Omuyaali 1
1
Obulamu bubulamo obuhoonyi
1Chino nicho emboosi omuyaali, omwaana wa Daudi, owali omutuki mu Yerusalemu.
2Bihaya byeene, nilwo lu Mweekesa aboola,
bihaya byeene! Byoosi bihaya.
3Ngaanga siina yi muundu anyoola muhudidiihana
hw'adidiihaniramo mu syaalo?
4Olwiibulo lutulao, haandi olwiibulo luundi lweechao,
nae esyaalo sidoong'ao endaalo choosi.
5Elyuuba litula, haandi elyuuba lyaakwa,
haandi lyeeruha bwaangu ohukobola abuundu yi rituliramo.
6Omuyaka kuwuucha nikuchiira emwaalo,
haandi kwebodoohania nikuchiira emukulu;
omuyaka kwebodoohania haandi kwebodoohania,
mani kwawuucha nikuchiira yi kwatulira.
7Emyaalo kyoosi kihulukusa nikichuha mu nyaanja,
nae enyaanja haba siyichula daawe;
amaachi kakobola yi kasoohera,
mani kachaaka ohuhuluukusa haandi.
8Ebiindu byoosi bijoong'ya;
mani byaheehera omuundu yateteng'ala.
Emoni haba sichijoong'a ohubona,
noomba amatwi kajoong'a ohuwulira.
9Ebyaliwo nibyo haandi ebyahabeeo,
ebyaholwa nibyo haandi ebyahaholwe;
mani sibulao esiindu siyaaha hu syaalo.
10Siluwo esiindu sibanyala ohulomalomaho nibaboola bati,
“Bone, sino siyaaha nisyo”?
Esyo syaliwo hale,
mu ndaalo cha hale efwe nihusisiiri ohubaao.
11Ebiindu bya hale haba sibichuliswa daawe,
haandi ebyahabeeo haba sibyahechuliswe,
neende abo abahabeeo,
nibimalire ohukwaao.
Ebiindu byali mu bulamu bw'Omweekesa
12Ese, Omweekesa ndali wa Yisiraeli mu Yerusalemu. 13Ndataaho muno omwooyo, haandi ndehoonyera amakesi kaange ohukoonyeresa neende ohumanya buli siindu syeholehana hu syaalo, mani ninyoola endi kwoosi mulimo mudinyu haandi omwomeranu, ku Nasaae yateerao abaandu ohunyahana nakwo. 14Ndatingaala emirimo kyoosi ekiholwa hu syaalo; mani bone, byoosi bihaya byeene, huli koti ohwiirusa omuyaka okudiire.
15Esiindu syekoda haba sisinyala ohukololwa daawe,
haandi esitaaliwo haba sisinyala ohubalwa daawe.
16 #
1 Abat 4:29-31. Ndabaasa mu mwooyo kwaange mani nimboola endi, “Ndeeholere omuundu w'oluyaali lw'aakulu muno, omukesi muno ohuhira abo boosi abataangira ohutuka mu Yerusamu. Mubwadyeeri bweene, nyoolere amakesi maangi neende ohumanya huungi.” 17Ndataaho muno omwooyo ohumanya ebidiira hu makesi, neende ohumanya ebidiira hu lalu n'obusiru. Mani ndabona endi syosi siri koti ohwiiruwa omuyaka okudiire.
18Olwohuba koti lu wemeeda ohuba neende amakesi maangi, nilwo lu wemeeda ohuheeherwa,
haandi oyo owemeeda ohumanya ebiingi, nilwo lu yemeeda ohuba neende engisa.
©Bible Society of Kenya, 2019
©Bible Society of Uganda, 2019