Yisaaya 47
47
Ohuheengera Bbabbilooni omusaango
1 #
Yis 13:1—14:23; Yer 50:1—51:64. Omwaami aboola ati,
“Ewe Bbabbilooni omuhaana otaamanyire eby'abasaacha;
Yiha aasi otule hu sisaala syao sy'obutuki mani wiihale aasi mu lufu,”
ewe omuhaana w'Abakaludaaya!
Olwohuba ewe haba soosilaangwa
omuyere kata sa omuraaga daawe!
Bulaanu oli omuhalaabani muwaambe!
2Ewe bukula sa eesyo mani osye obusye.
Weboololeho esitaambaya hu mutwe,
wefwaalulemo engubo yao ndai, leha amakulu kao kabonehe,
mani wambuhe emyaalo.
3Abaandu bahahubone nooli syeekenye,
bahahubone niwiisirwe aasi esoni nichihudiirire.
Njia ohwetuunga,
mani abulao omuundu wahawoneo.
4Omuwonia weefwe, eliita lyae nilyo Omwaami w'Obunyala,
niye Omwoolerefu wa Yisiraeli.
5Omwaami oyo aboola Bbabbilooni ati,
“Yihala n'owuleerere haandi mu siirima,
ewe esiko sy'Abakalidaaya.
Olwohuba abahubona haba sibachia ohuhulaangaanga bati
omuhaaye w'abatuki b'ebyaalo.
6Ese ndanyoolerera abaandu baange,
mani niimbabukula koti abataali abaange;
ndaabayaanayo mu bunyala bwao,
mani weesi waahaya ohukwiiraho esisa kata nabudiidi;
mani wadwiiha kata abakofu omugugu kwao
omusito haandi omudinyu.
7Waboola oti, ‘Njia ohuba omuhaaye w'omutuki endaalo choosi,’
mani ebiindu bino n'otabitaaho omwooyo
kata weechulisa oti byahawe daawe.”
8 #
Hubwi 18:7,8. “Bulaanu tekeeresa bino, ewe owaheera ebisangaasa byoong'ene,
owihale noheengereho,
mani noboola mu mwooyo kwao oti,
‘Niise, haandi abulao owuundi ohutusaho ese sa;
haba siinjia huba koti omuhasi mufwiirwe daawe
kata sa ndaamanya koti ohufwiirwa abaana huchuuna.’
9Nae ebiindu bibiri bino byahahukweeho
mu siha silala, hu ludaalo lulala;
ohufwiirwa abaana neende ohudoong'a omufwiirwe
byahahukweeho elalira.
Kata awahaba neende abalakusi baangi
neende amayia k'amaani.”
10Wasangaaliraanga mu ohuholaanga bubi hwao,
noboola oti, “Abulao owuumbona.”
Amakesi kao neende ohumanya hwao
byahudoondobania
mani n'obaasa mu mwooyo kwao oti,
“Niise, haandi kata abulao owuundi.”
11Nae esibi syahahwooleho
n'otamanyire yi situuliire;
amasira kahahukweeho,
k'otanyala ohwaakamya daawe;
haandi ohusihiriha hwahahwooleho bwaangu muno
notaamanyireho esiindu daawe.
12Mani liinda bulai obw'amayia bwao obwo
neende abalakusi bao baangi abo,
biwahalaabaniramo ohutula obuyere bwao,
awuundi wahanyoolamo obuhoonyi,
awuundi byahahuhoonya ohutiisa abasuku bao.
13Abahuba amakesi baangi booli nabo abo bahumalamo amaani bihaya.
Lehe abo abehaliirisa ebiri muukulu,
neende abo abatiingaala eng'ining'ini,
abo abalakula ebyahakweeo nibabonera hu hutula hw'omwoosi muyaaha,
lehe beemeo mani bahuwonie.
14“Bone, bali koti ebikoha,
haandi omuliro kubisaamba.”
Haba sibinyala ohweewonia ebyeene
ohutula mu bumemu bw'omuliro daawe.
Omuliro okwo haba sikwahabe koti okw'amaanda ku baandu boota,
abulao omuundu waheehale mu moni wakwo.
15Mani abo bohalaabaniire otyo nilwo lu bahabe,
bawachurusaanga nabo ohutula mubuyere bwao.
Buli muundu yahediirire engira yae;
mani yibuleo ohuwonia.
©Bible Society of Kenya, 2019
©Bible Society of Uganda, 2019