Omuyaali 6
6
1Siluwo esiindu sibi muno si bweene hu syaalo, haandi esidinyira muno abaandu: 2Nisyo esy'omuundu yi Nasaae yaberesa obuyiinda, emyaandu, neende oluyaali, mani sibuleo esiindu syoosi si muundu oyo ataali nasyo, nae Nasaae n'atafukiirira omuundu oyo ohubisangaaliramo daawe, nae omuundu muteende wuundi niye obusangaaliramo. Sino syosi bihaya byeene, haandi sichuuna muno. 3Omuundu anyala ohwiibula abaana emia, haandi yayiindira emyaaka miingi hu syaalo. Nae kata yahayiindira atye, n'ataba n'anyoolere esangaalo mu bulamu bwae, haandi n'atasiihirwe mu ngeri yihoyera, ese mboola endi esituluucho siba simuhira. 4Bubulao obuhoonyi esituluucho ohwiibulwa. Olwohuba sibulwa nisiri mu siirima, haandi siwaao mu siirima. 5Kata ayahaba mbwe haba siyabonaho elyuuba oba yamanyaho esiindu syoosi daawe, aba awuluuhira. 6Ahiraho oyo owayiindira emyaaka elifu chibiri, nae haba siyasangaalira mu biindu bilai bi yali nabyo. Haandi esiindu siindi, omuundu oyo neende esituluucho, boombi bachia nasilala.
7Omuundu mu mirimo abuundu, ahalaabanira omunwa, nae obwekoombi bwae sibwiikuta daawe. 8Omuundu mukesi ahira omusiru siina syeene? Haandi omumanani, simuhoonya siina syeene ohuba omwegenderesa? 9Silai ohuta omwooyo hu siindu sy'obonaho, ohuhira ohulaluhanira esyo si wekoomba sa. Sino syoosi bihaya byeene, siri koti ohwiirusa omuyaka okudiire.
10Buli siindu siruo, syakulihwa hale eliita. Haandi engeri ya buli muundu yamanyihana. Omuundu haba saanyala ohuyiingania oyo omuhira amaani. 11Ohuyiingania koti lu hwaaka, olwo lwosi nilwo lu bihaya byeene hwaaka. Ao mani omuundu anyoolamo buhoonyi siina? 12Olwohuba wiina omanyire esihoyera omuundu mu bulamu bwae bwiimbikiti obubulamo amahuluundu, haandi obuhamyuuha sa koti esiiniha? Haandi wiina onyala ohuboolera omuundu ebyahakweeo mu syaalo n'amalere ohusitulamo?
©Bible Society of Kenya, 2019
©Bible Society of Uganda, 2019