2 Samueli 14
14
Yoabbu atekeha ohukobola hwa Abbusalomu
1Yoabbu yali niyamanya ati, Omutuki Daudi yali neende amaofu amaangi k'ohubona Abbusalomu, 2yatuma bachie bamuleetere omuhasi wali omukesi-kesi muno oyo owali niyamenya mu Tekoa. Mani omuhasi oyo niyoola, yaboola ati, “Ewe wekeraanieho koti oyo oli mu masika; wefwaale engubo chao ch'amaliriro, mani otechanuwaho efwiiri lyao lyosi. Weehole koti omuhasi yahabeechanga mu masika esiha esileeyi muno. 3Wiiche ochie eyiri omutuki oyo omuboolere bino bi njia ohuhuboolera.” Ao Yoabbu yamuboolera bi yali n'achia ohumuboolera.
4Omuhasi oyo yachia eyiri omutuki oyo yaguunama aasi hu buloba n'amwiisamo oluyaali, mani naamala n'aboola ati, “Ewe hoonye, Ewe Ow'obunyala!”
5Yateeba omuhasi oyo ati, “Ewe naawe odaha siina syeene?”
Nae omuhasi oyo yamukobolamo ati, “Omuhuluundu, ese ndi omuhasi mufwiirwe.” Haandi yameedaho ohuboola ati, “Omusaacha waange yamala ohufwa. 6Nae ewe omuhuluundu, ese ndali ni ndi neende abaana basyaani babiri, mani ludaalo luundi baakwa mu busoolo nibali erwaanyi eyomu mikuunda, eyali n'abulao omuundu yeesi onyala ohubakaya, mani mulala yeeta owaasye oyo. 7Bulaanu ewe omuhuluundu, abeeho baange boosi baangaluuhanaho, bachaaka ohuboola bati ese mbadiise omwaana waange wuundi oyo, bosi bamwiite hu lw'ohwiita mwanaang'ina. Olwohuba nibahola batyo, ese mba ndoong'a niimbulaho omwaana yeesi. Baba bachia ohusihirisira elalira esuubi lyaange limaliirihayo elyo, mani beeche banyale ohuleha wamwaange nataaliho neende omwaana yeesi oba n'achia ohukera eliita lyae ohubaao.”
8Omutuki oyo nae yamboolera ati, “Ewe wekobolereyo engo wao. Ese mweene ndabona koti lu hola esiindu sino.”
9Haandi omuhasi oyo yaboola ati, “Ewe ow'Oluyaali,” “Ewe esiindu syoosi sy'oba noochia ohuhola, ese alala neende edaala lyaange lyoosi huba huchia ohukiinga omusaango okwo; olwohuba ewe alala neende edaala lyao ly'obutuki elyo lyoosi, eng'we haba simuba nimuliho omusaango kwoosi daawe.”
10Omutuki oyo nae yakobolamo ati, “Omuundu yeesi nachaakaho ohuhutiisa-tiisa, muleete bwaangu yiindi, mani haba saaba n'achia ohuhunyasaanga haandi ehabi liindi daawe.”
11Nae omuhasi oyo haandi yaboola ati, “Ewe ow'Oluyaali, nookanya sabaho Omwaami Nasaae wao, hu omwiiho waange owolere ohusasula ohufwa hw'omwaana waange wuno, atanyala ohuba n'achia ohuhola obutemu buhira hoo, naaba niyeeta omwaana waange wuundi wuno.”
Daudi nae yakobolamo ati, “Ese husuubisa neende Omwaami mulamu endi, omwaana wao oyo haba saachia ohudiirwaho kata nabudiidi daawe.”
12Omuhasi oyo nae yaboola ati, “Nookanya, ewe ow'Obunyala, leha mbooleho esiindu siindi silala syoong'ene siti.”
Daudi nae yamukobolamo ati, “Byoosi bilai sa.”
13Omuhasi oyo haandi yamuboolera ati, “Siina syeene esikerere waahola esiindu sihyaamu syakiire ao sityo eyiri abaandu ba Nasaae? Ewe kata haba sookanyaho omwaana wao ohukobola ohutula mu bwiiruhiro bwae, mani ao waanyala omweene ohweheengera omusaango neende bino bi mweene wahaboola. 14Ngaandi efwe fweesi huchia ohufwa-bufwa; huli koti amaachi kamalire ohubbwomoolwa aasi, akatanyala ohuyooywa haandi daawe. Kata neende Nasaae mweene yesi haba saanyala ohukobosa abamala ohufwa haandi baaba abalamu daawe, nae omutuki yeesi nae anyala ohunyoola engira yoosi eyinyala ohukobosa omuundu ohumutusa mu bwiiruhiro bwae. 15Bulaanu, Ewe ow'Oluyaali, esifune syeene sikerere ndeecha ohulomalomaho yooli nisyo mbwe, abaandu beechere mani baandiisatiisa, mani ndeboolera omweene endi, ese njia ohulomaloma ewe yooli nisuubira endi ochia ohunyala ohuuholera ebyo bi mba nihusaba. 16Ese mbaasire endi, ewe ochia ohunyala ohuutekeeresa mani wiiche wuumonie ohutula eyiri oyo oli ohutemaangaho ohwiita omwaana waange wuno alala naange, mani anyale ohutusaangula atutuse mu loba li Nasaae yaberesa abaandu bae ohumenyaangamo. 17#2 Sam 19:27.Omweene njichire mani ndeboolera endi, esisuubise syao, ewe omuhuluundu, sichia ohunyala ohuumonia, olwohuba omutuki aba sa koti malaika wa Nasaae mweene, mani anyala yaakabuhania esilai neende esyonoono. Mani Omwaami Nasaae wao ahoya yaaba naawe!”
18Omutuki oyo yakobolamo ati, “Ese naange njia ohuhuteebaho esiteebo silala syoong'ene, mani ewe naawe ohoyere ohuungobolamo n'oboola obwadyeeri bweene.”
Omuhasi wuno yaboola ati, “Ewe ndeebeho esiindu syoosi, Ewe ow'Obunyala.”
19Mani yateeba omuhasi oyo ati, “Mani Yoabbu sa niye okerere waahola sino?” Omuhasi oyo nae yamukobolamo n'aboola ati, “Ndeechubira mu syoosi-syoosi esyoolerefu, Ewe ow'Oluyaali, mbwe yiibulahoo engeri yoosi-yoosi yiindahahayiramo ohuhukobolamo. Yoabbu omuhalaabani wao niye owaangeraka esy'ohuhola neende esy'ohuboola. 20Nae omutuki wuno yateeba atyo, hu anyale ohukolola bulai esiindu sino syoosi simanyihane bulai. Ewe ow'Oluyaali, oli sa omukesi koti malaika wa Nasaae, mani omanyire buli siindu sikwaao syoosi.”
21Luunyuma omutuki wuno yaboolera Yoabbu ati, “Ese mbano bulaanu heengereo ohuhola syoodaha syeene. Ewe chia onyoole omusaacha Abbusalomu oyo, mani omale omukobose engo eno.”
22Yoabbu yeehubba aasi mu moni wa Daudi n'amwiisamo oluyaali, mani naamala n'aboola ati, “Nasaae ahuberese ehabi, Ewe ow'Obunyala! Bulaanu mbao ndahamanya endi haba siwunyoolereere daawe, olwohuba wuholeere simbeere niisabire.” 23Niyamala atyo yasiingira yeema, mani n'achia mu Gesuri, naaleeta Abbusalomu naamukobosa mu Yerusalemu. 24Nae omutuki oyo, kata katyo, yalagira ati Abbusalomu haba saahoyere ohumenya mu dooho daawe. Yaboola ati, “Ese haba siindaha ohumubonaho daawe.” Abbusalomu yamenyaanga sa mu nyuumba yae yeene naahaya ohubonehaho eyiri omutuki oyo.
Abbusalomu asaasana neende Daudi
25Yabulao oyo yeesi mu Yisiraeli yi yakiire owali niyamanyihana hulw'esiiso syae silai koti Abbusalomu; yali naabulaho embala yoosi, ohutulira elalira hu mutwe, ohwoola hu lwaala lw'ohukulu. 26Efwiiri lyae lyali niliri eliingi muno, nga bimuhoyeraanga ohulibekangaaho ehabi lala buli mwaaka, nilyalichiingi nilileeyere muno haandi nilididiisye nilisidooye muno. Lyali nga linyala ohwoosa ekiloguraamu chibiri enaamba ohweema hu busito bwali nibwafukiirirwa mu dooho ohuba nibwo obusito buhoyera. 27Abbusalomu yali neende abaana basyaani badatu, neende omwaana muhaana mulala, owali n'alaangwa mbwe Tamari, omuhaasi yesi owali neende esiiso sibitiirifu muno.
28Abbusalomu yaamenya mu Yerusalemu emyaaka kibiri emilaamba, naatabonanaangaho neende omutuki oyo. 29Bulaanu yalaanga Yoabbu yeeche, ohumusaba amuchiire eyiri omutuki oyo; nae Yoabbu yahaya. Abbusalomu haandi yamulaanga, nae Yoabbu yaahayirira elalira ohwiicha. 30Abbusalomu yaboolera abahalaabani bae ati, “Eng'we boneho, omukuunda kwa Yoabbu nguno nikwo okusibiraane alala neende okwaange, nihaandi kulimo amabere masuungu. Eng'we muchie mukutubuleho omuliro kuyie.” Abahalaabani abo bachia baabwaana omuliro hu mukuunda okwo kwaayia.
31Yoabbu yasiingira haandi yachia eyiri enyuumba ya Abbusalomu n'ateeba ati, “Siina syeene esikerere abahalaabani bao baachia basaamba omukuunda kwaange?”
32Nae Abbusalomu yakobolamo ati, “Olwohuba ewe wesi wahaya ohwiicha koti ndahulaangaanga. Ndali ndahire ewe wiiche wunjiire eyiri omutuki mani omundeebere oti: ‘Siina syeene esyakera ese ndaatula mu Gesuri mani ndeecha ndaaba ano endi? Siba syahabeere nisiri esilai sihiramo niimba nindedoong'era ebweene eyo.’ ” Abbusalomu haandi yemeeda ohuboola ati, “Ese ndaha ewe wuundekehere nyale ohubonana neende omutuki oyo, mani nikali mbwe ese ndiho omusaango, anyale ohuunjita-bwiita.”
33Yoabbu yachia eyiri Omutuki Daudi yaamuboolera ebyo byoosi bi Abbusalomu yali n'aboolere. Omutuki oyo yalaanga Abbusalomu, owachia yaali mani yaguunama aasi hu buloba mu moni wae. Omutuki oyo yamwaanirisa neende ohumukwa mu sirifu.
©Bible Society of Kenya, 2019
©Bible Society of Uganda, 2019