2 Samueli 19
19
Yoabbu alumirisa Daudi
1Yoabbu yaboolerwa mbwe Omutuki Daudi yali naali ohuubbaannga esihoolo n'alira Abbusalomu. 2Kata katyo, esangaalo lyali lyahabeere ely'ohuyiingira lyakaluuhanisibwa lyaaba esibeera eyiri abalwaani ba Daudi. Olwohuba baawulira bati omutuki Daudi yali naali ohuliraanga omwaana wae. 3Bakobolayo mu siko omwo masididye, koti abalwaani abali nibadirirwe n'esoni niberuuha ohutula mu biita. 4Omutuki Daudi yebwiihirira mu bweeni, mani niyoobba esihoolo n'aboola ati, “Aaa, mwaana waange! Mwaana waange Abbusalomu! Abbusalomu, omwaana waange mweene!”
5Yoabbu yasiingira yaachia ena nyuumba y'omutuki mani yaamuboolera ati, “Enyaanga yino, onyalire ohuchalaasira elalira abasaacha bao abo abasaacha bawonia obulamu bwao, haandi obulamu bw'abaana bao neende abahaana bao, haandi neende obw'abahasi bao, neende abahasi b'erwaanyi bao beene. 6Ewe oyiingania abo abahuheera, nae ohoonya abo abahusyuula! Ewe mbao hane omalire ohweekesera elalira alafu oti abahoongo bao abo, alala neende abasaacha ohuyirira alala boosi, haba sibaliho neende esiindu syoosi esy'obuhoonyi yooli. Ese mbano ndi ohubona endi, ewe wahasaangaalire muno Abbusalomu aba niyahabeere naali omulamu enyaanga yino, nae efwe fweesi nihuba nihufwiire nihuweere. 7Siingira ano ochie womiise abasaacha bao bala otyo. Ese naange ndeechubira eliita ly'Omwaami endi, n'otachia mani waahola otyo, abulao kata mulala hu abo oba anaba naasihuliho yibunooleranga muchuli. Esyo siba sichia ohuba esibwaabo sihiramo byoosi bi wahanyoola mu bulamu bwao bwoosi.” 8Ao, Omutuki Daudi yasiingira mani yaachia yeehala aambi neende esiruwa sy'esiko esyo. Abasaacha bae bawulira bati hane yali naali abweene ao, mani nibamweebodoohaniaho.
Daudi achaaka olukeendo ohukobola Yerusalemu
Nae esiha syeene esyo, Abaisiraeli boosi bali nibamalire ohweyiruhira nibechiriire mu biko by'engo waabwe. 9Mu syaalo omwo mwoosi abaandu bachaaka sa ohunyekanaanga abeene-hu-beene. Ababoolaniraanga abeene-hu-beene bati, “Omutuki Daudi wuno niye owatuwonia ohutula hu basuku beefwe boosi.” Haandi bati, “Oyo niye yeeng'ene owanyala ohutununula ohutula hu Abafilisiti, nae bulaanu yeruuhe sa naatula hu Abbusalomu, mani naatulira elalira mu syaalo muno. 10Efwe hwachuha amafuta hu Abbusalomu ohuba koti omutuki weefwe, nae bulaanu nguyo amalire ohwiitirwa mu biita. Mani lwasiina siyiba hooyo oyo yeesi onyala yateemaho ohukobosa enyuma Omutuki Daudi wuno?”
11Amakeni kadiira hu mboosi chi Abaisiraeli bali nibali ohulomalomaanga, koolera Omutuki Daudi oyo. Yatuma Sadoki neende Abbiataari, abali nibali abalaamisi endaalo echo, ohuchia eyiri abeemirisi ba Yuda mani ohubateeba bati, “Eng'we siina syeene esikera nimuba mbwe niing'we abamaliirihayo ohuchia mani mwahoonya ohukobosa Omutuki Daudi wuno yaaba mu dooho lyae? 12Eng'we mbano niing'we abeeho baange hooho, abali omubiri kwaange kweene haandi amabaanga kaange keene; siina syeene esiba nisikera eng'we haandi mwoola ohumaliirihayo mu huteemaho ohuungobosa engo?” 13Daudi haandi yababoolera ohuchia ohuboolera Amasa bati, “Ewe oli sa omwiiho waange mweene. Ohutula abweene ano, neende ohwemeeda mu moni ese ndi ohuhuta hu mulimo kw'ohuhulira amaye koosi, mu bweyaango bwa Yoabbu. Mani Nasaae ahoya yaanjitirao sa nikali mbwe ese haba siinja ohuhola sa endyo!” 14Emboosi cha Daudi chino chaserera oluyaali lw'abasaacha boosi aba Yuda, mani baamutumira emboosi yimudaha akobole engo alala neende abaandu bahoongo bae boosi.
15Niyali naali hu lukeendo naakobolayo engo, omutuki Daudi wuno niyoola hu Mwaalo Yorodaani, yaakaanirwa neende abasaacha ba Yuda abali nibeechere mu Giligaali ohumugooba anyale ohwaambuha omwaalo okwo. 16#2 Sam 16:5-13.Haandi esiha syeene esyo, Simei Omubbeenjamiini owali omwaana wa Gera yabbibbiirihana muno ohuchia eyiri Yorodaani hu anyale ohubukaanana neende Omutuki Daudi. 17Omweene oyo yali ali neende abasaacha elifu ndala enaamba, abali nibatula hu enono ya Bbenjamini. Mani Sibba, owali omuhalaabani w'edaala lya Saulo, yesi neende abaana bae ehumi neende bataanu, alala neende abahalaabani bae amahumi kabiri, mani baataangirira omutuki ohwoola hu Yorodaani. 18Baambuha omwaalo okwo ohugooba omukaanda kw'omutuki okwo kwoosi kwaambuhe, haandi neende ohuholaanga esyo syoosi si omutuki yadahaanga.
Daudi aholera Simei esisa
Koti lu mutuki yali hu yeetekehaanga ohwaambuha, Simei yeehubba aasi omweene mu moni wae 19yaboola ati, “Ewe ow'Obunyala, n'okanya yibirira ebidoondobanu byoosi bi ndahola hu ludaalo olwo lu ewe watulira mu Yerusalemu. Otabiihaisiraho daawe, oba ohubibasaangaho haandi kata nabudiidi. 20Ese omweene manyire, ewe omuhuluundu, endi ndamala ohwonoona, mani esyo nisyo esikera ese niimba otaangire ohutula mu nono ch'emukulu, ohwiicha mani ndaanyala ohubukaana neende ow'Oluyaali wuno enyaanga yino.”
21Abbisai omwaana wa Seruya yesi yalomalomera aakulu n'aboola ati, “Simei ahoyere ohwiitwa olwohuba yabwaaba oyo yi Omwaami yali niyadoola ohuba omutuki.”
22Nae Daudi yaboolera Abbisai alala neende Yoabbu mwanaang'ina ati, “Ewe naanu mweene oyo obeere naahuteebere oboole embaasa yao eyo? Ewe hane niiwe ochia ohuumberesa ebidinyu, kose? Ese mweene niise oli omutuki wa Yisiraeli yoosi bulaanu buti, mani abulao Omuisiraeli yeesi ochia ohwiitwaho enyaanga yino.” 23Yaboolera Simei ati, “Ese naange ndi ohuhuberesa omunwa endi ewe haba soochia ohwiitwa daawe.”
Daudi Aholera Mefibboseti esisa
24 #
2 Sam 9:1-13; 16:1-4. Bulaanu Mefibboseti, omwiichuhulu wa Saulo yeeha ohubukaanana neende omutuki. Nae haba siyali niyeeyosereho amakulu kae daawe, ohweeheheta esirefu, oba kata sa ohwoosaho engubo chae ohutulira elalira hu biha bi mutuki yatuliramo mu Yerusalemu ohwoola lu yakobolera nayingiire. 25Mefibboseti yesi yoola abweene ao naatula mu Yerusalemu ohwiicha ohubukaanana neende omutuki, omutuki oyo mani yaamuboolera ati, “Ewe Mefibboseti, hane ewe haba siwachiana naange daawe! Lwasiina ewe haba siwaholaho otyo?”
26Nae yakobolamo ati, “Ewe koti sa lwoomanyire, Ewe ow'Obunyala, ese ndi omulema. Ese ndeemere ohuboolera omuhalaabani waange wuundi endi afwaale esiseero hu suhiri yaange hu nyale ohukeenderaho alala naawe, nae yaandyaamo olukwe. 27Yambachira yooli Ewe ow'Obunyala, nae ewe oboneha koti oli malaika wa Nasaae, mani ewe hola sa esyo esibonehana koti esihoyera yooli. 28Abaandu b'edaala lya laata boosi bali nibahoyera ohwiitwa boosi neende Ewe ow'Obunyala, nae ewe wambereese obunyala bw'ohuliraanga hu meesa yao yeene. Mani ese haandi mbula obunyala bw'ohusaba ebiindi byoosi ebyemeeda hu bweene ohwo ohutula eyiri Ewe ow'Obunyala.”
29Omutuki yakobolamo ati, “Ewe haba soohoyere ohuboola esiindu syoosi esihiraho ao daawe. Ese malire ohuheengao endi ewe neende Sibba niing'we abachia ohukabanamo ebiindu byoosi ebyali ebya Saulo.”
30Nae Mefibboseti yakobolamo ati, “Ewe leha sa Sibba niye oba ayire byoosi. Ese esihiramo ohuunjera nisyo sa mbwe Ewe ow'Obunyala onyalire ohukobola engo endaalo choosi.”
Daudi yeekesa esisa eyiri Bbarisilai
31 #
2 Sam 17:27-29. Nae Bbarisilai, ohutula Gileadi, yali yeesi niyeehere aasi ohutula Rogeliimu ohwiicha ohugoobaho omutuki anyale ohwaambuha Yorodaani bulai. 32Bbarisilai wuno yali naali omusaacha omukofu muno, naali emyaaka amahumi kataanu-na-kadatu. Kata katyo omusaacha wuno yali omuyiinda muno mani yali niyanyala ohuleeteraho omutuki ebyohulya koti lu yali naamenyere mu Mahanaimu. 33Mani omutuki oyo yamuboolera ati, “Ewe yicha ochie naange mu Yerusalemu, mani mba njia ohuhuliindaanga.”
34Nae Bbarisilai yakobolamo ati, “Ese haba sisiiriyo neende emyaaka kiindi miingi ohubaao omulamu daawe; siina syeene nisyo esiba nisikera mbwe ese njie naawe, Ewe ow'Obunyala mu Yerusalemu? 35Ese mbano ndamala ohwoosa emyaaka ky'obuhuluundu amahumi kataanu-na-kadatu, mani abulao esiindu syoosi esinyala ohuusaangaasaho daawe. Ese haba siinyala ohumanyirisa esyuuya oba echamu ly'esiindu siimba niindya oba niing'wa, haandi haba siinyala kata ohuwulira amakono k'abeembi daawe. Ese mba njia ohuba sa esibonereso eyiri Ewe ow'Obunyala. 36Ese haba siihoyera omutuulu muhunuufu koti okwo daawe. Sakira ese njia ohuhugoobaho sa olukeendo olwiimbikiti muno ohubitaho Yorodaani budiidi. 37Sakira ewe leha sa ese ngobole engo mani male fwiire aambi neende eng'ani ch'abeebusi baange. Kimihamu omwaana waange mweene nguno ali ano, anyala yaachia yaahuhalaabaniraanga; mubukule mani omale ochie nae, Ewe ow'Obunyala, mani onyale ohumuholera bi obaasa oti nibyo ebihiramo.”
38Omutuki nae yakobolamo ati, “Ese njia ohumubukula njie nae muholere esyo syoosi syooba noodaha. Mani haandi naange mba njia ohuhuholera esyo syoosi syooba noochia ohusaba.” 39Daudi alala neende abasaacha bae boosi baambuha Yorodaani. Nae omweene yakwa Bbarisilai mu sirifu mani naamala naamuba ehabi yae, mani Bbarisilai naamala naakobolayo engo wae.
Abaandu ba Yuda neende aba Yisiraeli bayiinganira hu mutuki
40Omutuki niyali n'amalire ohwaambuha, nagooberwe neende abaandu ba Yuda boosi neende esituundu sy'abaandu ba Yisiraeli, yakeenda ohwoola lu yoola mu Giligaali, mani Kimihamu yesi naachia nae. 41Abaisiraeli boosi baachia eyiri omutuki mani baamuboolera bati, “Ewe ow'Obunyala, siina syeene esikerere abasyaani beefwe abo, abasaacha ba Yuda, boosi bachaaka ohubaasa bati bosi bali neende obunyala bw'ohuhumalao, haandi baamala baahugooba, ohwoola hu daala lyao, alala neende abasaacha bao mwaambuhiraho Yorodaani?”
42Nae abasaacha ba Yuda bakobolamo bati, “Efwe huholere hutyo, olwohuba omutuki ni mulala hweefwe. Mani lwasiina sino sikera sa eng'we mwanyoolera mutyo? Haba satuungireho ebyohulya byeefwe, haandi kata sa abulao esyo syoosi syatubereeseho daawe.” 43Abaisiraeli nabo bakobolamo bati, “Efwe naafwe huli neende bihudiisania neende Daudi ebyoola amahabi ehumi amalaamba, ohuhira eng'we bi muli nabyo, kata neende naaba naali mulala hweeng'we. Siina syeene esikera eng'we mwachaaka ohutulekeeresa mutyo? Mumanyaanga mwiibiriraho muti efwe niifwe abali abataangirira ohulomalomaho hu hukobosa omutuki engo!”
Nae abasaacha ba Yuda bali neende obwaalaba buhiraanire mu hutaao ebibaaso bi bali nabyo byoosi ohuloondana neende Daudi ohuhiraho abasaacha ba Yisiraeli.
©Bible Society of Kenya, 2019
©Bible Society of Uganda, 2019