2 Samueli 1
1
Daudi amanya ohufwa hwa Saulo
1Luunyuma lw'ohufwa hwa Saulo, Daudi yakobola ohutula mu huyiingira hwae Abamaleki, mani yaaba mu Sikilaagi endaalo chibiri enaamba. 2Oludaalo lwaloondaho, omusyaani omuraaga yoola ebweene eyo naatula mu kaambi ya Saulo. Ohweekesa esibeera si yali naali nasyo, yali n'amalire ohwetaandulaho engubo chae choosi, haandi niyeebahire eloba hu mutwe kwae. Yasuda eyiri Daudi yaaguunama aasi ohwoola hu buloba ohumwiisamo oluyaali. 3Daudi yamuteeba ati, “Ewe otula yeena bweene?”
Nae yamukobolamo ati, “Ese ndeeyibire ohutula mu kaambi y'Abaisiraeli.”
4Daudi yamuboolera ati, “Ewe mboolereho esikwiireo.”
Nae yamukobolamo ati, “Eye lyeefwe liichire lyeeruha nilitula mu biita, mani abasaacha beefwe abaangi muno beeterwa elalira. Mani Saulo neende Yonatani omwaana wae bosi beeterwe.”
5Daudi haandi yaamuteeba ati, “Ewe omanyire otye oti Saulo neende Yonatani boombi bafwiire?”
6 #
1 Sam 31:1-6; 1 Biha 10:1-6. Nae yamukobolamo ati, “Ese mbeere ni ndi hu Sigulu sya Gilibboa, mani ndaanyala ohubona Saulo niyeenamiriire hu fumo lyae, endi haandi ebigaari by'efaraasi alala neende ebilwaaniso biindi eby'omusuku byali nibimwiikalirisaanie, haandi nibimusudireho aambi. 7Mani yeechere yakaluuhana yaambona, mani yanaanga. Ese mukoboolemo endi ‘Eee, omuhuluundu!’ 8Yandeebere ati niise naanu, mani ese ndaamuboolera endi ese ndi Omumaleeki. 9Mani haandi yeechere yamboola ati, ‘Ewe yicha ano mani wuunjite! Ese nyaaliihe muno, mani ndi aambi ohufwa.’ 10Mani ese nyemereo ndaachia yi ali ndaamala ndamwiita, olwohuba mbere nimanyiiremo sa endi abeere ow'ohufwa koti luyahakwiire sa aasi ati. Mani ese njichire ndaanyala ohubukula ekofia y'obutuki, ndaifwaalula hu mutwe kwae, haandi neende emigasa kyoohumuhono, mani mbano nibyo bindeetere yooli omuhuluundu.”
11Daudi yesi yetaandulaho engubo chae naali nesibeera, haandi abasaacha bae boosi baahola batyo. 12Bachuunirwa mani baalira muno, haandi basiiba ohwoola engoloobe hulwa Saulo neende Yonatani, haandi neende hulwa Yisiraeli yoosi, abaandu b'Omwaami, olwohuba abaangi muno abali nibeeteerwe mu biita.
13Daudi yateeba omusyaani muyere oyo owali namuleteere amakeni ako ati, “Ewe naawe oli owa yeena bweene?”
Nae yakobolamo ati, “Ese ndi Omumaleeki, nae ndamenya mu syaalo wao muno.”
14Daudi haandi yaamuteeba ati, “Nae syahaba sitye mbwe ewe onyalire ohwenyiira mani weeta omutuki mudoole w'Omwaami?” 15Mani Daudi yalaanga mulala hu basaacha bae yaboola ati, “Ewe mwiite!” Mani omusaacha oyo yaatema Omumaleeki oyo yaamunyaala muno, 16haandi Daudi yaboolera Omumaleeki oyo ati, “Ewe mweene niiwe oweleteere sino ohuhwoolaho. Omweene weheengeere omusaango niweeyamire oti niiwe owiitire oyo yi Omwaami yadoola ohuba omutuki.”
Daudi alira Saulo neende Yonatani
17Daudi yeembera Saulo neende Yonatani olweembo lw'ohulira, 18#Yos 10:13.mani yalagira ati lweekeswe abaandu ba Yuda boosi. (Syandiikwa Mu sitabo sya Yasari.)
19“Hu bigulu bya Yisiraeli, nihwo hu beemirisi beefwe bafwiriire!
Abalwaani beefwe bahiramo obululu bakwiire!
20Otasituumbuliraho mu Gaati daawe
oba hu makira ka Asikelooni. Otasaangasaho abahasi Bafilisiti. Otakeraho abahaana b'abakafiiri basaangaala.
21“Efula yoosi oba kata sa olume lwoong'ene luhoya lwaahaya ohutoonyaho hu ngulu cha Gilibboa;
emikuunda kyahwo kyoosi kihoya kyaamenya nikyahaya ohumeramo esiindu syoosi!
Olwohuba engabo ch'abalulu chaanjalaale eby'esoni;
engabo ya Saulo, yahaywa ohuubbwa neende amafuta yaamesamesana daawe.
22Oluyiingo lwa Yonatani olwali olwiiti,
olugaanga lwa Saulo olwali nambula-sisa,
nilukwisaanga aasi abahunuufu, nilwiita abasuku.
23“Saulo neende Yonatani, abali abekoombesa haandi abakoosi;
abali alala mu bulamu, haandi baaba alala mu hufwa;
abali abaangu ohuhiraho eeswi, haandi ab'amaani ohuhiraho edalang'i.
24“Eng'we abahasi ba Yisiraeli, lire Saulo!
Yabafwalaanga engubo ch'amang'eniesi ka papo
haandi yaabafwalaanga emigasa ky'esaabbu.
25“Abalwaani balulu bamalire ohukwa aasi,
beteerwe mu biita.
Yonatani alambaalire omulaambo mu bigulu.
26“Hudiiriire esibeera, ewe Yonatani mwaanaama;
nga wali omukoosi waange!
Obuheeri bwao yi ndi nga bwali obuwukisa,
ohuhirira eyale muno obuheeri bw'abahasi.
27“Abalwaani balulu bakwiire aasi,
ebilwaaniso byaabwe byaalehwa mani byaaba ebibula obuhoonyi daawe.”
©Bible Society of Kenya, 2019
©Bible Society of Uganda, 2019