Esekeeli 21

Olugaanga lw'Omwaami

1Omwaami yamboolera ati: 2“Ewe omwaana w'omuundu, tingaala Yerusalemu mani oyaale hu byahakwe Abuundu Woolerefu, haandi oyaale n'olabula esyaalo sya Yisiraeli, 3oboolere esyaalo sya Yisiraeli oti: ‘Bone, Ese Omwaami mboola endi, ndeeholere omusuku wao, mani njia ohusobola olugaanga mu sibiihiro syalwo, mani sihirisire elalira abaandu baluungifu alala neende ababi. 4Olwohuba njia ohusihirisa abaandu baluungifu alala neende ababi, mani sakira ndasobolayo olugaanga lwaange, ohulwaania abaandu boosi ohutula emwaalo ohwoola emukulu. 5Abaandu boosi bahamanye bati, Ese Omwaami, sobooleyo olugaanga lwaange ohulutusa mu lusibiihiro syalwo, haandi haba siinjia ohulukobosamo daawe.

6“Mani sakira, ewe omwaana w'omuundu, biinduha koti omuundu oli mubuchuuni buungi muno mu mwooyo, biinduha abaandu boosi nibabona. 7Nae nibahuteeba bati, ‘Lwasiina obiinduha?’ Obakobolaangamo oti, ‘Hulw'emboosi chi mbuliire, ech'ebiindu bicha ohukwaao. Nibyahoole, buli muundu achia ohweyendeeherera mu mwooyo, haandi amahuumbo kaabwe kahahinaakirire. Bone, ebyo byoosi bicha ohukwaao, mubwadyeeri bweene, bicha ohuba bityo.’ ” Nilwo lu Omwaami Nasaae aboola.

8Omwaami yalomaloma naange n'aboola ati: 9“Ewe Omwaana w'Omuundu, laangirira noboola oti, Omwaami aboola ati:

Olugaanga, olugaanga lwakaalwe haandi lumesamesa.

10Lwakaalwe ohwiita,

mani lumesamesa koti olumesu.

Mani huneehoye hutye?

Abaandu baange balekeerese buli hulabulwa neende buli sibonereso syoosi.

11Olugaanga luli ohwaakalwa,

lutekeehwe ohwehoonyerwa.

Lwokiiywe haandi lwasimuulwaho,

ludiiswe mu mahono k'omwiiti.

12Hubba embuungu neende esibeera, ewe omwaana w'omuundu,

olwohuba olugaanga luno lwiichiire abaandu baange

neende abeemirisi ba Yisiraeli.

Bachia ohwiitirwa

alala neende abaandu baange baandi.

Mweehuye hu mataango keeng'we nimuweeremo omwooyo.

13Olwohuba njia ohuteema abaandu baange mberi,

nae nibahaya ohweyolobya,

ebiindu bino byoosi bicha ohubakwaaho.” Nilwo lu Omwaami Nasaae aboola.

14“Bulaanu ewe omwaana w'omuundu, laangirira mani ohupaame amayu, mani olugaanga lufumitire habiri abo baluchia ohwiita, eee, lufumite neende ehabi lyohudatu. Olwo nilwo olugaanga lwiita muno, olugaanga lwiita haandi olusihirisa. 15Olugaanga olwo lukera abaandu baange nibawaamo omwooyo, haandi abaandu baangi bakwa hu biruwa byaabwe. Olugaanga lumesamesa koti olumesu, olwetekeehe ohwiita. 16Wehaliirise otingaale bulai hu muhono muluungi neende hu muhono mukaada, mani oteme. 17Syesi njia ohupaama amayu, mani etima lyaange liwuuchuluhe. Ese Omwaami, Niise olomaloome.”

Olugaanga lw'omutuki wa Bbabbilooni

18Omwaami haandi yalomaloma naange n'aboola ati: 19“Ewe omwaana w'omuundu, taao engira chibiri chi omutuki wa Bbabbilooni anyala ohubitiraho n'adiirire olugaanga lwae. Engira echo choombi chihoyere chichaakire mu syaalo silala. Ta esipaande yi ngira echo choombi chibukaananira, mani weekese olwaande lu siko siri. 20Yekesa engira yi mutuki anabiteeho n'adiire olugaanga n'achia Rabba, esiko sy'Abaamooni, neende engira yichia mu Buyudaaya neende mu siko sisite sya Yerusalemu. 21Olwohuba omutuki wa Bbabbilooni yeemere mu masang'aangira, yi ngira echo choombi chibukaananira naadaha ohumanya ngira siina yeene yaanadiire. Adeengaania obusaale, mani yeteeba hu musaambwa chae abomu daala. Ahebera esini sy'esolo siyaanwayo koti esiyaanwa. 22Bulaanu, hu muhono kwae muluungi, mulimo ahasaale ahateerweho hati, ‘Yerusalemu’. Ahalolero aho hamulakula nihaboola hati ateeo amamiiku katwoomane neende ebiruwa, ohubuungiha ebituuli by'eloba, neende ohutaao eminaara ech'ohuwoneseraho esiko. 23Nae eyiri abaandu bomu Yerusalemu, sino bachia ohusibona koti obulakusi bw'obubacha, hulw'endagaano chi bahola nabo. Nae obunabbi buno bwiichire ohubeechulisa ebyonoono byaabwe bi bahola, neende ohubalabula buti, bachia ohuwaambwa. 24Mani sakira Omwaami Nasaae aboola ati: Olwohuba mukerere ebyonoono byeeng'we byeechuliswa, ao mani ebyonoono byeeng'we bibwiihuulwe. Mu buli siindu si muhola, ebyonoono byeeng'we biboneha sa. Mani koti lu mu biinjichulisa buli siha, njia ohubaleha muwaambwe neende abasuku beeng'we.

25“Nae ewe omutuki mubi wa Yisiraeli, oludaalo lwao lw'ohuheengerwaho omusaango lwoolere, neende ebiha byohu saanda hwao hw'enjakamo. 26Omwaami Nasaae aboola ati; Tusaho ekofia yao y'obutuki hu mutwe, olwohuba ebiindu haba sibicha ohudoong'a nasilala haandi daawe. Olwohuba abaloonga nibo abachia ohukiniswa, nae abahunuufu bachia ohwiiswa aasi. 27Esiko esyo, njia ohusisihirisa siweereo elalira, mani haba sisyahakoboleo ohwoola lu mweneesyo yaheechere; mani muberese esiko esyo.

Olugaanga neende Abaamooni

28 # Yer 49:1-6; Esek 25:1-7; Amos 1:3-15; Sefa 2:8-11. “Ewe omwaana w'omuundu, laangirira, mani oboole oti: Omwaami Nasaae aboola ebidiira hu Abaamooni abanyeka Abaisiraeli. Baboolere oti:

‘Olugaanga lusobolwa ohwiita.

Lusiimuulirwa ohwiita haandi lumesamesa koti olumesu.’

29Nae bachia ohuhubona koti omuundu oboneherwa ebitaali ebyadyeeri, haandi olaangirira eby'obubacha. Muli ababi haandi abonooni, haandi oludaalo lweeng'we lw'enjakamo haandi olwohusaandiraho lwolere.

30“Kobosa olugaanga mu silaalo syaalwo. Abuundu yi mwaloongerwa, mu syaalo si mwahuliramo, nimwo mu njia ohubaheengera omusaango. 31Mbamaliireho etima lyaange; libasaambe koti enjeserye ch'omuliro. Njia ohubadiisa mu mahono k'abaandu baalaba koti ebisolo, abamanyihaane mu husihirisa. 32Muchia ohusihiriswa neende omuliro. Amabaanga keeng'we kaheediswe mu syaalo syeeng'we; muhaye ohwiichuliswa haandi. Olwohuba Ese Omwaami, Niise oboolere.”

Currently Selected:

Esekeeli 21: SAMIA

Highlight

Copy

Compare