2 Samueli 6
6
Esanduuku ly'Endagaano lileetwa mu Yerusalemu
(1 Biha 13:1-14; 15:25—16:6,43)
1Haandi ehabi liindi, Daudi yalaanga yabuusa alala abasaacha balwaani bahirimo obulai mu Yisiraeli, mani boola obuungi bwa elifu amahumi kadatu (30,000), 2#Hut 25:22. yabeemirira yabayira mu Bbaala mu Yuda, ohuchia ohukiinga Esanduuku ly'Endagaano balituse ebweene eyo, mani balileete, eliriho eliita ly'Omwaami w'Obunyala, yi sisaala sy'obutuki syae siri aakulu w'abakerubbi. 3#1 Sam 7:1,2.Bachia baalitusa mu daala lya Abbinadabbu hu sigulu, nibamala nibalita hu sigaari sy'efaraasi siyaaha. Wusa neende Ahio, abasyaani b'Abbinadabbu, nibali nibo abali ohwiirusaanga esigaari esyo, 4Ahio naali ohukeenderaanga emberi. 5Daudi alala neende Abaisiraeli boosi nabo bali nibali ohuhinaanga neende ohwembaanga neende amaani kaabwe koosi, nibeesa oluyaali mu Omwaami. Bali nibali ohuubbaannga obuhana, amaduungu, eng'oma, manyaanga, alala neende nyaangili.
6Mani nibali mbwe huboola hu lwaanyi lw'ohuhubbakiraangaho lwa Nakoni, endaawu cheegumula, mani Wusa yeyeneeresa yadiiraho hu Sanduuku ly'Endagaano elyo. 7Esiha syeene esyo, Omwaami Nasaae yanyoolerera Wusa muno mani yamwiitira abweene ao hulw'obutaali obutiiririrwa bwae. Wusa wuno yafwiira endulo w'Esanduuku ly'Endagaano elyo, 8mani sakira abuundu ao yakulihwa mbwe Peresi Wusa ohutula hu ludaalo olwo. Daudi yalula muno olwohuba Omwaami yali n'asaandiise Wusa neende etima lyae.
9Nibyoola ao Daudi yatya Omwaami oyo mani yaaboola ati, “Bulaanu, ese nyala endye ohuchia neende Esanduuku ly'Endagaano lino?” 10Mani yaheengao ohuhaya ohuchia nalyo mu Yerusalemu; abuundu ao, yakabuha hu ngira, mani n'aliyira mu nyuumba ya Obbedi-Edomu, owali omwiibulanwa w'esiko sya Gaati. 11#1 Biha 26:4,5.Lyadoong'a ao ohumala embaka y'emyoosi kidatu emilaamba, mani Omwaami yaberesa Obbedi-Edomu ehabi enyiingi muno alala neende edaala lyae lyoosi.
12Omutuki Daudi yawulira ati ohweema hu Sanduuku ly'Endagaano elyo, Omwaami yali naabereese Obbedi-Edomu alala neende edaala lyae lyoosi ehabi, alala neende ebiindu biindi byoosi bi yali ali nabyo; mani yaachia yaabukula Esanduuku ly'Endagaano elyo, yaalitusa mu nyuumba ya Obbedi oyo ati aliyire mu Yerusalemu neende omuholo muhunuufu muno. 13Nae luunyuma lw'abasaacha bali nibakiingire Esanduuku ly'Endagaano elyo ohukeendaho amakulu kasaasaba koong'ene, Daudi yabeemesa mberi mani yayaanira Omwaami esiyaanwa esy'eng'oombe surusi, alala neende emoosi enginu. 14Daudi, niyali niyefwaalire engubo y'elaasi yoong'ene ohwebodoohania esibuno, yahina neende amaani kae koosi ohuberesa Omwaami oluyaali. 15Mani katyo, omweene oyo alala neende Abaisiraeli boosi baanyala ohuyira Esanduuku ly'Endagaano elyo ohwoola mu Yerusalemu neende engalaakasa ch'esaangaalo alala neende ohuubba hw'eturumbete.
16Esanduuku elyo nilyali huliri ohwiingiswa mu siko, Mikaali, owali omuhaana wa Saulo, yalengeesera erwaanyi mu dirisa, yaanyala ohubona Omutuki Daudi naali ohuhina naduumakala mu mahina moolerefu, mani yaamusinyihira muno. 17Kata katyo banyala ohuleeta Esanduuku elyo mani baalita abuundu walyo mu Yeema li Daudi yali yalyoombahira. Mani yaayaana ebiyaanwa, eby'obusaangirani eyiri Omwaami. 18Mani niyali n'amalire ohuyaana ebiyaanwa ebyo, yaberesa abaandu ehabi mu liita ly'Omwaami w'Obunyala 19#1 Biha 16:43.mani haandi yaamala yaakabula abaandu boosi ebyohulya. Yanyala ohuberesaanga buli musaacha haandi neende buli muhasi mu Yisiraeli, omugaati, esidonye sy'enyama esaambe, alala neende ekeeki chiindi. Mani buli muundu yeweerao yeekobolera ewae.
20Luunyuma lw'ebyo, Daudi niyakobola engo wae ohuheesania neende ab'edaala lyae, Mikaali yatula erwaanyi ohumubukaanira mani yaboola ati, “Omutuki wuno yeholeere eliita ehunuufu enyaanga yino!” Haandi ati, “Yefunuule koti sa omuundu musiru omaliirihayo mu moni wa bahalaabani b'esihasi b'abahoongo bae!”
21Daudi nae yakobolamo ati, “Ese mbeere nihinaanga ohuberesa Omwaami oluyaali, oyo owandoola yaaleha lataao neende ab'edaala lyae, mani yaahola syesi ndaaba omwiimirisi wa Yisiraeli abaandu bae. Mani haandi ese njia ohwemeeda sa ohuhinaanga endyo niimberesa Omwaami oluyaali, 22ese njia ohwediisa esoni ohuhiraho neende ao. Ewe onyala ohubaasa oti ese ndi ebihaya byeene, nae abahasi abo bachia ohuumbukula ohuba ow'akulu muno!”
23Mani, Mikaali, omuhaana wa Saulo, haba siyeebulaho omwaana kata mulala ohwoola lu yafwiira.
©Bible Society of Kenya, 2019
©Bible Society of Uganda, 2019