2 Samueli 12
12
Emboosi ya Natani, neende ohweyolobya hwa Daudi
1 #
Sab 51. Omwaami yatuma omunabbi Natani achie eyiri Daudi. Natani yachia eyiri Daudi yaaboola ati, “Olwoola, yaliwo abasaacha babiri abali nibamenya mu siko silala. Mulala yali omuyiinda, nae owuundi yali omumanani. 2Omusaacha muyiinda wula yali neende eng'oombe enyiingi muno, alala neende amakoondi, 3nae omusaacha mumanani oyo yali naali sa neende ahaana h'ekoondi halala hoong'ene, ha yali niyakula-bukula. Yali niyahaliinda bulai muno, mani hahulira mu daala lyae alala neende abaana bae. Yihaliisaanga kata ebyohulya byae byeene, haandi nahakanyaanga ohung'weraanga neende mu sikoombe syae syeene, haandi oluundi nahaleraanga hu makulu kae keene. Ahakoondi aho halichiingi sa koti omwaana muhaana wae mweene. 4Nae ludaalo luundi, omukeni yakeniya edaala ly'omusaacha muyiinda wula. Omusaacha muyiinda oyo nae haba siyali naadaha ohumwiitiraho hu bisolo byae ebyo byoosi ohumudeehera alye daawe. Mubweyaango bwa esyo, yabukula ahakoondi h'omusaacha mumanani wula, mani yaheetera omukeni wae oyo ohulya.”
5Ohweema hu esyo, Daudi yanyoolerera muno omusaacha muyiinda oyo mani yaboola ati, “Ese ndeechubira Omwaami waange mulamu endi, omusaacha wahola esiindu koti esyo sityo ahoyera sa ohufwa! 6Hulw'ohuhola esiindu sy'egiili syakiire ao sityo, aba ahoyere ohutuunga amahabi kane amalaamba esyaaka neende esyo si yali naabukuule.”
7Natani nae yaboolera Daudi ati, “Ngaandi ewe niiwe omusaacha oyo.” Haandi Natani yameedaho ohuboola ati, “Mani sakira sino nisyo si Omwaami Nasaae wa Yisiraeli aboola ati: ‘Ese ndahuhola waaba omutuki wa Yisiraeli yoosi, haandi ndaahuwonia ndaahutusa hu Saulo. 8Ese ndahuberesa obwaami bwae buno, alala neende abahasi bae boosi. Ese ndahuhola waaba omutuki wa Yisiraeli neende Yuda, ebyaalo ebyo byoombi. Siba mbwe ebyaalo bino byoombi byaaba nibitaera, ese mba haandi ndahwoongesa ebiindi bityo amahabi kabiri amalaamba. 9Lwasiina, ewe wiichire waahaya ohuwulira amalako kaange? Lwasiina ewe woolere ohuhola esiindu sibi syakiire ao sityo? Ewe wiichire waahola Wuria yeeterwa mu biita. Ewe niiwe owakera Abaamooni bamwiita batyo, mani waabukula omuhasi wae! 10Bulaanu, mu buli luse lwiicha, abeechuhulu bao baandi bachia ohwoola bafwicheenge efwa y'embaki olwohuba ewe wahaya ohuumbulira mani waabukula sa omuhasi wa Wuria. 11#2 Sam 16:22.Mbano ndi ohuhwechubira endi, ese mweene njia ohukera oyo yeesi ohutula mu daala lyao, anyale ohuhukwiisa mu bidinyu. Ochia omweene ohweeboneraho neende emoni chao, ese niimbukula abahasi bao niihung'uula, mani niimbakaba omusaacha wuundi sa. Mani oyo achia ohunyala ohweeyalisa nabo alafu esideete ng'alang'ala. 12Ewe wonoonera mu bweekisi, nae ese njia ohukera sino sihwooleho alafu esideete ng'alang'ala, hu Yisiraeli yoosi yinyale ohusibona bulai.’ ”
13Daudi nae yaboola sa ati, “Ese mweene niise owonoona mu moni w'Omwaami.”
Natani haandi yakobolamo ati, “Mbao Omwaami ahuleheramo. Ewe mweene haba soochia ohufwa daawe. 14Nae olwohuba mbwe ewe wanyala ohuchia weekesa Omwaami okusinye kwakiire ao kutyo noohola esiindu sifwaana sityo, omwaana wao mweene oyo niye ochia ohufwa.” 15Ao bulaanu, Natani yasiingira mani yeekobolera engo wae.
Omwaana musyaani wa Daudi afwa
Omwaami yahola omwaana yi muhasi wa Wuria yali niyeebuliire Daudi yalwaala muno. 16Daudi yalaama Nasaae ati omwaana oyo aone. Yoola ohuhaya ohulichaanga esiindu syoosi, haandi buli siro yachichaanga mu siseenge syae mani amala esiro syoosi niyeyaliise sa mu bweeru buhaya. 17Abasaacha bahoongo bali mu dooho lyae omwo bachichaanga yaali bateemaho ohumusiingisa, nae yahayaanga sa, haandi yahayaanga ohulyaaho esiindu syoosi alala nabo. 18Ejuma enaamba niyawa, omwaana oyo yafwa, mani abahoongo ba Daudi baatya muno ohumubihira amasika ako. Baboolaniraanga sa abeene-na-beene bati, “Omwaana wuno niyali nasisiiriho omulamu, Daudi yali niyahaya ohutukobolaangamo nihwalomalomaanga nae. Nae bulaanu, hunyala hutye ohuchia mani hwaamuboolera huti omwaana wae wuno amalire ohufwa? Ngaandi awuundi anyala sa yenyaala omweene!”
19Nae Daudi mweene niyabona nibali ohwemonyaniraanga abeene-na-beene, yamanyiramo ati hane omwaana oyo amalire ohufwa mani yabateeba ati, “Eng'we, mbwe omwaana amalire ohufwa kose?”
Nabo bamukobolamo bati, “Eee, amalire ohufwa.”
20Bulaanu Daudi yasiingira ohutula mu bweeru obwo, yaachia yeeyoka, mani yaachia yekuraacha efwiiri lyae bulai, mani yaakaluuhania engubo chae yefwaala echiindi. Yachia mu nyuumba y'Omwaami mani yaamwiinamira. Luunyuma niyakobola engo mu dooho lyae elyo, yasaba ebyohulya mani yaabilya bwaangu muno nibisiibalire. 21Nae abahoongo bae bamuboolera bati, “Efwe haba sihuli ohumanya esiindu sino bulai, haba. Olwohuba omwaana oyo niyabereenge n'asisiiri omulamu hooho, wamulira muno, mani waasira neende ohulya. Nae n'afwiire sa ati, osingiire mani waachia waalya sa!”
22Daudi nae yakobolamo sa ati, “Eee. Ese ndasiibanga haandi niindiraanga niyali n'asisiiri hoomo obulamu. Olwohuba ndabaasaanga endi awuundi Omwaami anyala yangwiira esisa, mani yaakayira omwaana waange oyo ohufwa. 23Nae bulaanu koti lwaamalire ohufwa, siina syeene esiba nisikera niisisiiba? Ese nyala ohukobosa omwaana oyo yaaba omulamu haandi? Ohutusaho ese mweene niise, ludaalo luundi ochia ohuchia eyo yaali, nae oyo haba saalinyala ohuungobolera daawe.”
Ohwiibulwa hwa Solomooni
24Bulaanu, Daudi yalemya omwooyo kwa Bbatiseebba omuhasi wae oyo. Yakona nae, mani yeebula omwaana wuundi omusyaani, yi Daudi yakuliha ati Solomooni. Omwaami yaheera omwaana oyo muno 25mani n'alagira Natani omunabbi ohuchia ohumukuliha ati Yedidia, olwohuba Omwaami yali niyamuheera muno.
Daudi awaamba Rabba
(1 Biha 20:1-3)
26Mubiha byeene ebyo, Yoabbu yemedaanga sa nalwaanakania Rabba, esiko sihuluundu sya Abaamooni, mani yesi yali yoolere aambi ohusiaamba sa. 27Yatuma bawamwaanda bachie eyiri Daudi bamuboolere bati: “Ese mbano malire ohuseeta Rabba, mani malire neende ohuwaamba abuundu atulaanga amaachi kasyo. 28Mani, ewe bulaanu buusa alala amaye kadoong'ereo, mani oseete esiko esyo onyale omweene ohusywaambira.” 29Daudi yabuusa alala amaye kae, naachia n'aseeta Rabba, naanyala ohusiwaamba. 30Mani ohutulira elalira hu mutwe kw'esiloongaloongwe sya Moleki nasaae w'Abaamooni; Daudi yabukulaho ekofia y'obutuki y'esaabbu eyali niyirimo obusito bw'ekiloguraamu amahumi kadatu-na-chitaanu, haandi eyalimo enyolo cha ohwefwaala. Daudi yabukula enyolo echio mani naachita mu kofia y'obutuki yae yeene. Haandi yabukula ebiindu byapeeywa ebiingi muno ohutula mu siko omwo 31mani yata abaandu bomu siko omwo ohuholaanga emirimo kidaha emisyameeno, embako ch'ebichuma, neende eyaywa ch'ebichuma, haandi nibabayika ohuholaanga koti aboobbi b'amatafaali. Yahola atyo neende abaandu b'ebiko biindi byoosi ebidoong'ereyo eby'Abaamooni. Omweene oyo alala neende abasaacha bae balwaani abo baakobolayo mu Yerusalemu engo waabwe.
©Bible Society of Kenya, 2019
©Bible Society of Uganda, 2019