Yisaaya 1
1
1 #
2 Abat 15:1-7; 2 Biha 26:1-23;
2 Abat 15:32-38; 2 Biha 27:1-9;
2 Abat 16:1-20; 2 Biha 28:1-27;
2 Abat 18:1—20:21; 2 Biha 29:1—32:33. Ohuboneherwa hwa Yisaaya omwaana w'Amosi, hu yaboneramo ebiindu bidiira hu Buyudaaya neende Yerusalemu mu ndaalo cha Wusia, Ahasi, Yonataamu neende Hesekia, abatuki ba Buyudaaya.
Nasaae yoolobya abaandu bae
2Wulira, ewe ekulu, haandi ewe esyaalo tekeeresa;
olwohuba Omwaami niye olomaloome:
Abaana bandanyoola ndahusa,
nae baanjemeere.
3Eng'oombe yimanyire omweeneyo,
haandi esuhiri yamanya abuundu yi mwaami wayo ayiliisirangamo;
nae abaandu baange Abaisiraeli haba sibaamanyire daawe,
abaandu baange beene, haba sibabaasa daawe.
4Chihwakaanire, ewe esyaalo syonooni,
abaandu beechuuleho ebyonoono,
abeechuhulu b'abonooni,
abaana bahola ebidoondobanu!
Bamalire ohutula hu Omwaami,
bamalire ohulekeeresa Omwoolerefu wa Yisiraeli,
bamalire ohumufudatira elalira.
5Lwasiina mwemeeda ohujeema,
hu mudoong'e nimusaandisibwa?
Omutwe kwoosi kwichuule ebikoonjo,
haandi omwooyo kwoosi kuweeremo amaani.
6Ohutula hu mutwe ohwoolera elalira hu makulu,
abulao abuundu alamu,
nae ohutusaho ebinyubuluuhe neende ebifwiimba byoong'ene
neende ebikoonjo bidaacha;
basisiiri ohubifwiinya, noomba ohubiboya,
noomba ohubibahaho amalesi.
7Esyaalo syeeng'we syoosi sidoong'ere esihaya,
ebiko byeeng'we byoosi bisaambirwe neende omuliro mani byasihirira;
abeene nimubona
abateende baamba esyaalo syeeng'we;
esyaalo syeeng'we sidoong'ere esihaya, koti esiwaambirwe neende abateende.
8Mani Siyooni syoong'ene nisyo esidoong'ere
koti esikaali mu ndalo y'emisabbiibbu,
koti esiyuumba sibaliindiramo omukuunda kw'amaondo,
koti esiko si bebodoohanie ohuwaamba.
9 #
Huc 19:24; Rom 9:29. Nae Omwaami w'Obunyala
aba n'atatuleheraho abaandu abadiidi ohuwonaho,
hwahabeere koti Sodomu,
haandi hwaheeholere koti Gomora.
10Wulire emboosi ch'Omwaami,
eng'we abatuki ba Sodomu!
Tekeerese enjekesa ya Nasaae weefwe,
eng'we abaandu ba Gomora!
11 #
Amos 5:21,22. Omwaami ateeba ati;
Ebiyaanwa byeeng'we biingi bi muyaana bihoonya siina?
Sinyihiire ebiyaanwa bisaambwa eby'amakoondi mamiiku
neende amasinya ak'esolo cheeng'we enginu.
Haba siindaha amabaanga k'eng'oombe esurusi,
noomba ak'amakoondi madoto, noomba ak'embusi ehole.
12Wiina mweene owabalagira
ohwichaanga mu moni waange
ohuseenakiraanga sa olwaanyi lwaange?
13Mutemeeda ohuleeta ebiyaanwa bitaalimo amahuluundu.
Sinyihiire obubbaani bu munioohesera.
14Sinyiihire elalira
ebidyaalo byeeng'we eby'Omwoosi muyaaha neende eby'endaalo cheeng'we ehuluundu;
15Mani sakira, nimunasiingiseenge amahono keeng'we aakulu nimulaama esaala cheeng'we,
haba siinjia hubadeebaho daawe;
kata mwahalaama mutye,
haba siinjia hutekeeresa;
amahono keeng'we keechulaho amabaanga.
16Abeene mwesaabe, mani mulabe;
mutuse ebyonoono bi muli ohuhola
mu moni waange;
mwaakame ohwonoona,
17mweeke ohuhola ebilai.
Mubone muti muhola obuhoyera
kololeenge abafwiinyirira abasyaabwe;
mulwaanirireenge abaana bafwiirwe,
mukayirireenge abahasi bafwiirwe.
18Omwaami aboola ati,
“Bulaanu mwiiche huteesere alala;
kata ebyonoono byeeng'we abyahaba ebyaahanyu koti amabaanga,
bichia ohulaba bibe koti amakina k'efula;
kata abyahaba nibyatalaga byahanya muno,
bichia ohulaba bilafuye koti enyaange.”
19Nimunabecheenge abeetekefu haandi abawulisi,
munaalicheenge ebyaamo bilai bitula mu syaalo syeeng'we.
20Nae nimuhaya ohuwulira mani mwajeema,
mwaheetweenge neende olugaanga;
ese Omwaami, niise olomaloome.
Esiko syonooni
21Esiko syali esyeesikwa
bulaanu syeholere koti omuhasi mucheke,
esiko esyali nisyeechulamo obwadyeeri.
Hale syali syamenyamo abaandu baluungifu,
nae
bulaanu abatemo nibo abasidoong'amo.
22Yerusalemu, efeesa yao yeholere esiindu sitalimo engaanga,
efiini yao yiri koti yibasasiremo amaachi.
23Abeemeresi bao bajeemu nibo
haandi bakeendera alala neende abeebi.
Buli muundu yaheera engusi
haandi ang'aang'abanira sa ebiyaanwa bi bababeresa.
Haba sibadeebayo hulwaanirira abaana bafwiirwe,
haandi abahasi bafwiirwe nibaleeta amaliro kaabwe yi bali, haba sibabawulira.
24Sakira Omwaami w'Obunyala,
ow'Amaani Mweene wa Yisiraeli
aboola ati:
“Eee, njia ohwiisa etima lyaange hu basuku baange,
mani omweene njia ohwetuunga hu basuku baange.”
25Njia ohuhwechuuhira
mani hunyuhuule koti lubanyuhulaanga ebyuuma
mani hutusemo obuchaafu bwao bwoosi.
26Mani njia ohuhukalusira abakayi abali koti abataangira,
haandi abakeraki bao bachia ohuba koti abataangira.
Ebyo nibiweere, bachia ohuhulaanga bati, esiko siluungifu,
esiko syeesikwa.
27Obwadyeeri nibwo obuchia ohununula Siyooni,
haandi obuluungifu nibwo obuchia ohununula abaandu baamwo abeyolobya.
28Nae abajeemu neende abonooni bachia ohusihirira elalira,
neende abo abebwaaba Omwaami, bachia ohumalwao.
29Mani esoni chichia ohubadiira hulw'emisaala
kimweenamiraanga;
neende hulw'endalo chimwayanaanga eyiri emisaambwa.
30Olwohuba muchia ohuhooha koti emisaala
ki amasaafu kachio kahoohaanga,
haandi koti endalo choomereramo amaachi.
31Ab'amaani bachia ohuba koti obunyaasi bwoomu,
haandi ebyonoono bi bahola bibe koti enjeserye ch'omuliro,
mani boombi babasaambire alala,
mani yahabuleo omuundu yeesi owahanyale ohukayira ohusihirisibwa hwaabwe.
©Bible Society of Kenya, 2019
©Bible Society of Uganda, 2019