Yeremia 12
12
Yeremia ateeba Omwaami
1Ewe Omwaami, mba ni ndayiingana naawe,
niiwe owabeere owadyeeri.
Nae leha ndeete amaliro kaange yooli.
Lwasiina abahola-mbi bahulaahulana?
Lwasiina abaandu bataali abeesikwa bali bulai?
2Wabataaka, mani beesa emisi;
bahula mani baama ebyaamo.
Bahulomalomaho buli ludaalo
nae haba sibahudeebaho daawe.
3Nae ewe Omwaami, wuumanyire;
wumbonaanga, haandi omanyire oti hubaasaangaho.
Hweesa abaandu abo koti amakoondi kachia ohusiinjwa.
Babulemo ohwoola oludaalo lwo hwiitirwaho.
4Esyaalo syahoome ohwoola liina,
haandi obunyaasi bwomu siino bwaahooha?
Olwohuba ebyonoono by'abaandu bikerere
ebisolo alala neende amayoni byaafwa.
Olwohuba abaandu baboola bati, Nasaae haba saabona ebiindu bi huhola.
Omwaami akobola mu Yeremia
5Omwaami aboola ati: “Yeremia, ohwiiruha neende abaandu neende amakulu nibahujoong'a batyo,
wahanyale otye ohwiiruha neende abo abali hu faraasi?
Haandi n'otanyala ohweema mu syaalo sikwalaafu,
wahole otye mu siparara sya Yorodaani?
6Olwohuba bamwaanamaao beene neende abanaluyia bao,
bosi bahulyaamo olukwe,
bakwiire alala neende abo abahuyiingania.
Otabetaaho daawe
kata neende nibalomaloma naawe bulai.”
Engisa yidiira Omwaami hulw'abaandu bae
7Omwaami aboola ati: “Ndebwaabire Yisiraeli,
ndehere esyaalo si ndedoolera.
Abaandu ba ndaheera muno, mbayaanireyo
mu mahono k'abasuku baabwe.
8Abaandu baange ba ndedoolera omweene
baandeekaluhaanieho bali koti edalang'i yomu sichaha.
Baanjalabiire;
sakira mbasyuulire.
9Abaandu baange ba ndedoolera omweene, bali koti eyoni li bayiima.
Li bayiimi bebodoohaanie nibatulira embeka choosi.
Muchie, mubuuse alala esolo ndeende choosi;
muchileete chilye.
10Abeemirisi baangi banyaasire endalo yaange y'emisabbiibbu,
baseenakiire obulimo bwaange.
Esyaalo syaange silai basiholere
esiparara sibulamo abaandu.
11Baholere esyaalo syaange ohuba koti ekuunda;
esiino lyoong'ene nilyo li mbona.
Esyaalo syoosi siri koti ekuunda,
nae abulao omuundu odeebayo.
12Abasihirisi batumalireho
mu bigulu byomu siparara byoosi.
Olwohuba olugaanga lw'Omwaami luchia ohusihirisa
esyaalo syoosi.
Abulao omuundu ali mu muleembe.
13Bataaka engaano, nae nibakesa amawa.
Badiindikirira muno, nae nibatanyoola engaanga yoosi daawe.
Ekesa lyaabwe lichia ohubadiisa esoni
olwohuba etima liingi ly'Omwaami.”
Ebiindu bi Omwaami asuubisa abasibiraane ba Yisiraeli
14Omwaami aboola bino ebidiira hu balirwaana ba Yisiraeli abachia ohunyaasa esyaalo si ndaberesa abaandu baange Abaisiraeli ohuba esyaabwe: “Bone, njia ohutusa abaandu babi abomu syaalo syaabwe, haandi ndahatuse Abayudaaya mu mahono kyaabwe. 15Nae niimalire ohubatusa mu syaalo syaabwe, ndahabakwiire esisa haandi. Ndahakobose buli muundu mu situundu syae neende mu syaalo syae syeene. 16Syahoolerere abweene siti, buli muundu niyeeka bulai ebiima by'abaandu baange, mani nibeechuba nibaboola bati: ‘Koti lu Omwaami ali omulamu,’ kata koti beekesa abaandu baange ohweechuba eyiri Bbaali, mani abo bosi bahabalirwe mu baandu baange. 17Nae esyaalo syahahaye ohuwulira, ndahasitusireo elalira haandi ndahasisihirise. Ese Omwaami Niise oboolere.”
Currently Selected:
Yeremia 12: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
