Yisaaya 40
40
Emboosi chikobosamo esuubi
1Gumye, gumye abaandu baange,
Nasaae weeng'we nilwo lu aboola.
2Muboolere abaandu abomu Yerusalemu emboosi chibakobosamo esuubi,
mani mubaboolere
muti ohusaanda hwaabwe bulaanu hwakaame,
muti ebyonoono byaabwe bireheerwemo.
Mubaboolere muti Omwaami abasaandiisye olumala
hulw'ebyonoono byaabwe.
3 #
Mat 3:3; Mrk 1:3; Yow 1:23. #Luk 3:4-6. Ekono lihuumula niliboola liti.
“Mutereesere Omwaami engira mu siparara,
mukololosere Nasaae weeng'we engira ya naahuluungu mu sichiimi.
4Buli liina liichuswe,
haandi buli lugulu neende buli sigulu bikwalaaswe;
neende buli abuundu ataali akololofu akololoswe,
haandi buli abuundu ataali akwalaafu akwalaaswe.
5Ao mani oluyaali lw'Omwaami luchia ohwekeswa,
buli muundu yeesi yahalubone,
olwohuba Omwaami mweene niye oboolere.”
6 #
Yak 1:10,11; 1 Pet 1:24,25. Ekono liboola liti, “Huumula!”
Mani ese nindeeba endi, “Siina syeene sindahuumule?”
Nilikobolamo liti, “Huumula oti abaandu boosi bali koti obunyaasi,
haandi ohunyirira haabwe hwosi huli koti esimuli syomu siino.”
7Obunyaasi bwooma, esimuli syahooha,
Omwaami yatuma omuyaka ohubiwuuchaho;
mubwadyeeri abaandu bali koti obunyaasi.
8Obunyaasi bwooma, esimuli syahooha;
nae emboosi ya Nasaae weefwe yiyiindira sa endaalo choosi.
9Ewe boolera Siyooni emboosi ndai,
niina hu lugulu luleeyi; ewe oboolere Yerusalemu emboosi ndai,
siingisa ekono olomalome neende amaani, otatya daawe;
boolera ebiko bya Buyudaaya muti,
“Bone, Nasaae weenge nguno yoolere!”
10 #
Yis 62:11; Hubwi 22:12. Bone, Omwaami Nasaae weeng'we nguyo yeecha neende obunyala,
haandi obunyala bwae bweene bumutukira;
bone, ali neende omukabo kwae,
haandi ali neende omusaara kwae.
11 #
Esek 34:15; Yow 10:11. Achia ohuliinda ebyaayo byae koti omwaayi;
achia ohubuusa alala amakoondi madoto, mani akalere mu mahono kae,
achia ohukakiingira hu sirifu syae,
mani yeemisiremo amadwaasi kebuule niyehaliirisa bulai.
Obunyala neende amakesi ka Nasaae wa Yisiraeli
12Wiina mweene owali napiimire obuungi bw'amaachi komu nyaanja mu syaaba sy'amahono kae
oba yapiima ekulu neende obuleeyi bw'esirifu syae?
Wiina owali n'ateere olufu lwohu syaalo hu latiri ohulukera
kata sa owakeraho engulu hu latiri
haandi yapiimiraho obugulu hu latiri?
13 #
Rom 11:34; 1 Kor 2:16. Wiina owali nabooleere Mwooyo w'Omwaami esy'ohuhola,
kata sa owali n'amubereese amakesi namukerakira?
14Nasaae yali niyeteebere hu wiina, n'amusaba amuberese amakesi?
Wiina owali namwekeseho emera y'obwadyeeri
haandi yaamweekesa engeri yohuholeramo ebiindu,
haandi wiina owamweekesaho engeri y'ohumanya?
15Bone, eyiri Omwaami, ebyaalo biri koti etoonde ly'amaachi hu syoongo,
biri koti olufu luli hu latiri;
bone, ayira ebisiinga koti esiindu sidiidi muno.
16Ebichaha bya Lebbanooni byoosi haba sibinyala ohutulamo eehwi chinyala ohumala Omwaami daawe.
Kata esolo chamwo, haba sichinyala ohuba ebiyaanwa bisaambwa.
17Ebyaalo byoosi haba si siindu mu moni w'Omwaami,
biri koti ebihaya byeene, omubula esiindu.
18 #
Biho 17:29. Mani Nasaae munamukeranisye hu wiina,
kata sa siina syeene simunamufwaananie nasyo?
19Esiloongaloongwe si muundu aloonga,
neende esiindu si muundu yetaanya mani yabahaho esaabbu,
neende esyo siyetaanya neende eminyororo ky'efeesa.
20Nae omumanani otanyala ohunyoola efeesa kata sa esaabbu ebyohu yaana,
adoolamo omusaala kutanyala hufuunda;
mani yakoonya omubaachi w'amakesi
yataawo esifwaanani syomiifu esitanyala hudengaanisibwa.
21Eng'we haba simumanyire? Haba simuwulirangaho?
Haba sibababooleraanga ohutula hale?
Mwali nimutaamanyireho ohutula esyaalo nisiloongwa?
22Nasaae niye oyo owamenya aakulu w'esyaalo syebodoohaanie,
mani abaandu basiriho badiidi koti amadeede.
Yabaambula ekulu koti olutiimba,
haandi yalibaamba koti eyeema ly'ohumenyamo.
23Aloongoyasa abatuki b'amaani,
mani yabahola koti abataaliho neende esiindu daawe.
24Bali koti emisaala kibahataaka sa esiha esyo,
ki bisina byaakio bisisiiri ohwiisa emisi mu loba.
Omwaami lwaatuma sa omuyaka ati, nikihooha,
nikuwuuchaho kuti nikidumuuha koti amakada.
25Omwoolerefu Mweene ateeba ati, “Munyala ohuungeraania neende wiina,
yi nyala ohufwaanana nae?
26Mutingaale aakulu mani mubone.
Wiina mweene owaloonga ebyo byoosi ebiriyo?”
Niye oyo olagira byaatulayo koti eye,
n'alaanga buli situlayo neende eliita lyaasyo;
neende obunyala bwae buungi,
mani olwohuba ali neende amaani maangi
sibulao esitaaliwo.
27Eng'we abeechuhulu ba Yakobbo,
mboola eng'we Abaisiraeli, munyala mutye ohwekanyiirisa nimuboola muti,
“Omwaami haba saamanyire obudinyu bweeng'we,
haandi muti Nasaae weeng'we haba sadeebayo daawe”?
28Haba simusimanyire? Haba simusiwuliraangaho daawe?
Omwaami niye Nasaae w'endaalo choosi,
Esyaalo syoosi koti lu syaakiire, niye owasiloonga.
Haba sawaamo amaani haandi saajoong'a,
amakesi kae haba sikamanyihana daawe.
29Abeyendehereere, ababeresa amaani,
haandi ababula obunyala, aboongeraangamo amaani.
30Abaraaga bosi beyendeherera mani baajoong'a,
haandi abasyaani baraaga bosi baweechaangamo amaani mani baakwa aasi bauchuluha.
31Nae abo abeesika Omwaami ohubahoonya, ababeresaanga amaani mayaaha,
babburuha aakulu neende embaya koti eeswi
beeruha nae baahaya ohujoong'a,
bakeenda nae baahaya ohujoong'a.
©Bible Society of Kenya, 2019
©Bible Society of Uganda, 2019