Omuyaali 8
8
1Wiina oli koti omuundu mukesi?
Haandi wiina omanyire ohunyonyola amahuluundu k'esiindu?
Amakesi k'omuundu kakera naanyirira,
haandi obwomiranu bwae nibwo obumukaluuhanisya.
Ohuwulira omutuki
2Wulireenge amalako k'omutuki, olwohuba olwo nilwo lu weyama eyiri Nasaae. 3Yanguyaanga ohutula mu moni w'omutuki, ebiindu nibibiiya, olwohuba omutuki anyala ohuhola buli siindu sy'adaha. 4Omutuki sy'alagira, abulao oyiingania, haandi abulao onyala ohumuteeba ati, “Siina syeene sy'oli ohuhola?” 5Oyo owulira esilagiro syae haba saachia hunyoola haba sibanyoola esidinyu daawe, haandi omuundu mukesi, amanya ebiha bilai neende engeri yihoyere ohusiholeramo. 6Olwohuba buli siindu siri neende ebiha byasyo engeri yihoyere ohusiholeramo, kata ayahaba mbwe omuundu anyoola obudinyu buungi muno. 7Olwohuba haba s'amanyire ebichia ohukwaao, byahakweeo liina bweene. 8Abulao omuundu oli neende obunyala ohwedoong'isira obulamu bwae, haandi abulao oli neende obunyala ohuheengao oludaalo lw'ohufwiiraho. Koti lu biita bitafukiirira omuundu ohubitulamo, olwo nilwo lu syonoono sitalehuula oyo osyeleteere. Obubi neende obuluungifu.
Omuundu mubi neende omuluungifu
9Bino byoosi ndabibona nimbaasa hu biindu byoosi bi baandu bahola hu syaalo, engeri yi baandu batukiramo abasyaabwe neende obwaalaba haandi nibabachuunia.
10Mani nimbona abaandu babi; abo abachichaanga amahabi maangi mu Nyuumba ya Nasaae, ndabona koti lu babasiiha neende oluyaali luungi haandi abulao owiichulisa ati bali ababi mu siko syeene esyo mubaholeraanga ebitahoyera bino. Sino syoosi, bihaya byeene.
11Omuundu naahola esyonoono mani yahaya ohunyoola esibonereso bwaangu, sino sikera abaandu nibemeeda ohuhola ebibi. 12Omuhola-mbi kata yahahola ebyonoono amahabi emia mani yayiindira muno, nae mubwadyeeri bweene manyire endi abatya Nasaae, abo abamwiisamo oluyaali, nibo abanabecheenge bulai. 13Nae omubi haba sanabecheenge bulai, haandi bwaabwe bunahamyuheenge bwaangu koti esiiniha, olwohuba haba siyeesa mu Nasaae oluyaali.
14Haandi siluwo esiindu siindi esiri ebihaya byeene hu syaalo. Baluwo abaandu baluungifu abanyoola esibonereso syahabereeswe abahola-mbi, haandi baluwo abaandu babi abanyoola omukabo kuhoyeerwe ohubereswa abaandu baluungifu. Esyo syoosi ndaboola endi bihaya byeene. 15Mani sakira seemba ohwesangaasa, olwohuba omuundu abula neende esiindu siindi hu syaalo ohumalaho ohulya, ohung'wa, neende ohwesangaasa, olwohuba elyo nilyo esangaalo li yahanyoole muhudidiihana hwae, ebiha byoosi eby'obulamu bwae bu Nasaae yamuberesa hu syaalo.
16Mani nindateemaho muno ohunyoola amakesi, neende ohumanya emirimo choosi echiholehana hu syaalo, ndabona endi omuundu anyala ohumalaho esideete syoosi neende esiro syoosi n'ateyaliise endoolo, 17mani yahaya ohumanya buli siindu syoosi si Nasaae yahola. Kata yahateemaho atye ohukoonyeresa, haba saanyala kata ohusinyoola. Abaandu bakesi banyala ohuboola bati babimanyire, nae mubwadyeeri bweene haba sibamanyire daawe.
©Bible Society of Kenya, 2019
©Bible Society of Uganda, 2019