Yakobbo 1
1
1 #
Mat 13:55; Mrk 6:3; Biho 15:13; Gal 1:19. Ese Yakobbo, omuhalaabani wa Nasaae neende ow'Omwaami Yesu Kristo:
Mbaheesa eng'we enono ehumi-na-chibiri ech'abaandu basalaanira mu syaalo syoosi.
Efukiirira neende amakesi
2Basyaange, ebidinyu bya buli ngeri nibibakwaaho, mweeyireenge muti muli ab'ehabi. 3Olwohuba mumanyire muti efukiirira yeeng'we niyiteemebwa mani mwaahaya ohukwa, ao munyoola amaani k'ohwesimiirisa. 4Muboneenge muti muli neende ohwesimiirisa mu bulamu bweeng'we bwoosi, hu munyale ohweehola abaandu baluungifu haandi abeechufu, nimutaaliho esiindu syoosi si mwekoomba.
5Nae n'aliwo omuundu yeesi mweeng'we otaali neende amakesi, leha asabe Nasaae, ochia ohumuberesa amakesi; olwohuba Nasaae niye oberesaanga abaandu boosi ebiindu mu buungi. 6Nae oyo oba n'asaba, lehe asabe neende efukiirira, n'atakanaakana. Omuundu yeesi okanaakana ali koti efwiinda yomu nyaanja, yi muyaka kuhubba kwaayira eno neende era. 7Omuundu ofwaana atyo, otanyala ohuheengao esy'ohuhola, 8haba saacha ohunyoola esiindu syoosi ohutula eyiri Omwaami.
Obumanani neende obuyiinda
9Abakristo bamanani bahoyere ohwehoyanga Nasaae n'abaniinia aakulu, 10#Yis 40:6,7. haandi Abakristo bayiinda, bahoyere ohwehoyanga Nasaae n'abeesa aasi. Olwohuba abayiinda bachia ohumalwao koti esimuli syomu siino. 11Olwohuba elyuuba nilitula neende obumemu bwalyo busimamula syooma; ebimuli byaahwo bikwa, mani obulai bwasyo bwaawa. Mu ngeri nasilala eyo nilwo lu bayiinda bachia ohusihiriswa nibasisiiri mu bunyahani bwaabwe.
Ohuhema neende ohuteema
12Ali neende ehabi omuundu womiirira mu fukiirira ebiteemo nibimwoolaho, olwohuba naaba n'amalire ohuyiingira amateemo, achia ohunyoola ekofia y'obutuki y'obulamu yi Nasaae yamala ohusuubisa abamuheera. 13Omuundu n'anyoola ebiteemo bifwaana bityo, ataboolaanga ati, “Amateemo kano katula eyiri Nasaae,” olwohuba Nasaae haba saanyala ohuteemwa neende esibi syoosi, haandi Nasaae mweene sateemaangaho omuundu yeesi. 14Nae omuundu yeesi anyoola ohuteemwa ebibaaso byae biba nibihweesa omwooyo kwae nibikuyira mu sibi. 15Mani obwekoombi bubi obwo buhula, mani bweebula esibi. Haandi esyonoono nisihulire siibula ohufwa.
16Basyaange baheerwa, mutabachwaanga! 17Buli siyaanwa silai haandi esiichufu, situla Muukulu; situla eyiri Nasaae Seefwe, owaloonga obulafu bwomu kulu, otakaluuhana-kaluuhana oba yaleeta esiirima n'akaluuhana. 18Ohweema hu hudaha hwae omweene, yatwiibula haandi n'abitira mu mboosi yadyeeri, hu hunyale ohuba ebyaamo bitaangira mu biloonge byae byoosi.
Ohuwulira neende ohuhola
19Basyaange, mudiire emboosi chino bulai! Buli muundu ahoyere ohuba omwaangu mu huwulira, nae otaanguya ohulomaloma haandi otanyoolera bwaangu. 20Olwohuba etima ly'omuundu sirimuhoonya ohwooseresa obuluungifu bu Nasaae adaha. 21Sakira, mwetuseho buli saambo mbi yoosi, neende ebiholwa bibi. Mweyaaneyo eyiri Nasaae haandi mufukiirire emboosi yi yataaka mu myooyo kyeeng'we, eyinyala ohubawonia.
22Mutebachanga abeene nimutekeeresa emboosi; nae muyitechenge mu huhola. 23Olwohuba omuundu owulira emboosi, mani yaahaya ohuyita mu huhola, afwaana koti omuundu weebona mu monero mani yaamanya koti lu afwaana. 24Nae n'amalire ohweebona koti lu afwaana, atulao yawaao, mani bwaangu-bwaangu niyeebirira koti lu afwaana. 25Nae niwehaliirisa bulai mu malako kawonia abaandu, mani wemeeda ohukabaasaho, ataali ohutekeeresaanga hwoong'ene mani waakebiirira, nae waakata mu hola, Nasaae achia ohuhuberesa ehabi mu by'ohola.
26Omuundu yeesi n'abaasa ati w'efukiirira, nae saanyala ohutuka olulimi lwae, efukiirira yae yiba yibulamo obuhoonyi, haandi omweene aba yebachirisa. 27Efukiirira yi Nasaae Seefwe ayira koti eyadyeeri eyiwumamo ohwebachirisa, niyo yino: ohuliindaanga abaana bafwiire, neende abahasi bafwiirwe mu bidinyu byaabwe, neende ohweliindanga esyaalo sitahunyaasa.
©Bible Society of Kenya, 2019
©Bible Society of Uganda, 2019