2 Samueli 8
8
Ohuyiingiraanga hw'eye lya Daudi
(1 Biha 18:1-17)
1Esiha siindi luunyuma, Omutuki Daudi yachia yaseeta Abafilisiti ehabi liindi, yaabayiingira, mani yaakamisira elalira obutuki bwaabwe hu syaalo ohwo.
2Haandi yayiingira Abamoabbu. Yahola abadiire boosi baakonaanga aasi hu buloba mani yeetaanga babiri hu buli badatu. Mani Abamoabbu beehola abatukwa bae bachaaka ohumutuungaanga omusolo.
3Haandi yayiingira omutuki w'esituundu sya Siria mu syaalo sya Sobba, Hadadeseri omwaana wa Rehobbu koti lu Hadadeseri oyo yali naali hu lukeendo lwae n'achia ohukobosao obunyala bwae hu situundu sy'esyaalo siri emukulu w'Omwaalo kwa Ewufuraate. 4Daudi yawaamba abalwaani b'efaraasi, elifu ndala neende emia chitaanu-na-chibiri (1,700), haandi abalwaani bohu makulu elifu amahumi kabiri (20,000). Yeelehesera efaraasi chinyala ohuhweesa ebigaari emia ndala (100), nae echadoong'ao choosi n'achinyaala.
5Nae Abasiria ba Damasiko nibayirayo eye ohuhoonya Omutiki Hadadeseri, Daudi yaliseeta, mani yeeta abasaacha elifu amahumi kabiri neende chibiri (22,000). 6Yoombaha ekaambi ch'amaye mu situundu sy'esyaalo syaabwe esyo, mani nibeehola abatukwa bae nibachaaka ohumutuungaanga omusolo. Omwaami yahola Daudi yaanyala ohuyiingiraanga buli yi yachiraanga yoosi. 7Mani Daudi yaanyala ohuwaamba engabo ch'esaabbu echakingwaanga neende abahoongo ba Hadadeseri, mani naamala naachiyira mu Yerusalemu. 8Yayira obuungi bw'omugasa ohutula mu Bbeeta neende mu Bberotai, ebiko byali nibyatukwa neende Hadadeseri.
9Omutuki Toi owa Hamati yawulira ati Daudi yali n'amalire ohuyiingira eye lya Hadadeseri lyoosi. 10Mani yaatuma Yoramu omwaana wae ohuchia ohuheesaho Omutuki Daudi, haandi neende ohumubuluusayo hulw'ohuyiingira Hadadeseri, yi Toi yali niyalwaaniaho amahabi maangi hale. Yoramu yayirira Daudi ebiyaanwa ebyaholwa ohutula mu esaabbu, efeesa, neende omugasa. 11Omutuki Daudi wuno bulaanu yabibukula yabiyaanayo byehoonyerweenge mu hwiinamiraanga Nasaae, alala neende efeesa neende esaabbu yi yali niyatusa mu byaalo bi yali niyayiingira 12Edomu, Moabbu, Abaamooni, Filisiti, neende Amaleki, haandi neende esituundu siindi ohutula hu biindu bi yali ni yapeeya ohutula hu Hadadeseri.
13 #
Sab 60. Daudi yemeeda ohumanyihana muno lu yoola yaanyala ohukobola naatula ohwiitira Abaedomu elifu ehumi neende chitaanu-na-chidatu (18,000) mu Hoondo y'Omuunyu. 14Yoombaha ekaambi ch'amaye mu Edomu mwoosi, mani abaandu bali nibamenya mu bweene omwo nibeehola abatukwa bae. Omwaami yahola Daudi yayiingiraanga buli yi yachiraanga yoosi.
15Daudi yatuka Yisiraeli yoosi mani yomiisa ati abaandu bae boosi bayirwaanga bulai muno haandi koti lu bihoyera ataali ohukwiira abaandi daawe. 16Yoabbu, yi ng'ina yali Omuseruya, niye owali omuhoongo w'eye elyo; Yehosafati omwaana wa Ahiluudi niye owali naali mu bunyala bw'ohuliinda ebyaliwo ebyandiikwa; 17Sadoki, omwaana wa Ahituubbu, haandi neende Ahimeleki omwaana wa Abbiataari nibo abali nibali koti abalaamisi; Seraya niye owali omusaati w'ekooti; 18Bbenaya, omwaana wa Yehoyada niye owali naafunaanibwa neende abaliindi ba Daudi; haandi neende abaana baandi ba Daudi baanyala ohuholaanga koti abalaamisi.
©Bible Society of Kenya, 2019
©Bible Society of Uganda, 2019