Ebiholwa 19

Paulo naali mu Efeso

1Apolo niyali naali mu Koriito, Paulo nae yacha yahalakania emukulu w'esyaalo esyo mani niyoola mu Efeso. Yabukaana ebweene eyo abeeki baandi. 2Yabateeba ati, “Mwanyoola Mwooyo Mwoolerefu esiha si mwafukiiriramo?” Nabo baboola bati, “Haba, efwe hutawuliraho huti Mwooyo Mwoolerefu aliwo.” 3Yaboola ati, “Nae mwanyoola batiisimu yiri yitye?” Baboola bati, “Mu hubatiiswa hwa Yowaana.” 4#Mat 3:11; Mrk 1:4,7,8; Luk 3:4,16; Yow 1:26,27. Nae Paulo yaboola ati, “Yowaana yabatisaanga neende ohubatiiswa hw'ohweyolobya, n'abooleraanga abaandu ohufukiirira mu oyo owali n'achia ohwiicha luunyuma lwae, oyo niye, Yesu.” 5Nibawulira batyo babatiisibwa mu liita ly'Omwaami Yesu. 6Nae Paulo niyali ohubeesaho amahono kae, Mwooyo Mwoolerefu yabeehaho; mani baalomaloma mu nimi chikabuhaane neende ohutuumbula ebichia ohubaao. 7Boosi alala bali boola aambi w'abaandu ehumi neende babiri.

8Yachia yeengira mu Sinagoogi, hulw'embaka y'emyoosi kidatu yali n'alomalomaanga n'atatya, n'ayinganaanga haandi n'ayalaanga ebidiira hu bwaami bwa Nasaae; 9nae abaandu baandi bachaaka ohubonehana koti abali ab'amayiingi haandi nibahaya ohufukiirira, nibalomalomaanga bubi hu Ngira yino mu moni w'abaandu bebuusire, Paulo yabatulamo, nawawo neende abeeki bali eyo, haandi n'achaaka ohuyingana buli ludaalo naali mu nyuumba y'ohwebuusiramo eya Tiranu. 10Sino syachiiririra sa sityo ohumala emyaaka kibiri, ohwoola lu baandu boosi abali nibamenya mu Asia banyala ohuwulira emboosi y'Omwaami, Abayudaaya alala neende Abagiriki sidubaanie.

Abasyaani ba Sikefa

11Nasaae yemeeda ohuhola ebiindu by'amayia ebiingi muno n'abitira mu Paulo, 12ohwoola lu bitaambaya oba engubo echohumubiri kwae byakiingwaanga nibiyirirwaanga abalwaae, mani obulwaae nibubalehaanga haandi neende ebihyeeno nibibatulaangamo. 13Abayudaaya baandi abakeendanaanga nibeerusa ebihyeeno hu baandu, bosi nibemao nibachaaka ohutuumbuliraanga eliita ly'Omwaami Yesu hu baandi balichiingi nibali neende ebihyeeno, nibaboola bati, “Hwiiruhania neende Yesu yi Paulo ayalaanga.” 14Abasyaani bataanu-na-babiri ab'Omuyudaaya mulaamisi muhuluundu olaangwa ati Sikefa nibo abali nibaholaanga batyo. 15Nae esihyeeno siindi syabakobolamo siti, “Yesu ese mumanyire, haandi Paulo ese mumanyire, nae eng'we ning'we banaanu?” 16Omusaacha yi sihyeeno syalimo oyo yeemawo yabaduumiraho, yabakwaho boosi alala, yabayingira amaani, ohwoola lu beeruha baatula mu nyuumba omwo syeekenye haandi nibanyaalirwe. 17Sino mani nisimanyihana eyiri abaandu boosi abali nibamenya mu Efeso, Abayudaaya alala neende Abagiriki; mani obuti bwabadiira boosi; mani eliita ly'Omwaami Yesu lyeecha lyakinisibwa muno. 18Abaangi hu baandi bali nibamalire ohufukiirira bosi bachaaka ohwiichaanga nibeeyolobya haandi nibeebwaaba ebiholwa byaabwe bibi. 19Abaangi hu abo abali nibaholaanga obujanja bw'amaya, basaanga ebitabo byaabwe alala mani nibabisaambaanga mu moni w'abaandu boosi; babalaanga engaanga yabyo, nibanyoola bati yali yakana neende ey'ebikero by'efeesa elifu amahumi kataanu. 20Mani sakira emboosi y'Omwaami yahula, mani yatabaala muno.

Ohusasakala hwali mu Efeso

21Bulaanu, luunyuma hulw'ebiholwa bino byoosi, Paulo yaheengao mu Mwooyo, ohuchia ohubita n'ahalakania mu Makedonia neende mu Akaya haandi neende ohuchia mu Yerusalemu, mani n'aboola ati, “Luunyuma lw'ohubaaho eyo, hoyeere ohuchia ndabonaho Rooma yosi.” 22Niyali n'amalire ohutuma mu Makedonia abahalaabani bae babiri, Timoteo neende Erasito, yeemao omweene yadoong'a mu Asia hulw'embaka endiidi.

23Esiha syeene esyo, ohusasakala huhoongo hweecha hwakwaao ohudiira hu Ngira yino. 24Olwohuba omuundu wuundi olaangwa ati Demetirio, owali omwiitaanyi w'efeesa, owali n'aholaanga obuyuumba bw'amasabo obw'efeesa obwa nasaae olaangwa ati Aritemi, yali naaholaanga engaanga ehoongo muno eyiri abahalaabani bae. 25Yabuusaanga ebiindu bino byoosi alala, neende abahalaabani baasye, yaboola ati, “Basaacha eng'we, mumanyire muti omulimo kuno nikwo kuhunyolaangamo obunyali bweefwe. 26Muli ohubona haandi ohuwulira muti haba si mu Efeso mwoong'ene nae mu aambi Asia yoosi, Paulo wuno amalire ohuyingira neende ohukosa omukaanda kw'abaandu muhoongo muno, n'aboolaanga ati, banasaae baholebwa neende amahono haba si banasaae nibo. 27Kaliwo amasira mbwe, omulimo kweeng'we kuno kwoong'ene okucha ohukwa mu mayiingani, nae byosi mbwe enyuumba yohwiinamiramo nasaae muhasi muhunuufu Aritemi yicha ohuweeramo elalira obuhoonyi, mani anyale ohutusibwaho oluyaali lwae, nasaae wuno yi Asia yoosi alala neende esyaalo syoosi siinamiraanga.”

28Mani nibawulira batyo, boosi banyoolera muno, mani bachaaka ohulira nibaboola bati, “Aritemi w'Abaefeso niye omuhunuufu ohira!” 29Mani sakira esiko sihuluundu esyo syoosi syatabuha; mani boosi beeruha nibachia mu nyuumba y'emibayo, nibahwehweesa nibachia neende Gaayo neende Arisitariko, Abamasedonia abali bakeendaanga neende Paulo. 30Paulo yekomba ohuchia yengire mu sidiyiiha esyo, nae abeeki bamukaira; 31neende abaandu baandi Basiyariko bosi, abali abeecha bae, baachia yaali mani bamwekweeda atateemaho ohuchia ohwiingira mu nyuumba y'emibayo eyo. 32Bulaanu abaandu baandi bachaaka ohulira nibaboola esiindu siindi, nae abaandi nibaboola esiindi; oluhung'aano olwo lweechula lwabaamo ohutabuha ohuungi muno, abaandi baakotwa esyali nisikerere bebuusa batyo. 33Abaandu baandi bali mu sidiyiiha bachaaka ohutangana Alekisaanda, yi Bayudaaya bali nibateereyo. Nae Alekisaanda yekesera omuhono kwae, n'adaha ohwelomalomaho eyiri abaandu. 34Nae nibeecha ohumanya bati hane yesi yali naali Omuyudaaya, hulw'embaka y'esaa chibiri, boosi bali nibaliraanga sa alala nibaboola bati, “Aritemi ow'Abaefeso niye omuhunuufu!” 35Mani omuhuluundu w'esiko niyali n'amalire ohunyala ohuyenjeesa esidiiyiha esyo, yeecha yaboola ati, “Eng'we abaandu bomu Efeso, muundu siina oliwo otaamanyire ati, esiko sihuluundu sy'Abaefeso, nisyo esiriindi sy'enyuumba ya Aritemi omuhunuufu, haandi neende esyeene kina lyoolerefu elyakwa nilitula mu ekulu? 36Mani oluunyuma lw'ohubona muti ebiindu ebyo haba sibinyala ohuyiinganisibwa, muhoyere ohuwuleera mani mwahaya ohuyuyuhana ohuholaho esiindu syoosi. 37Olwohuba muleetere abasaacha bano ano abataali abalekeeresi b'ediini oba abahyeeya nasaae weefwe muhasi. 38Mani sakira Demetirio alala neende abetaanyi abali nae nibaba nibali neende esiindu syoosi sibekanyiirisa hu muundu yeesi, ekooti njikule nicho, haandi abaheengi b'emisaango baliyo; mulehe bayire emisaango kyaabwe hu basyaabwe ebweene eyo. 39Nae nimuba nimuli ohukoonya esiindu siindi ohuhiraho ao, esyo siba sichia ohwiihasibwa muluhung'aano lweefwe lwamanyihana. 40Olwohuba huli mu masira ak'ohuhengerwa omusaango kw'ohusasaakala enyaanga yino, naaba n'abulao esifune esinyala syasiira obuyoka.” 41Niyali niyamala ohuboola atyo, yaseebula omuhung'aano okwo kwasalaana.

Currently Selected:

Ebiholwa 19: SAMIA

Highlight

Compare

Copy