Yisaaya 25
25
Olweembo lw'ohufumia Omwaami
1Ewe Omwaami, niiwe Nasaae waange;
njia ohuhufumia, njia ohufumia eliita lyao;
olwohuba oholere eby'amayia
ebyo biwatekeha ohutula hale, byadyeeri haandi by'elalira.
2Olwohuba osihiriise esiko,
ofunaake-funaake ebida byasyo;
edooho ly'abateende haba sirisisiiri esiko
haandi siryahakaluhemo ohwoombahwa daawe.
3Mani abaandu b'amaani bachia ohuhwiisamo oluyaali;
haandi ebiko by'ebyaalo byaalaba bichia ohuhutichaanga.
4Olwohuba oli obwiiruhiro bw'amaani obw'abamanani,
obwiiruhiro bw'amaani obwaab'obudahano bali mu bidinyu,
obweyikamo bu baandu bawoneramo omuyaka,
haandi esiiniha si baandu baonera omubasu;
olwohuba etima ly'abaandu baalaba liri koti efula yikwa hu sida niyirimo omuyaka kw'amaani,
5haandi etima lyaabwe liri koti obubafu mu syaalo syoomu.
Omwaami atekeha esidyaalo
6Hu Lugulu lwa Siyooni luno, Omwaami w'Obunyala achia ohutekehera abaandu boosi esidyaalo, esidyaalo sy'ebyohulya binulu, esidyaalo sy'amalwa malai keene. 7Hu lugulu luno, Omwaami achia ohumalirao engisa yibwihire abaandu boosi neende ebyaalo byoosi. 8#1 Kor 15:54; Hubwi 7:17; 21:4.Omwaami w'Obunyala achia ohusihirisiraho ohufwa huweereo elalira, haandi Omwaami Nasaae achia ohweeya amasika koosi mu moni waabwe; haandi achia ohumalao esoni hu baandu bali nacho mu syaalo syoosi. Olwohuba Omwaami mweene niye olomaloome.
9Mani bino nibyahaholehane, bahaboole bati, “Bone, wuno niye Nasaae weefwe; niye yi hubeere huliindire, huti atuwonie. Wuno niye Omwaami; yi hubeere nihuliindire; lehe husangaale haandi hweehoye olwohuba atuwoniisye.”
Nasaae achia ohusaandya Moabbu
10 #
Yis 15:1—16:14; Yer 48:1-47; Esek 25:8-11; Amos 2:1-3; Sefa 2:8-11. Omwaami achia ohuliinda Olugulu luno Siyooni, nae Abamoabbu bahaseenakirwe abuundu ano koti lu bunyaasi buseenakirwa nibabusiiha mu liina ohuholwamo embolera. 11Bahabaambule amahono kaabwe koti lu muundu osoga lw'abaambula amahono, nae Omwaami achia ohubamalamo ohwepaaha hwaabwe neende obukodyo bwaabwe, mani amahono kaabwe ako kabule obuhoonyi. 12Omwaami achia ohusihirisa ebiko byaabwe haandi alikule ebida byaabwe bileeyi bikwe aasi hu loba, mani byeehole olufu lweene.
©Bible Society of Kenya, 2019
©Bible Society of Uganda, 2019