Esekeeli 11

Yerusalemu siheengerwa omusaango

1Mwooyo w'Omwaami haandi yangiinga yanjira ena esiruwa sy'ebukwe esy'Enyuumba ya Nasaae, esyali nisyatingaala ebukwe. Nae bone, hu mulyaango kw'esiruwa esyo, ndabonayo abasaacha amahumi kabiri neende bataanu; omwo nimwo omwali Yasania omwaana wa Asuuri, neende Pelatia omwaana wa Bbenaya, abeemirisi b'abaandu. 2Omwaami yamboolera ati: “Ewe omwaana w'omuunndu, bano nibo abaandu batekehaanga ohwonoona, haandi ab'engeraka mbi mu siko sino. 3Baboola bati, ‘Ebiha bisisiiri ohwoola eby'ohwoombaha enyuumba. Esiko sino nisyo endamu yideeha, nae efwe niifwe enyama yideehwa.’ 4Mani sakira, Ewe omwaana w'omuundu laangirira, laangirira nobanyeka.” 5Mwooyo w'Omwaami yanjichaho, mani n'amboolera ati: Boola oti Omwaami aboola ati, “Eng'we abaandu bomu syaalo sya Yisiraeli, manyire bi muboola neende bi mubaasa. 6Mwemeedere ohwiita abaandu mu siko sino, haandi mwichuuse emilaambo hu ngira chasyo. 7Mani sakira Omwaami Nasaae aboola ati: “Abaandu ba mwiitire mubasukuune mu ngira chasyo, abo nibo enyama, nae esiko sino nisyo endamu. Njia ohubeerusa musitulemo. 8Mutiire olugaanga, nae njia ohuleeta abaandu bali neende engaanga babaseete. Ese Omwaami niise oboola. 9Njia ohubeerusa mbatuse mu siko sino, mbadiise mu mahono k'abateende, mani babaheengere omusaango kw'ohufwa. 10Mwaheeterwe mu biita mu syaalo syeeng'we sya Yisiaraeli sino. Ao niwo yimwahamanyire muti Niise Omwaami. 11Esiko sino haba sisyahabaliinde koti lu ndamu yiliindaanga enyama yaamwo. Njia ohubaheengera omusaango, buli abuundu woosi yi mwahabe mu syaalo sya Yisiraeli. 12Ao niwo yimwahamanyire muti Niise Omwaami, olwohuba mujemeere amalako kaange neende ebilagiro byaange, nae mwaloondakana neende amalako k'ebyaalo bi bibeebodohaanie.”

13Olwoola, nindali nisilaangiraanga ebyo, Pelatia omwaana wa Bbenaya naafwa. Mani niingwa aasi hu loba mafumaame, nindirira mu kono ly'aakulu, nimboola endi, “Wuuwi, Ewe Omwaami Nasaae! Ochia ohumalirao elalira Abaisiraeli badoong'ereo kose?”

Esisuubise sy'Omwaami eyiri abaandu bali mu buwaambe

14Omwaami yamboolera ati: 15“Ewe omwaana w'omuundu, abaandu basidoong'ere mu Yerusalemu bali ohuhulomalomaho, neende hu beeho bao, neende Abaisiraeli boosi abali mu buwaambe. Bali ohuboola bati, ‘Abaandu bali mu buwaambe abo batulire hu Omwaami, mani bulaanu atubereese esyaalo esyo sibe esyeefwe.’ 16Mani sakira boolera abali mu buwaambe basyo oti, ‘Omwaami Nasaae aboola ati: kata yahaba mbwe ndabatusa mu syaalo syaabwe mani ndaabayira mu byaalo by'eyale yibasaalanira mu byaalo biingi, nae mu biha biriwo bulaanu, njia ohuba alala nabo mu byaalo bi bamenyamo.’ 17“Mani sakira boola oti, Omwaami Nasaae aboola ati: ‘Njia ohubabuusa alala ohubatusa mu byaalo, neende mu byaalo bimwasaalanira, haandi njia ohubaberesa esyaalo sya Yisiraeli.’ 18Mani nibahakobole, bahamaleyo buli siindu sibi syoosi, neende eby'omusiro byoosi bi bahanyooleyo. 19#Esek 36:26-28.Ndahababerese omwooyo muyaaha, neende ebibaaso biyaaha. Njia ohubatusamo omwooyo mwoomeranu koti ekina, mani mbaberese omwooyo muloonga kuwulira. 20Ao mani banaadiireenge amalako kaange, mani baholeenge ebiindu bi mbalagira ohuhola. Banaabecheenge abaandu baange, mani syesi mbe Nasaae waabwe. 21Nae abo bulaanu abamaliire omwooyo kaabwe ohuhola eby'omusiro neende ebyohwebwaaba byaabwe, njia ohubasaandyaanga ohweema hu biholwa byaabwe bibi. Olwo nilwo lu Ese Omwaami Nasaae mboolere.”

Oluyaali lwa Nasaae lutula mu Yerusalemu

22 # Esek 43:2-5. Ao mani abakerubbi nibachaaka ohubburuha, emikuruduumu nikiri kibiri hu ndulo, oluyaali lwa Nasaae wa Yisiraeli niluli aakulu waabyo. 23Oluyaali lw'Omwaami nilusiingira nilutula akatikaati w'esiko, mani nilweema hu lugulu luli hu lwaande lw'ebukwe w'esiko. 24Muhuboneherwa ohwo, Mwooyo wa Nasaae yangiinga yangobosayo eyiri abaandu bali mu buwaambe Bbabbilooni. Mani ebiindu bi ndali niimbona muhuboneherwa nibikotao. 25Mani nimboolera abali mu buwaambe ebiindu bi Omwaami yali niyaanjekeese.

Currently Selected:

Esekeeli 11: SAMIA

Highlight

Copy

Compare