Esekeeli 41

1Omusaacha oyo haandi yaanjira mu siseenge sy'akati, Abuundu Woolerefu. Yapiima omulyaangiro kuchiamo yanyoola ati kwali emiita chidatu hu lwaande lulala, haandi emiita chidatu hu lwaande luundi. 2Omulyaango kweene kwali emiita chitaanu obutakalafu. Olwaande lulala lw'omulyaango lwali emiita chibiri neende esituundu, haandi olwaande luundi lwosi lwali emiita chibiri neende esituundu. Yapiima Esiseenge Syoolerefu syeene, nisiba obuleeyi, emiita amahumi kabiri nae obutakalafu, emiita ehumi. 3Yeengira mu siseenge syomuukati syeene. Yapiima obutakalafu bw'olwiiki lwingiramo, bwali emiita ndala ohwiiha aasi, neende emiita chidatu obutakalafu. Obutakalafu bw'ebida buli lwaande bwali emiita chidatu neende esituundu. 4Yapiima esiseenge syomuukati syeene, mani syaaba emiita ehumi obuleeyi neende obutakalafu bwali nibwaakana nasilala. Esiseenge sino nisyo esyali nisimaliirihirayo elalira mukati. Omusaacha oyo niyamboolera ati, “Sino nisyo Abuundu Ahiramo Obwoolerefu.”

Ebiseenge byoombahwa hu ndulo w'esida sy'Enyuumba ya Nasaae

5Omusaacha oyo yapiima obutakalafu bw'esida sy'Enyuumba ya Nasaae, yaanyoola ati bwali emiita chidatu. Hu ndulo w'esida sino, ohwebodoohania Enyuumba ya Nasaae yoosi, bali boombahaho ebiseenge bidiidi, buli situlayo syali esy'emiita chibiri obutakalafu. 6Ebiseenge bidiidi bino ebyali hu ndulo w'Enyuumba ya Nasaae byali eby'egoroofa chidatu ohuchia aakulu. Hu buli bwaalo bw'egoroofa, hwaliho ebiseenge amahumi kadatu. Esida sy'erwaanyi, esy'Enyuumba ya Nasaae, hu bwaalo bwa buli goroofa, syali esidiidi hooho ohuhira esy'aasi wasyo. Ebiseenge ebyo nibinyala ohweema ataali ohusiirwa daawe. 7Mani ebida by'Enyuumba ya Nasaae, n'obibonera erwaanyi, byabonehanaanga koti ebyaakanirira obutakalafu ohutula aasi ohwoola aakulu. Hu ndulo w'esida sy'erwaanyi esy'Enyuumba ya Nasaae, hwali hwoombahaho amadaara matakalafu kabiri nikaniina aakulu. Sakira baniinaanga ohutula hu goroofa y'aasi ohwoola hu y'aakulu, nibabitira hu goroofa y'akati. 8Ndabona haandi endi Enyuumba ya Nasaae eyo yaliho olubburaanda ohuyebodoohania. Omusiingi kw'Enyuumba ya Nasaae kwali emiita chibiri neende esituundu obutakalafu ohuyebodoohania yoosi. 9Obutakalafu bw'esida sy'erwaanyi sy'enyuumba y'egoroofa eyiri hu ndulo w'Enyuumba ya Nasaae, bwali emiita chibiri neende esituundu. Haandi akatikaati w'enyuumba yiri hu ndulo w'Enyuumba ya Nasaae, 10neende enyuumba chiri mu lwaanyi, waliwo ahakira h'emita ehumi ohwebodoohania Enyuumba ya Nasaae hu buli lwaande. 11Enjiki ch'ebiseenge byoombahwa hu ndulo w'Enyuumba ya Nasaae, cheyikuliraanga hu lwaande lw'ahakira aho. Olwiiki luundi lwatingaalaanga emukulu, nae olwiiki luundi nilutingaala emwaalo. Ahakira hadoong'ao akatikaati, hali ah'emiita chibiri neende esituundu hu buli lwaande.

Esyoombahe siri hu lwaande lw'emuumbo

12Esyoombahe syali nisitingaalire Enyuumba ya Nasaae hu lwaande lw'emuumbo, syali esy'emiita amahumi kane neende chitaanu obuleeyi, neende emiita amahumi kadatu neende chitaanu obutakalafu. Obutakalafu bw'esida syayo bwali emiita chibiri neende esituundu ohuyebodoohania yoosi.

Ebikero byoosi eby'esyoombahe sy'Enyuumba ya Nasaae

13Omusaacha oyo yapiima erwaanyi w'esyoombahe sy'Enyuumba ya Nasaae yoosi, yaanyoola ati syali emiita amahumi kataanu obuleeyi. Yapiima obuleeyi ohutula emukoongo w'Enyuumba ya Nasaae, ohwoolera elalira yi syoombahe siri emuumbo syaakama, bwali emiita amahumi kataanu. 14Obutakalafu bwomu moni w'Enyuumba ya Nasaae hu lwaande lw'ebukwe, alala neende ahakira hu nyaande choombi, bwali bwoosi emiita amahumi kataanu. 15Yapiima obuleeyi bw'esyoombahe siri olwaande lw'emuumbo, alala neende obukira hu nyaande choombi, bwosi bwali emiita amahumi kataanu.

Ebidiira hu syoombahe sy'Enyuumba ya Nasaae mu bwiichufu

Esiseenge syotulaho hu wiingire mu Nyuumba ya Nasaae, Abuundu Woolerefu, neende Abuundu Ahiramo Obwoolerefu, 16byali nibyateebwaho embaao, ohutula hu bweeru ohwoola hu madirisa. Amadirisa ako kali nikanyala ohebwiihwaho. 17Hu bida by'Enyuumba ya Nasaae ebyomukati neende eby'erwaanyi, ohwoola hu bbaanga aakulu w'olwiiki, hwoosi hwali nihwachoorwaho ebifwaanani 18by'amahiindu neende eby'abakerubbi. Buli hiindu lyali akatikaati w'omukerubbi neende omukerubbi wuundi. Buli mukerubbi yali naali neende obweeni bubiri: 19obweeni bw'omuundu nibwewuunjire ehiindu hu lwaande lulala, haandi obweeni bw'edalang'i nibwewuunjire ehiindu hu lwaande luundi. Byali nibyachoorwa bityo ohwebodoohania esida syoosi, 20ohutula hu bweeru ohwoola aakulu w'enjiki. 21Emilyaango ky'Abuundu Woolerefu kyali nikyaakanirira olwaande-n'olwaande.

Alutaari y'embaao

Mu moni w'omulyaango kw'Abuundu Ahiramo Obwoolerefu, waliwo esiindu sifwaanana koti 22alutaari y'embaao. Yali ey'emiita ndala neende esituundu obuleeyi ohuchia aakulu, neende emiita ndala obutakalafu. Esoonda chao, obwiihalo bwao neende hu ndulo hwao, byoosi byali eby'embaao. Omusaacha oyo mani niyamboolera ati, “Yino niyo emeesa yiri mu moni w'Omwaami.”

Enjiki

23Lwaliwo olwiiki lwiingira Abuundu Woolerefu, neende olwiiki lwiingira Abuundu Ahiramo Obwoolerefu. 24Enjiki echo chali ech'ebibaajo bibiri hu buli lwiiki, ebyewubaanga akati enjiki nicheyikula. 25Haandi hu njiki ch'Abuundu Woolerefu echo hwali nihwachoorwaho ebifwaanani by'amahiindu neende abakerubbi, koti ebyali nibyachoolwa hu bida. Erwaanyi bw'esiseenge syotulaho hu woole mu lwaanyi, wali niwabwiihwaho neende olubbaao. 26Hu bida by'esiseenge esyo, hwaliho amadirisa akateyikulao daawe, akali nikachoorwaho ebifwaanani by'amahiindu. Ebida byali hu ndulo w'Enyuumba ya Nasaae eby'embaao ndakalafu.

Currently Selected:

Esekeeli 41: SAMIA

Highlight

Copy

Compare