Danieli 3

Nebukadineesa alagira buli muundu ohwiinamira esifwaanani sy'esaabbu

1Omutuki Nebukadineesa mani niyetaanya esifwaanani sy'esaabbu, obuleeyi bwasyo bwali emiita amahumi kabiri neende chitaanu-na-chibiri, nae obutakalafu bwasyo bwali emiita chidatu. Mani n'asita hu sipaapi sya Duura, mu situundu sya Bbabbilooni. 2Ao mani omutuki Nebukadineesa n'alagira ohubuusa alala abachweenufu bae boosi, bagafana, abaloonderera hu bagafana, abakeraki b'amakesi, ababiihi, abaheengi b'emisaango, neende abahunuufu boosi abomu situundu esyo ohuchia ohubaao hu omuholo kw'ohuyaanwayo esifwaanani si mutuki Nebukadineesa yali n'ateereo. 3Mani abachweenufu, bagafana, abaloonderera hu bagafana, abakeraki b'amakesi, ababiihi, abakayi, ab'amalako, neende abahunuufu boosi abomu situundu esyo nibebuusa alala hu muholo kwohuyaanwayo esifwaanani si mutuki Nebukadineesa yali n'ateereo. Mani nibeema mu moni w'esifwaanani si Nebukadineesa yali n'ateereo. 4Mani oyo olagira n'alagira mu kono ly'aakulu n'aboola ati: “Eng'we, abaandu ab'oluyia lwoosi, neende abomu byaalo byoosi, neende ab'enimi choosi muhuutirwa muti, 5nimunawulireenge olwiika, amalere, aduungu, ebidiingidi, obuhana, nibuhubbwa, neende buli sihubba syoosi nisihubbwa, muli aboohukwa aasi mani mwenamira esifwaanani sy'esaabbu si mutuki Nebukadineesa ateereo. 6Mani oyo yeesi onahayeenge ohukwa aasi mani yeenamira esifwaanani, mu siha syeene esyo, achia ohusukunwa mu tanuuru lyaaduha omuliro.” 7Mani sakira, abaandu ab'oluyia lwoosi, neende abomu byaalo byoosi, neende ab'enimi choosi nibawuliraanga ekono ly'olwiika, amalere, aduungu, ebidiingidi neende obuhana nibihubbwa, neende buli sihubba syoosi nisihubbwa, bakwiichaanga aasi mani nibeenamira esifwaanani si mutuki Nebukadineesa yali n'ateereo.

Abeecha ba Danieli badatu babuulwayo hulw'obujeemu

8Mani sakira, mu biha ebyo Abakalidaaya baandi embaliha yabadiira mani nibasitaka Abayudaaya omusaango. 9Baboolera omutuki Nebukadineesa bati: “Ewe omutuki, yiindira endaalo choosi! 10Ewe omutuki, wataao elako oti, buli onawulireenge ekono ly'olwiika, amalere, aduungu, endiingidi, neende obuhana nibihubbwa, neende buli sihubba nisihubbwa, anaakwiicheenge aasi mani yeenamire esifwaanani sy'esaabbu. 11Haandi oti buli onahayeenge ohukwa aasi mani yasiinamira achia ohusukunwaanga mu tanuuru yaaduha omuliro. 12Yiruwo Abayudaaya bano ba wadoola ohuhulira esituundu sya Bbabbilooni: Sadiraka, Mesaka, neende Abbedineego. Ewe omutuki, abasaacha bano bahulekeeresa. Haba sibeenamira esifwaanani sy'esaabbu si wataao, oba ohuhalaabanira banasaae bao.”

13Ao mani etima nilidiira Nebukadineesa, n'alagira ati baleete Sadiraka, Mesaka neende Abbedineego. Mani nibabaleeta mu moni w'omutuki. 14Mani Nebukadineesa n'abateeba ati: “Eng'we, Sadiraka, Mesaka, neende Abbedineego, syadyeeri nisyo mbwe muhayire ohuhalaabanira banasaae baange, oba ohwiinamira esifwaanani sy'esaabbu si ndataao? 15Mani bulaanu, nimuli abeetekefu nimuwulira ekono ly'olwiika, amalere, aduungu, ebidiingidi, neende obuhana, neende buli siindu sihubba nisihubbwa, ohukwa aasi mani mwenamira esiloongaloongwe si ndataao, ebiindu binababeere bulai. Nae nimuhaya ohusiinamira, muchia ohusukunwa bwaangu muno mu tanuuru lyaaduha omuliro. Mani hunaaboneho nasaae siina onabawonie ohubatusa mu bunyala bwaange?”

16Sadiraka, Mesaka, neende Abbedineego mani nibakobola mu mutuki bati: “Ewe Nebukadineesa, haba sihuhoyera kata ohweteteya nabudiidi hu musaango kuno. 17Nihunaba nihusukuunwe mu tanuuru lyaaduha omuliro, Nasaae weefwe yihuhalaabanira, achia ohutuwonia atutuse mu tanuuru lyaaduha omuliro; mani atuwonia ohutula mu bunyala bwao. 18Nae kata n'atatuwonia, ewe omutuki, simanye oti, haba sihuchia huhalaabanira banasaae bao, oba ohwiinamira esifwaanani sy'esaabbu syoteereo.”

Abeecha ba Danieli badatu baheengerwa omusaango kw'ohufwa

19Ao mani Nebukadineesa etima nilimudiira muno, n'atingaala Sadiraka, Mesaka neende Abbedineego neende emoni ch'obwaalaba. Mani n'alagira ati etanuuru lyaaduswe mani libaswe amahabi kataanu-na-kabiri ohuhiraho koti lu libechaanga buli ludaalo. 20Mani n'alagira abasaacha baandi bahiramo amaani mu ye lyae, baboye Sadiraka, Mesaka, neende Abbedineego, mani babasukune mu tanuuru ly'omuliro kwaaduha muno okwo. 21Mani nibaboya Sadiraka, Mesaka, neende Abbedineego, nibefwaalire amakaanju kaabwe, engubo chaabwe, ekofia chaabwe hu mitwe, neende ebyefwaalo byaabwe biindi, mani nibabasukuna mu tanuuru lyaaduha omuliro kw'amaani. 22Nae olwohuba omutuki yali n'alagiire ohwaadusa etanuuru libale muno, enjeserye ch'omuliro chaduuma mani nichisaamba abasaacha abo abayira Sadiraka, Mesaka, neende Abbedineego, mani nichibeeta. 23Nae abasaacha badatu bano: Sadiraka, Mesaka, neende Abbedineego, bakwa nibaboyerwe mu muliro kw'etanuuru okwaaduha neende amaani muno.

24Ao mani omutuki Nebukadineesa nateng'eng'ala mani n'asiingira bwaangu, n'ateeba abachweenufu bae ati: “Haba sihuboyere abasaacha badatu abo mani nihubasukuna akatikaati w'omuliro kwaaduha neende amaani muno?” Nabo nibakobolamo bati: “Bwadyeeri, siri sityo, ewe omutuki.” 25Mani omutuki n'akobolamo n'aboola ati: “Nae ndi ohubona abasaacha bane, nibali abalehuule, nibakeenda-keenda akatikaati w'omuliro, nisibulao esyonoono sibakwiireho! Nae owohune afwaanana koti omwaana wa nasaae.”

Abasaacha badatu balehuulwa haandi bahuswa

26Ao mani Nebukadineesa n'asuda aambi neende omulyaangiro k'etanuuru lyaaduha omuliro muno mani naalaanga ati: “Sadiraka, Mesaka, neende Abbedineego, abahalaabani ba Nasaae w'Aakulu Muno, tule erwaanyi, mwiiche ano!” Mani Sadiraka, Mesaka, neende Abbedineego nibatulayo mu muliro. 27Mani abachweenufu b'omutuki, bagafana, neende abaloonderera hu bagafana, neende abakeraki b'amakesi nibebuusa alala, mani nibabona bati sibulao esyonoono syoosi si muliro kwali nikuholere hu mibiri ch'abasaacha abo. Efwiiri lyaabwe haba silyasaambwaho daawe, haandi haba sibali nibawunya olwoosi daawe. 28Mani Nebukadineesa n'aboola ati: “Nasaae wa Sadiraka, Mesaka, neende Abbedineego akinisibwe, Oyo otumire malaika wae mani yawonia abahalaabani bae baandi, abamweesika, mani nibayiingania elako lyaange, ese omutuki, mani nibafukiirira ohuwaayo emibiri kyaabwe bahaye ohwiinamira nasaae wuundi yeesi, ohutusaho Nasaae waabwe mweene. 29Sakira, ndi ohutaao elako endi, abaandu b'olya lwoosi, neende abomu byaalo byoosi, neende ab'olulimi lwoosi, abanalomalomeenge bubi hu Nasaae wa Sadiraka, Mesaka, neende Abbedineego, banaamuteme-temeengemo, mani amadaala kaabwe keholeenge amakuunda. Olwohuba abulao nasaae wuundi onyala mu ngeri yino.” 30Ao mani omutuki n'ahusa Sadiraka, Mesaka, neende Abbedineego, mu situundu sya Bbabbilooni.

Currently Selected:

Danieli 3: SAMIA

Highlight

Copy

Compare