Esekeeli 30

Omwaami achia ohusaandya Misiri

1Omwaami haandi yalomaloma naange, niyamboolera ati: 2“Ewe omwaana w'omuundu, laangirira oboole bi Ese Omwaami Nasaae mboola oti:

Mulire nimuboola muti, ‘Katunyoole olwohuba oludaalo luli nduunya!’

3Oludaalo luli aambi,

oludaalo lw'Omwaami luli aambi.

Lwahabe koti oludaalo lw'ebireesi,

oludaalo lu ebyaalo byahasaandisibwa.

4Yahabeeo ebiita mu Misiri,

neende amasira maangi mu Etiopia.

Abaandu baangi baheetwe mu Misiri,

obuyiinda bwasyo bwahayaaywe,

emisiingi chasyo chahafunakwe.

5“Abaandu ba Etiopia, neende Libbya, neende Ludi, Abaaraabbu boosi neende aba Libbya, neende abaandu bomu byaalo byoosi abaholera alala nabo, bahafwiire mu biita ebyo.

6“Omwaami aboola ati:

“Abo abahoonyaanga Misiri bachia ohukwa,

haandi amaani kakeraanga nisyehuuduumbasa, kachia ohwiiswa aasi.

Abaandu ba Misiri bachia ohwiitirwa mu biita;

ohutulira elalira Migidooli ohwoola Siyeene.

Ese Omwaami Nasaae Niise oboola.

7Misiri syaheehole ekuunda ohuhiraho ebyaalo biindi byoosi ebyali nibyeeholere amakuunda;

haandi ebiko byasyo byahasihe ohuhiraho ebiko biindi byoosi ebyali nibyasiha.

8Nindahamale ohutubula omuliro hu Misiri,

abasihoonya boosi nibafunaakwe,

ao niwo yibahamanyire bati Niise Omwaami.

9“Hu ludaalo olwo, ndahatume bawamwaanda bachie batiise abaandu ba Etiopia abatabaasirisaho esiindu syoosi. Bahakwiisweho amasira hu ludaalo lu Misiri syahasaandisirweho. Olwohuba bone, oludaalo olwo luli ohwiichia.”

10Omwaami Nasaae aboola ati:

“Njia ohwaakamya obuyiinda bwa Misiri,

nindehoonyera Nebukadineesa omutuki wa Bbabbilooni.

11Oyo neende Ab'amaye bae abahiramo obwaalaba mu byaalo byoosi,

baheeche mani basihirise esyaalo esyo.

Bachia ohusobolayo engaanga chaabwe balwaanie Misiri,

mani beechuse esyaalo esyo emilaambo ky'abaandu beeterwe.

12Ndahahamye omwaalo kwa Naili,

ndiise esyaalo sy'e Misiri mu mahono k'abaandu babi.

Njia ohuleha walukeenda

banyaase esyaalo esyo neende buli siindu sirimo.

Ese Omwaami Nasaae Niise olomaloome.”

13Omwaami Nasaae aboola ati: “Njia ohusihirisa ebiloongaloongwe bya Misiri,

haandi njakamye ebifwaanani mu Mefisi.

Haba siyahabeeo omuundu kata mulala owahatuke mu syaalo sy'e Misiri;

mani njia ohusitaamo ebitiisa,

14Njia ohuhola Patiroosi sibe ekuunda

haandi njia ohutubula omuliro hu Sowani.

Njia ohusaandya Tebbesi.

15Njia ohumalira etima hu Pelusiumu,

esiko sy'amaani sy'e Misiri.

Haandi njia ohumalirao elalira abaandu ba Tebbesi.

16Njia ohutubula omuliro hu Misiri;

haandi esiko sya Pelusiumu syahasaande muno.

Ebida bya Tebbesi byahalikulwe,

esiko esyo sibeecheenge sa mu hutya buli ludaalo.

17Abasaacha baraaga abomu biko bya Oni neende Pibbeseeti baheeterwe mu biita.

Haandi abahasi bahayirwe mu buwaambe.

18Esiirima syahadiire Tahipaneesi,

hu ludaalo lu ndahafunakireho obunyala bwa Misiri,

mani ohwehuduumbasa hw'amaani hwasyo hwahaakame.

Esireesi syahabwiihe hu Misiri,

abaandu bomu biko byasyo bahayirwe mu buwaambe.

19Olwo nilwo lu njia ohusaandya Misiri.

Ao niwo yibahamanyire bati, Niise Omwaami.”

Obunyala bw'omutuki wa Misiri bwamalwao

20Hu ludaalo lwa chitaanu-na-chibiri olw'omwoosi kwaamberi, mu mwaaka kw'ehumi neende mulala, nihuli mu buwaambe, Omwaami yalomaloma naange n'aboola ati: 21“Ewe omwaana w'omuundu, funaake omuhono kwa omutuki wa Misiri. Bona, kusisiiri ohuwaambwa, kwaaboywaho ebbaandeji, kwaawona kwaaba okw'amaani, haandi kwachaaka ohudiira olugaanga. 22Mani sakira Omwaami Nasaae aboola ati: Bona, ndi omusuku wa omutuki wa Misiri, njia ohufunaka amahono kae koombi, omuhono kulimo amaani neende okwo okwafuniha; mani olugaanga lu adiirire luchia ohutula mu muhono kwae lukwe aasi. 23Njia ohusalaanisirya Abamisiri mu byaalo byohu syaalo biingi, mani bakotere mu byaalo. 24Haandi njia ohwomiisa amahono k'omutuki wa Bbabbilooni, mani nde olugaanga lwaange mu muhono kwae; nae njia ohufunaka amahono ka omutuki wa Misiri, abiinduhire mu moni w'omutuki wa Bbabbilooni, koti lu omuundu ofumiitwe yahabiinduhaanga naali mubuchuuni. 25Njia ohwomiisa amahono k'omutuki wa Bbabbilooni, nae amahono ka omutuki wa Misiri kahadeembuhe kaakwa. Nae nindahate olugaanga lwaange mu muhono kw'omutuki wa Bbabbilooni, mani alusyoomese mu syaalo sy'e Misiri; niwo yibahamanyire bati, Niise Omwaami. 26Njia ohusalaanisira Abamisiri mu byaalo biingi byohu syaalo mani bakotere mu byaalo. Olwo nilwo lu bahamanyire bati, Niise Omwaami.”

Currently Selected:

Esekeeli 30: SAMIA

Highlight

Copy

Compare