2 Samueli 22
22
Olweembo lwa Daudi lw'ohuyiingira
(Sab 18)
1Omwaami niyawonia Daudi ohutula hu Saulo, haandi neende hu basuku baandi, Daudi yeembera Omwaami olweembo luno:
2Omwaami niye omuliindi waange;
oyo niye olukaka lwaange lwomiifu.
3Nasaae waange niye omuliindi waange,
mani ni ndi nae mba ndi mu muleembe.
Oyo yaangairira koti engabo;
yanwaanirira mani yaniinda mu muleembe.
Oyo niye omuwonia waange;
oyo yanwaanilira, haandi yamonia ohutula hu bwaalaba.
4Ese nangaanga Omwaami,
mani yaamonia ohutula hu basuku baange.
Fumia Omwaami!
5Efwiinda ch'ohufwa chali nichiindebodohaanie;
efwiinda ch'omusihiriro chaambitaho.
6Amasira k'ohufwa kali nikaandebodohaanie,
eng'ani nayo yali niyiindekere omuteego.
7Mani ni ndi mu bidinyu omwo ndalaanga Omwaami;
Ndalaanga Nasaae waange yahoonye.
Niyali naali mu nyuumba yae, yawulira ekono lyaange;
yatekeeresa amaliro kaange k'ohuhoonywa.
8Mani esyaalo syateenga syaadengaana;
emisiingi ky'ekulu kyaaduluhana mani kyachwiila
olwohuba Nasaae yali n'anyoleere!
9Omwoosi kwaniooha nikutula mu moolu kae,
enjeserye chimamula alala neende amaanda kang'eng'eerere byatulira mu munwa kwae.
10Yataandula ekulu lyeekuha mani yeeha,
naali neende esireesi simali esyali aasi w'amakulu kae.
11Yabburuhira bwaangu hu mbaya hu omukerubbi wae;
yakeendera hu mbaya ch'omuyaka.
12Yebwiiha esiirima;
amaleesi madiraanu, akeechuulemo amaachi, kali nikamweebodohaanie;
13amaanda kang'eng'eerere katusira enjeserye mu mesu chali nichimwiimiriire.
14Omwaami yaduluhanira muukulu,
mani ekono lya Nasaae w'Obunyala lyawuliirihana.
15Yalasa obusaale bwae mani bwaasalaania abasuku bae;
neende ohumyeesuha hw'olumesu, yaboongaho embiro.
16Olwaalo lw'enyaanja lwoomerera kurururu,
haandi emisiingi ky'esyaalo kyabwiihulwaho
Omwaami niyanyekaanga abasuku bae
haandi yabaalabira neende etima.
17Omwaami yeyeneeresa ohutula aakulu mani yaandiira;
yaanyinulula ohutula mu lusiba lw'amaachi.
18Yaanunula ohutula eyiri abasuku baange b'amaani
haandi ohutula eyiri abo abasyuula,
bali ab'amaani ohuuhira.
19Nindali ni ndi mu bidinyu, baseeta,
nae Omwaami yanwaanira.
20Yahoonya ohutula mu masira;
yaamonia olwohuba yali niyasaangaalira.
21Omwaami yamberesaanga esisiimo olwohuba ese holaanga ebihoyera;
Yambeechaanga ehabi olwohuba ese mbulaho omusaango.
22Ese funihiraanga amalako k'Omwaami;
ese haba sindakabuhanaho neende Nasaae waange daawe.
23Ese njoseresaanga amalako kae koosi;
ese haba sinjeemeraangaho ebilagiro byae daawe.
24Amanyire ati ese mbulaho esyonoono syoosi,
ati ese ndeliinda obutaholaho esyonoono syoosi.
25Mani sakira yamberesaanga esisiimo olwohuba ese holaanga ebihoyera,
olwohuba amanyire ati, ese mbulaho omusaango.
26Ewe Omwaami, oli omweesikwa eyiri abo abali abeesikwa yooli;
haandi omulai mweene eyiri abo abali abweene.
27Oli omuchweenufu eyiri abo abali abachweenufu,
nae omwaalaba eyiri abo ababi.
28Owonianga abo abeeyisa aasi,
nae wiisa abo abeniinia.
29Ewe, Omwaami, niiwe obulafu bwaange;
ewe oduumusaangayo esiirima syaange.
30Ewe wumberesaanga amaani ohuseeta abasuku baange
haandi neende obunyala ohuyiingira obuliindi bwaabwe.
31Nasaae wuno, ebiholwa byae nga biichufu,
emboosi chae nga ch'ohweesika!
Oyo ali koti engabo
eyiri abo boosi abakoonya obuliindi bwae.
32Omwaami niye oli Nasaae yeeng'ene;
Nasaae yeeng'ene niye obuliindi bweefwe.
33Nasaae wuno niye obweyikamo bwaange bw'amaani;
aholaanga engira chingeenderaho ohuba ech'endaalo choosi.
34 #
Hab 3:19. Akera ese niimba neende obweemero bwomiifu koti emboongo;
yanindaanga mba mu muleembe ni ndi hu ngulu.
35Yaanalisaanga ohulwaana ebiita,
huunyale ohwehoonyera obuyiingo buhiramo amaani.
36Ewe Omwaami, wunindaanga haandi wumonianga;
obuhoonyi bwao bwakera ese ndaaba omuhunuufu.
37Waniinda ndaahaya ohuwaambwa,
mani haba singwichaangaho daawe.
38Njiruhanianga abasuku baange mani mala mbayiingira;
Haba siinyemaangaho ohwoola lu mbasihirisa.
39Mbahubbaanga aasi, mani bibahaya ohusiingira beema;
balambaalaanga sa mu moni waange nikabaweere.
40Ewe niiwe owumbeechaanga amaani k'ohulwaana ebiita
haandi ohuyiingira abasuku baange.
41Okeraanga abasuku baange nibaanjiruha bwiiruha;
Sihirisaanga abo abasyuula.
42Bakoonyaanga obuhoonyi, nae abulao onyala ohubawonia;
balaangaanga Omwaami, nae haba saabakobolaangamo daawe.
43Mbanyuhaanga, mani beehola koti olufu;
mbaseenakiraanga koti edosi liri hu makira.
44Waamonia ohutula hu baandu bajeemu
mani womiisa obwiimirisi bwaange mu byaalo biingi;
abaandu baatali nindamanya bulaanu beeholere abatukwa baange.
45Abateende baanyinamira sa;
nibaambuliraho sa nibaanjisamo oluyaali.
46Bawaamo omwooyo
mani nibateengereha nibatula mu ngoba chaabwe.
47Omwaami wuno hane mulamu niye! Fumia omulwaanirisi waange!
Laangirire obuhunuufu bwa Nasaae w'amaani owumonianga!
48Yambeechaanga ohuyiingira abasuku baange;
afwiinyiriraanga ebyaalo aasi waange
49mani yaamonia ohutula hu baanyiima.
Ewe Omwaami, niiwe owumbeechaanga ohuyiingira abasuku baange
mani wungaya ohutula hu basaacha baalaba.
50 #
Rom 15:9. Mani sakira ese hufumisiriaanga mu byaalo biindi;
hweemberaanga niihufumia.
51Nasaae aberesaanga obuyiingiri buhunuufu omutuki wae;
yeekesaanga obuheeri bubitiirifu eyiri abo ba yadoola,
eyiri Daudi, haandi neende abeechuhulu bae endaalo choosi pe.
©Bible Society of Kenya, 2019
©Bible Society of Uganda, 2019