2 Abatesalonika 1
1
1 #
Biho 17:1. Ebbarwa yitula eyiri Paulo, Silifaano neende Timoteo, niyichiira abafukiiriri bali mu Tesalonika, abaandu ba Nasaae weefwe, neende Omwaami Yesu Kristo. 2Lehe Nasaae Seefwe neende Omwaami Yesu Kristo bababerese embabaasi neende omuleembe.
Ohuheenga hw'emisaango Kristo n'akoboole
3Baasyeefwe, huhoyere ohweebasa Nasaae hulweeng'we buli siha. Silai efwe ohweebasa hutyo olwohuba efukiirira yeeng'we yemeeda niyihula muno, haandi obuheeri bu buli muundu ali ninabwo eyiri owaasye bwosi bwemeedere. 4Sakira efwe fwesi huli ohubehoyeramo eyiri emikaanda ky'abafukiiriri ba Nasaae kiindi. Hwemeeda ohubehoyeramo mu ngeri yi mwemeederamo ohugumira mu fukiirira kata neende mwahaba nimusaandisibwa neende mu huchuunisibwa hu mulimo.
5Sino nisyo esyeekesa siti, ohuheenga hw'emisaango hwa Nasaae hwadyeeri, haandi situliramo eng'we ohubalibwa mu bahoyera Obwaami bwa Nasaae, bu muli ohusaandira. 6Olwohuba Nasaae asibona ati sihoyera ohusaandya abo ababasaandya, 7haandi ohutuberesa alala naang'we obuwuluuhiro abali ohusaandisibwa, Omwaami Yesu niyahabonehane n'atula Muukulu alala neende malaika bae b'amaani mu muliro kwaaduha. 8Sino sichia ohuba esyohwetuunga eyiri abo abataamanyire Nasaae, neende abo abatawulira Emboosi Ndai y'Omwaami Yesu. 9#Yis 2:10. Bachia ohunyoola ohusaandisibwa hw'ohumalirwao elalira nibatusibwa mu moni w'Omwaami neende mu luyaali lwae lw'amaani, 10naakobola hu ludaalo olwo abereswe oluyaali mu boolerefu bae, haandi yesibwemo oluyaali mwaabo boosi abafukiirira olwohuba obuloli mweeng'we bwafukiirirwamo. 11Sakira hubasabira buli siha, huti Nasaae weefwe ahoyere anyale ohubahola mube abahoyera obulamu bumwalaangwamo. Haandi neende amaani kae omweene yoserese abweene buli sichiiririrwa silai siri mu myooyo kyeeng'we neende buli mulimo kumuhola ohweema hu fukiirira.
12Mu ngira yino, nimwo mu liita ly'Omwaami weefwe Yesu lichia ohuberesebwa oluyaali mweeng'we, haandi eng'we mwesi muchia ohunyoola oluyaali mu Omwaami Yesu, ohweema hu mbabaasi cha Nasaae weefwe neende Omwaami Yesu Kristo.
©Bible Society of Kenya, 2019
©Bible Society of Uganda, 2019