, mba njia ohweyolobya mani haye ohuhola esiindu si ndali nimboolere ohusihola. 9Nae niimboola endi njia ohwoombaha oba ohutaaka esyaalo oba obwaami, 10nae esyaalo esyo syonoona mu moni waange, haandi sihaya ohuwulira ekono lyaange, mba njia ohuhola esiindu si ndali nimboolere ohusihola.” 11Sakira bulaanu, boolera abaandu bomu Buyudaaya neende abo abamenya mu Yerusalemu oti: Omwaami aboola ati, Bone, ndi ohutekeha ohubaholaho esibi, haandi ndi omwetekefu ohubasaandya. Kobole, buli muundu alehe ebiima byae bibi, akololose obulamu bwae neende ebiholwa byae.
12Nae bachia ohuhukobolamo bati: “Ebyo bya bihaya! Efwe huchia ohuloondakana sa neende endekeha yeefwe yeene, mani buli muundu ahole ohuchianakana neende omwooyo kwae mwoomeranu haandi omubi.”
Abaandu bebwaaba Omwaami
13Mani sakira Omwaami aboola ati:
“Muteebeho mu byaalo.
Aliwo owaali nawuliireho esiri sityo?
Abaandu ba Yisiraeli
baholere esiindu sibi muno.
14Mani enjafwa ch'olwaanda lw'aakulu lwa Lebbanooni
chahawaamo omunyiti?
Emyaalo ky'amaachi manyifu kyahatula mu lugulu,
mani kyaakamaanga ohuhulukusa?
15Nae abaandu baange baanjibiriire,
baanioohesa obubbaani eyiri banasaae bataali abadyeeri.
Batulire hu ngira chaabwe
chi bakeenderaangaho ohutula hale,
mani nibakeendera hu mihoosi,
ataali hu ngira hoongo.
16Esyaalo syaabwe basiholere esitiisa,
esiindu sibanalekeereseenge endaalo choosi.
Buli muundu obita aambi nasyo anaaticheenge
mani naayuuya sa omutwe kwae.
17Abaandu baange ndahabasalaanie mu moni ch'abasuku baabwe,
koti lu muyaka kw'ebukwe kudumuula olufu.
Amasira nikahabakweeho,
njia ohubafudatira, haba siinjia ohubahoonya daawe.”
Ohweehoba hw'ohulya olukwe mu Yeremia
18Abaandu beemao baaboola bati: “Mwiiche, lehe hulye olukwe mu Yeremia. Nihumumalao, haba sihunaahaywe abalaamisi ohutweekesa, noomba abaandu bakesi ohutukerakira, noomba abanabbi ohutuyaalira emboosi ya Nasaae. Mwiiche, lehe humuteeho omusaango, mani hwaakame ohuwulira emboosi ch'aboola.”
19Sakira ndasaba endi: “Ewe Omwaami, tekeeresa,
mani owulire bi basuku baange bali ohuunomanomaho.
20Esilai mani situungwaangaho neende esibi?
Nae nabo bayabire eliina nibadaha bati ngweemo.
Ewe Omwaami, yichulisa koti lu ndeema mu moni wao
nihwekweeda hulwaabwe,
endi ohaye ohubadiirira etima.
21Mani sakira, leha abaana baabwe balumwe enjala bafwe,
haandi beeterwe mu biita.
Leha abahasi baabwe badoong'e nibabula abaana, haandi koti abahasi bafwiirwe.
Leha abasaacha baabwe bafwe amalwaae, nae
abaraaga baabwe beeterwe mu biita neende olugaanga.
22Batumire omukaanda kw'abanyaka, kunyake ebiindu byaabwe nibataamanyire,
mani boobbe embuungu mu madaala kaabwe.
Olwohuba bayaba eliina nibadaha bati ngweemo,
haandi baateka emiteego nibadaha bati chindiire.
23Nae, ewe Omwaami, omanyire
ehobo chaabwe ch'ohuunjita choosi.
Otabaleheramo esyonoono syaabwe,
noomba weebirira esyonoono syaabwe.
Leha basukunwe batule mu moni wao;
basaandye n'obanyoolereere.”
Currently Selected:
Yeremia 18: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
