Yisaaya 42
42
Omuhalaabani w'Omwaami
1 #
Mat 3:17; 17:5; Mrk 1:11; Luk 3:22; 9:35. #Mat 12:18-21. Omwaami aboola ati, “Bone, omuhalaabani waange nguno, wuno niye yinyomiisa.
Niye yindadoolamo, haandi niye yindehoyeramo.”
Ndamwichusamo Mwooyo waange,
mani achia ohuleeta obwadyeeri mu buli syaalo.
2Haba saachia huhuumula oba ohusiingisa ekono lyae,
oba yakera lyawuliirihana hu ngira.
3Haba saachia hufunaka olumuli lwaadihaanemo,
haandi olutaambi luloleera, haba saachia hulusimia;
ohutusaho, yahaleetere abaandu boosi obwadyeeri bweene.
4Haba siyahaweemo esuubi kata sa ohusinyiha;
ohwoola lu yahateeo obwadyeeri mu syaalo;
haandi abaandu bamenya mu byaalo by'eyale baliinda neende esangaalo ohunyoola enjekesa yae.
5 #
Biho 17:24,25. Omwaami Nasaae,
owaloonga ekulu mani n'alibaamba.
Owahola esyaalo neende buli siindu sirimo. Abaandu bamenya mu syaalo, niiwe owababeresa omuuya
omwooyo w'obulamu; aboola ati,
6 #
Yis 49:6; Luk 2:32; Biho 13:47; 26:23. “Niise Omwaami, haandi ndahulaanga mu buluungifu,
ndahudiira hu muhono haandi ndaahuliinda.
Ndahabitire mweewe ohuhola endagaano neende abaandu,
haandi ndahabitire mweewe ohuleetera ebyaalo obulafu.
7Wahabwihule emoni chawofula.
Wahatuse ababoye mu jeela y'esiirima,
mani waleetera abo ababoyerwa mu siirima omuleembe.
8“Niise Omwaami syeeng'ene, Nasaae wao.
Yibulayo nasaae wuundi ofukiirirwa ohukabanaho hu luyaali lwaange,
haandi efuma yaange haba siyibereswaho esifwaanani sibaache sa.
9Bone, ebiindu bindalaanga hale bulaanu byoolereere.
Bulaanu njia ohubaboolera ebiyaaha;
nibisisiiri ohubaao.”
Olweembo lw'ohufumia Omwaami
10Mweembere Omwaami olweembo luyaaha,
leha esyaalo syoosi simukinie!
Leha enyaanja neende ebiloonge bi yirimo byoosi bimukinie.
Eng'we ebyaalo by'eyale neende abaandu baamwo, mukinie Omwaami.
11Lehe esiparara neende ebiko byamwo bisiingise ekono,
neende engoongo ch'Abakedaari.
Lehe abaandu ba Sela beembe neende omwehoyo,
lehe bahuumule nibali aakulu w'engulu.
12Lehe abaandu bamenya mu byaalo byeeyale
bakinie Omwaami, haandi bamwiisemo oluyaali.
13Omwaami atulayo niyeecha ohulwaana koti omululu w'amaani.
Yeekesa obwaalaba bwae koti omusikaari.
Yoobba embuungu ch'ebiita, mani yahuumulira mu kono ly'aakulu.
Yeekesa obunyala bwae obw'ohulwaania abasuku bae.
Nasaae asuubisa ohuhoonya abaandu bae
14Omwaami aboola ati, “Ndeesimiriise nimbuleerere hulw'embaka ndeeyi muno,
haandi yibulao yingobolamo.
Nae bulaanu, njia ohwayula koti omuhasi olumwa,
njia ohubiinduha koti omuhasi olumwa engasi.
15Njia ohusihirisa engulu neende ebigulu,
mani nyomye obunyaasi neende emisaala kibiriho.”
Ehooho chohu myaalo, njia ohuchihola ebisiinga,
haandi njia ohuhamya ebidiba by'amaachi.
16“Njia ohwemerera abawofu,
mbabise hu ngira chibataamanyire,
mu mihoosi ki bali nibataamanyire
mani mbeekese.
Njia ohukaluuhania esiirima siri mu moni waabwe sibe obulafu,
haandi ngwalaase buli abuundu yibabitira.
Ebiindu bino njia ohubaholera,
haba siinjia hubajwaang'a daawe.
17Abo boosi abeesika ebiloongaloongwe bibaache,
abo ababoolera ebiloongaloongwe biitaanye bati,
‘Niing'we banasaae beefwe.’
Bahakaluswe enyuma mani badiirwa esoni.”
Abaisiraeli bahaya ohweeka
18Omwaami aboola ati, “Wulire eng'we abadiimbe b'amatwi;
eng'we abawofu, tingaale mani mubone.
19Wiina mweene omuwofu ohuhira omuhalaabani waange?
Oba, wiina mweene omudiimbe ohuhira wamwaanda waange yiituma?
Wiina mweene owawofula koti omuloonde mweene,
oba owawofula koti omuhalaabani w'Omwaami?”
20Ewe Yisiraeli, omweene ebiindu biingi muno, nae haba sobyehaliirisa daawe;
oli neende amatwi kawulira, nae haba soowulira daawe.
21Omwaami, ohweema hu buluungifu bwae bw'ohuwonia abaandu, yasangaala
ohufumia amalako kae mani abaandu bakeesemo oluyaali.
22Nae bulaanu abaandu bae mbano beebwa haandi banyakwa,
nae boosi batekwa mu buko
mani baakwiiswa mu buko.
Bayiimwa mani yaabulao obawonia,
banyakwa mani yabulao oboola ati, “Kobosao!”
23Wiina mweene hweeng'we onawuulire sino?
Wiina mweene onatekeeresa ebiindu bifwaana biti?
Mani ohuchaaka olwaleere ohwemeeda mu moni ohoyere ohutekeeresaang niweehaliirisa.
24Wiina owaleha abeechuhulu ba Yakobbo ohunyakwa?
Wiina owayaanayo Yisiraeli ohukwa mu mahono k'abanyaka?
Yali Omwaami mweene yihunyoolesa nihuhola ebyonoono.
Oyo yihwahaya ohuhola by'adaha,
mani hwajeemera amalako kae.
25Sakira etima limudiira nabataaho obwalaba bwae
mani naabasiindihira ebiita by'amaani;
Obwaalaba bwae bwaamba koti omuliro bwebodoohania, nae haba sibatamanya daawe;
bwamusaamba, nae haba sibasyeekeraho daawe.
©Bible Society of Kenya, 2019
©Bible Society of Uganda, 2019