Yisaaya 24
24
Omwaami achia ohusihirisa esyaalo
1Bone, Omwaami achia ohutusa mu syaalo buli siindu, achia ohusisihirisa mani asirehe bihaya,
yahasifuunihe mani asalaanie abaandu basyo.
2Ebiha bichia ohwoola ayire buli muundu nasilala; abaandu ba buli ludaalo, banyoole omukabo nasilala neende abalaamisi;
abawaambe, neende abaami baabwe;
abakuli, neende abakusa;
abeeyola, neende abeeyosa;
abatuunga, neende abo abatuungwa.
3Esyaalo syahatuswemo buli siindu mani syadoong'a bihaya;
olwohuba Omwaami niye olomaloome emboosi yino.
4Esyaalo syoosi syoomere, haandi buli siindu siriho sihoohere,
esyaalo siweeremo amaani haandi sihoohere;
ekulu neende esyaalo byoombi, biweeremo amaani.
5Abaandu banyaasire esyaalo;
olwohuba bafunaake amalako k'Omwaami,
haandi haba sibooseresa by'alagira,
mani bafunaake endagaano yae eyitaakama.
6Mani sakira esyaalo sibwaabirwe,
haandi abaandu baamwo nibahirwa omusaango;
mani sakira abaandu baamwo basihiriiswe,
abaonereo, badiidi muno.
7Emisabbiibbu kihoohere,
amalwa kahendeerere.
Abali nibasangaala, bulaanu bayuuya-bwayuuya.
8Ekono lai ly'obuhana liweereo,
neende esiyoka sy'engalaakasa syakaame,
ekono ly'aduungu liweereo.
9Haba sibasyeemba nibang'wa amalwa;
abali nibang'wa amalwa kameesa, bulaanu kabahahaata nibakang'wa.
10Esiko siyobere,
buli muundu yeyikaliire mu nyuumba yae, haandi saafukiirira omuundu yeesi ohwiingira.
11Abali hu ngira bayokera, olwohuba haba sibali neende amalwa k'ohung'wa.
Esangaalo lyoosi lyakaame;
ebidyaalo byoosi byaakama hale.
12Esiko sisihiriiswe,
ebiruwa byasyo bifunaakwe.
13Mani byahabe biti mu syaalo syoosi,
mu byaalo byoosi.
Byahabe koti lu bibechaanga ekesa niliweere,
ebyaamo byoosi nibimalire ohunokwa hu misaala,
haandi emiseituuni nikiweereho.
14Abo abaliba nibaonereo, baheembere mu kono ly'aakulu,
nibeemba neende esangaalo liingi, nibali emuumbo, nibafumia oluyaali lw'Omwaami.
15Mani sakira, eng'we abali ebukwe, mwiise oluyaali mu Omwaami;
abo abali aambi neende enyaanja, mukinie Omwaami Nasaae wa Yisiraeli.
16Huwulira enyembo chifumia nichitula hu njakamo y'esyaalo,
nichifumia Omuluungifu Mweene.
Nae ese mboola endi, “Mbweerera sa,
mbwereeremo elalira. Chinjakaanire!
Olwohuba abalyaamo olukwe, bemeeda sa ohulyamo olukwe,
haandi ohulyamo olukwe hwaabwe hwemeeda sa bwemeeda.”
17Ewe omuundu womu syaalo,
ebitiisa, neende ameena, neende omuteego, bihutekere!
18Mani buli muundu oliiruha ohweewonia ebitiisa
yahakwe mu liina;
haandi oyo owahasiingire mani yaatula mu liina,
yahadiirwe neende omuteego.
Olwohuba efula y'amaani yahakwe ohutula mu ekulu,
haandi emisiingi ky'esyaalo kyahadengaane.
19Esyaalo syahaadihaniremo elalira,
esyaalo syahamekuhemo elalira,
esyaalo syahadenganisibwe elalira.
20Esyaalo sidandaamira koti omumeesi,
esyaalo sidengaana koti esikaali;
obusito bwasyo nibwo ebyonoono byasyo,
mani nisyahakwe, haba sisyahasiingire haandi.
21Ebiha ebyo nibyahoole, Omwaami yahasaande,
ab'obunyala bali aakulu, muukulu,
neende abatuki bomu syaalo, hu syaalo.
22Ab'obunyala abo, neende abatuki abo, bahabuungihwe alala
koti ababoye babasukuuwe mu liina;
baheekalirwe mu jeela,
mani bahasaandisibwe endaalo nyiingi nichibitireo.
23Ao mani esiirima syahadiire elyuuba,
haandi omubasu kwahahae ohufwa;
Olwohuba Omwaami w'Obunyala niye ochia ohuba omutuki
hu Lugulu lwa Siyooni neende mu Yerusalemu
mani mu moni w'abeemeresi, achia ohweekesa oluyaali lwae.
©Bible Society of Kenya, 2019
©Bible Society of Uganda, 2019